Qarşılıqlı fəaliyyət ŞƏRH

8 oktyabr 2024-cü il tarixində Moskvada Müstəqil Dövlətlər Birliyi (MDB) Dövlət Başçıları Şurasının görüşü keçirildi.Görüşdə iştirak edən Azərbaycan Respublikasının Prezidenti cənab İlham Əliyev çıxış etdi və bu çıxış mühüm mesajlarla yadda qaldı. Dövlət başçısının bu görüşdəki çıxışı da əvvəlkilər kimi dolğun və məzmunlu idi.

Bu görüş Azərbaycan və Rusiya dövlətləri arasında münasibətlərin olduqca isti olduğunu bir daha göstərdi. Azərbaycan və Rusiya dövlət başçılarının mütəmadi olaraq keçirdikləri görüşlərdə fəal siyasi dialoq özünü qabarıq göstərir. Bu görüşlər demək olar bütün sahələrdə münasibətlərin inkişafına təkan verir. Son illərdə Rusiya ilə Azərbaycan arasında iqtisadi-ticari əlaqələrin dərinləşdirilməsi üzrə çox böyük işlər görülüb. Artıq onun praktik nəticələri göz önündədir. Bunu Putin də öz çıxışı zamanı vurğuladı. Rusiya prezidenti dedi ki, Azərbaycan və Rusiya arasında münasibətlər müsbət məcrada inkişaf edir, tərəflər bir çox maraqlı layihələr həyata keçirirlər.

Azərbaycan Prezidenti İlham Əliyev də çıxışı zamanı iki ölkə arasında müttəfiqlikdən bəhs etdi. Prezident vurğuladı ki, Rusiya Federasiyası Prezidentinin Azərbaycana bu yaxınlardakı dövlət səfəri Rusiya-Azərbaycan münasibətlərinin müttəfiqlik xarakterini bir daha təsdiq etdi: “Əldə olunmuş razılaşmaların həyata keçirilməsi gələcəkdə münasibətlərimizin ardıcıl inkişafı işinə xidmət edəcək”,-deyə Prezident qeyd etdi.

Prezident İlham Əliyev Laçın şəhərinin MDB-nin mədəniyyət paytaxtı seçilməsinə də toxundu. Ölkə başçısı qeyd etdi ki, MDB Humanitar Əməkdaşlıq Şurasının qərarına əsasən, Azərbaycanın Şərqi Zəngəzur bölgəsinin Laçın şəhəri 2025-ci ildə MDB-nin mədəniyyət paytaxtı elan edilib. Laçının MDB-nin mədəniyyət paytaxtı elan edilməsi həm laçınlılar, həm də bütün Azərbaycan xalqı tərəfindən böyük minnətdarlıqla qarşılanıb.

Prezident ölkəmizdə görüləcək işlər haqqında da məlumat verərək bildirdi ki, növbəti il Azərbaycanda III MDB Oyunları keçiriləcək. Həmçinin hazırda Azərbaycanın COP29-a ev sahibliyi etməyə hazırlaşmasından söhbət açaraq ölkəmizdə bununla bağlı silsilə tədbirlərin başlanmasını qeyd etdi. Ölkəmizin liderinin bildirdikləri beynəlxalq aləmə mesaj notlarının zənginliyi baxımından diqqət çəkirdi. Azərbaycanın növbəti dəfə mötəbər beynəlxalq tədbirə ev sahibliyi edəcəyinin bəzi dövlətləri qıcıqlandırdığını, xüsusilə də Qərbdən maliyyələşən şəxs və təşkilatların son zamanlar Azərbaycana qarşı qarayaxma kampaniyası apardığını qeyd edərək bütün bunların heç bir nəticə verməyəcəyini və Azərbaycanın daha əvvəllər olduğu kimi indi də bu böyük tədbirə yüksək səviyyədə ev sahibliyi edəcəyini vurğulaması əsas məqamlardan biri idi.

MDB dövlət başçılarının İkinci Dünya müharibəsində Qələbənin 80 illiyi ilə bağlı müraciətin qəbul ediləcəyi gündə, dövlət başçısının çıxışında xalqımızın İkinci Dünya müharibəsi qələbəsində mühüm rolunu qeyd etməsi də önəmli bir nüans idi. Prezident Azərbaycanın SSRİ-dəki önəmli yerindən bəhs edərək aşağıdakıları söylədi: “Azərbaycan İkinci Dünya müharibəsində qələbənin əldə olunmasında sanballı töhfə verib. Həmin dövrdə 3 milyon 400 min əhalisi olan Azərbaycandan cəbhəyə 700 minə yaxın insan yollanıb. Döyüş meydanlarında 350 min nəfər həlak olub, 130 azərbaycanlı Sovet İttifaqı Qəhrəmanı adına layiq görülüb. Müharibə illərində Azərbaycan neftçiləri cəbhəyə neft və neft məhsullarının 80 faizini, hərbi texnika üçün yağların 96 faizini tədarük edib. Bütün bunlar həmin dövrdə Azərbaycanda istehsal olunub, göstərilən məhsulların o vaxtlar SSRİ-də ümumi istehsalının faizidir. Azərbaycanda 130 növdən çox silah, sursat və texnika, o cümlədən məşhur “Katyuşalar”, “Yak-3” qırıcıları istehsal edilirdi. Bakıda 41 hərbi hospital fəaliyyət göstərirdi, 440 min yaralı müalicə alırdı. 1942-ci ilin martında, həmçinin Taqanroq adı ilə tanınan 416-cı Azərbaycan atıcı diviziyasının döyüşçüləri and içdilər və Şimali Qafqazdan başlayan döyüş yolunu Berlində başa çatdırdılar”.

Daha bir tarixi həqiqətin görüşdə səsləndirilməsi yaddaşların yenilənməsi baxımından əhəmiyyətli mesaj idi. Belə ki, Prezident İlham Əliyev 416-cı Azərbaycan atıcı diviziyasının 1945-ci il aprelin 21-də birincilər sırasında Berlinin girəcəyinə daxil olmasını belə şərh etdi: “Mayın 2-də diviziyanın döyüşçüləri polkovnik Rəşid Məcidovun komandanlığı altında Qələbə Bayrağını Brandenburq darvazası üzərinə sancdılar. 9 May ümumi Qələbəmiz MDB-yə üzv dövlətlərin gələcək əməkdaşlığının mühüm amilidir. Azərbaycan bu əməkdaşlığa böyük əhəmiyyət verir və bundan sonra da qarşılıqlı fəaliyyətimizin möhkəmləndirilməsi işinə öz töhfəsini verəcək”.

Gündüz Bayramov

YAP Samux rayon təşkilatının sədri