Türk Dünyası ölkələri arasında əməkdaşlıq inkişaf edir ŞƏRH

Qırğızıstanın paytaxtı Bişkekdə noyabrın 6-da Türk Dövlətləri Təşkilatı (TDT) Dövlət Başçılarının 11-ci Zirvə görüşü keçirilib. Azərbaycan Respublikasının Prezidenti cənab İlham Əliyev Zirvə görüşündə çıxışı zamanı bu ilin Türk Dövlətləri Təşkilatının əsasını qoymuş Naxçıvan Sazişinin 15-ci ildönümü olduğunu, təşkilatın bu dövr ərzində uğurlu inkişaf yolu keçdiyini və iyul ayında Şuşa şəhərində keçirilmiş Dövlət başçılarının qeyri-rəsmi Zirvə görüşündə imzalanmış Qarabağ Bəyannaməsi əməkdaşlığın daha da dərinləşməsinə töhfə verdiyini bildirib . Cənab Prezident İlham Əliyev çıxışında demişdir ki, Azərbaycan Türk Dövlətləri Təşkilatının möhkəmlənməsi istiqamətində səylərini bundan sonra davam etdirəcək.

Azərbaycanın Türk Dövlətləri Təşkilatına (TDT) maliyyə dəstəyi təmin edəcəyi ilə bağlı qərar son vaxtlarda geniş müzakirə mövzusuna çevrilib. Bu qərarın qəbul edilməsi Azərbaycanın regionda artan rolunu və TDT çərçivəsində daha sıx əməkdaşlıq niyyətini əks etdirir. Həmçinin, Azərbaycanın iqtisadi potensialı və təbii resurslarından əldə etdiyi gəlirlər bu dəstəyi həyata keçirmək üçün mühim bir amil sayılır. TDT 2009-cu ildə qurulmuş və məqsədi türkdilli ölkələr arasında siyasi, iqtisadi, mədəni və humanitar əlaqələri inkişaf etdirmək olan bir təşkilatdır. Təşkilatın üzvləri arasında Türkiyə, Azərbaycan, Qazaxıstan, Qırğızıstan, Özbəkistan və müşahidəçi statusda Macarıstan kimi dövlətlər yer alır. Son dövrlərdə TDT çərçivəsində üzv dövlətlər arasında həm təhlükəsizlik, həm iqtisadi, həm də enerji sahələrində əməkdaşlıq daha da gücləndirilib. Azərbaycanın bu təşkilata maliyyə dəstəyi göstərməsi ilə ölkə təşkilatın layihələrinin icrasında daha böyük rol oynaya biləcək və türkdilli ölkələr arasında əlaqələrin daha da güclənməsinə şərait yaradacaq. Bu dəstək TDT-nin iqtisadi layihələrinin, təhsil, mədəniyyət və infrastruktur sahəsindəki təşəbbüslərinin maliyyələşdirilməsində vacib rol oynaya bilər.

Bu qərar Azərbaycanın qlobal arenada mövqeyini gücləndirmək, türk dövlətləri ilə sıx inteqrasiya yaratmaq və müştərək iqtisadi layihələrdə iştirakını artırmaq məqsədinə xidmət edir. Eyni zamanda, Azərbaycanın bu dəstəyi TDT-nin strateji gücünü və nüfuzunu artırmaqla yanaşı, təşkilata üzv olan ölkələrin beynəlxalq aləmdə daha güclü və birgə fəaliyyət göstərməsinə töhfə verəcəkdir. Beləliklə, Azərbaycanın Türk Dövlətləri Təşkilatına maliyyə dəstəyi həm təşkilatın inkişafı, həm də türkdilli dövlətlərin daha sıx əməkdaşlığının təmin edilməsi baxımından əhəmiyyətli bir addımdır.

Mehman RAMAZANOV,

YAP Oğuz rayon təşkilatının sədr müavini