Beynəlxalq əlaqələr: Hədəflər və strateji addımlar

Fevralın 12-də Azərbaycan Respublikasının Prezidenti İlham Əliyev və Somali Federativ Respublikasının Prezidenti Hasan Şeyx Mahmud arasında Bakıda yüksək səviyyəli görüşlər keçirildi. Bu səfər Somali Prezidentinin Azərbaycana ilk rəsmi səfəri kimi tarixə düşmüş və iki ölkə arasında dostluq münasibətlərində yeni bir mərhələnin başlanğıcı oldu.

Görüşlər çərçivəsində prezidentlər qarşılıqlı maraq doğuran bir sıra mövzuları müzakirə ediblər. Daha sonra hər iki lider mətbuata bəyanatlarla çıxış ediblər. Prezident İlham Əliyev bəyanatında iki ölkə arasında münasibətlərin yüksək səviyyədə inkişaf etdiyini vurğulayıb və əməkdaşlığın gələcək perspektivlərinə toxunub.
Azərbaycan və Somali arasında mövcud olan münasibətlər qarşılıqlı etimada, siyasi sabitliyə və dövlətlərin suverenliyinə hörmət prinsiplərinə əsaslanır. Bu gün dünya düzənində baş verən çağırışlar fonunda dövlətlərin suverenliyinin və ərazi bütövlüyünün qorunması məsələsi daha da önəm kəsb edir. Azərbaycan uzun illər davam edən işğal dövrünü başa vuraraq beynəlxalq hüquq çərçivəsində öz torpaqlarını azad etməyə nail oldu və bu proses zamanı güclü dövlət mexanizmi, strateji baxış və qətiyyət nümayiş etdirdi. Bu təcrübə Somali üçün də önəmli bir nümunədir.
Prezident İlham Əliyev vurğulayıb ki, hər bir ölkə üçün siyasi sabitlik inkişafın təməl şərtidir və bu istiqamətdə Azərbaycan öz təcrübəsini Somalinin bölüşməyə hazırdır. Somali Afrika ilə Asiya arasında mühüm bir tranzit nöqtəsi olaraq, nəqliyyat və logistika sahələrində böyük inkişaf potensialına malikdir. Azərbaycanın nəqliyyat və infrastruktur sahəsində təcrübəsi Somali limanları və dəmiryolu şəbəkələrinin inkişafında böyük rol oynaya bilər. Azərbaycanın strateji mövqeyi və tranzit ölkəsi kimi güclü infrastrukturu Somali ilə əməkdaşlığın gücləndirilməsi üçün mühüm bir təkan verə bilər. Somali enerji istehsalında çətinliklərlə üzləşir və enerji ehtiyaclarını xaricdən təmin edir. Bu sahədə Azərbaycan təcrübəsini və inkişaf etmiş texnologiyalarını Somali iqtisadiyyatına tətbiq etmək üçün böyük bir potensiala malikdir.
Somalidə kənd təsərrüfatı sektorunun inkişafı müasir texnologiya və texniki dəstək tələb edir. Azərbaycan bu sahədə əldə etdiyi təcrübəni Somali ilə bölüşərək əkinçilik, heyvandarlıq və suvarma sahələrində investisiyalar edə bilər.

Varis Rüstəmov
YAP Sabirabad rayon təşkilatının sədri