"Aprel döyüşləri Şanlı Zəfərə gedən yolun başlanğıcı oldu" - Mövlan Məmmədov

Azərbaycan Ordusunun tarixi zəfərlərindən olan şanlı Aprel döyüşlərininin 9 ili tamam olur. 2016-cı il aprelin 2-də Ermənistan silahlı qüvvələrinin təxribatlarına cavab olaraq rəşadətli ordumuzun sürətli əks-hücum əməliyyatı ilə başlanan döyüşlər Azərbaycanın qələbəsi ilə nəticələndi. Bu qələbə tariximizə qızıl hərflərlə yazılan Vətən müharibəsində şanlı Zəfərə gedən yolda çox mühüm əhəmiyyətə malik olmuşdur.Bu sözləri SİA-ya açıqlamasında Naxçıvan Muxtar Respublikası Ali Məclisinin deputatı Mövlan Məmmədov bildirib.Mövlan Məmmədov bildirib ki, Aprel döyüşlərində düşmən üzərində qazanılan qələbə ordumuzun və xalqımızın şanlı Zəfərə inamını daha da artırmışdı. Rəşadətli Azərbaycan ordusu dördgünlük Aprel döyüşləri ilə uzun illərdən sonra ilk dəfə idi ki, xalqımıza qələbə sevincini yaşadırdı. Qələbə nəticəsində Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsi azad edilib, həmçinin minlərlə hektar ərazi Azərbaycan Ordusunun tam nəzarətinə keçib. Uğurla həyata keçirilən hərbi əməliyyatlar ilə Goranboy rayonunun Gülüstan kəndi, Tərtər rayonunun Talış kəndi istiqamətindəki yüksəkliklər işğalçılardan təmizləndi, strateji əhəmiyyətə malik olan Cəbrayıl rayonunun Lələtəpə yüksəkliyi işğaldan azad edildi.Deputat qeyd edib ki, Aprel döyüşlərindəki zəfərin davamı olaraq 2020 – ci il sentyabrın 27-də Müzəffər Ali Baş Komandan İlham Əliyevin rəhbərliyi altında başlanan və 44 gün əzmlə davam edən Vətən müharibəsi nəticəsində işğal altında olan torpaqlarımız düşmən tapdağından azad edildi. Həmçinin 2023 – cü il sentyabrın 19 – da başlayan antiterror əməliyyatı nəticə¬sində Azərbaycan Qarabağdakı qanunsuz separatçı rejimin mövcudluğu¬na son qoydu və özünün beynəlxalq səviyyədə tanınmış əraziləri üzərində suverenliyini tam bərpa etdi.Mövlan Məmmədov əlavə edib ki, bu şanlı zəfərlərə böyük qürur hissiylə şahid olmağımız və bu qalibiyyətləri böyük iftixar hissi ilə yaşamağımız dövlətin iqtisadi gücü, müasir, güclü ordu və xalq-iqtidar birliyi, eləcə də Azərbaycan xalqının əzmi, vətənpərvərliyi və iradəsi sayəsində nail olunmuşdu. Azərbaycan əldə etdiyi zəfərlərdən sonra regionda yeni reallıqlar yaratdı. Azərbaycan bu gün böyük nüfuz və güc sahibi olaraq beynəlxalq aləmdə qabaqcıl yerləri tutur.