"Biz bu gün gənclərimizin hər biri ilə fəxr edirik!" - ŞƏRH EDİLDİ

"Cənab Prezident tərəfindən "Gənc istedadlara təqaüdlərin verilməsi" ilə bağlı imzalanan sərəncam çox böyük bir dövlət diqqətinin, gənclərə göstərilən qayğının növbəti bariz nümunəsinin göstəricisi kimi qiymətləndirilməlidir. Azərbaycanın gənclər üçün siyasəti Prezident İlham Əliyevin rəhbərliyi ilə uğurla inkişaf edib davam etdirilir". Bu sözləri SİA-ya açıqlamasında Milli Məclisin Ailə, qadın və uşaq məsələləri komitəsinin sədr müavini, deputat Jalə Əliyeva deyib.Onun sözlərinə görə, bu gün Azərbaycan gəncləri öz sözünü demək, özünü təsdiq etmək, bilik və bacarıqlarını günü-gündən inkişaf edən Azərbaycan qurucularının içində tətbiq etmək imkanlarına malikdirlər: "Azərbaycan gənclərinin istedadlarının üzə çıxarmasının dəstəklənməsi, dünyaya tanıdılması üçün Azərbaycan Respublikasının Prezidenti İlham Əliyev və Heydər Əliyev Fondunun rəhbəri, birinci vitse-prezident Mehriban xanım Əliyevanın rəhbərlikləri ilə çox uğurlu layihələr bu günə qədər hazırlanıb, həyata keçirilib. Bu layihələrin hər birinin arxasında Azərbaycan gənclərinə dəstək, eyni zamanda onların istedadlarının dünyaya tanıdılması və gələcək inkişaflarının formalaşdırılması dayanır. Əlbətdə ki, bu gün sadəcə istedadlı gənclər deyil, ümumiyyətlə böyüməkdə olan nəsil-uşaqlarımız, yeniyetmələrimiz hər biri azad, müstəqil bir ölkənin vətəndaşı olaraq öz müqəddəratlarını təyin etmək, gələcəklərini hədəfləmək imkanlarına sahibdirlər.Bu gün Azərbaycan gənci özünü elmdə sınayır, təsdiq edir. Həmçinin idmanın çox mühüm sahələri ilə məşğul olaraq ölkəsini tanıdır. Azərbaycan gəncinin mədəniyyətlə və incəsənətlə bağlı layihələrdə iştirakı özünü bariz şəkildə həm ölkədə, həm də dünyada göstərir".Deputat həmçinin qeyd edir ki, zamanında Azərbaycanın vətənpərvər gəncləri ölkənin bütövlüyü, suverenliyi uğrunda canından keçib: "Onlar hər zaman böyük bir ehtiramla anılır. Biz onların hər birini öz övladımız olaraq dəyərləndiririk. 44 günlük mübarizə müharibəmizdə şanlı zəfərimizin əldə edilməsində, antiterror əməliyyatlarında və ümumiyyətlə münaqişənin başlandığı gündən bu günə qədər ordumuzun hər bir üzvü olan gənclərimizin yazdığı qəhrəmanlıq epapeyası salnaməsi əvəzsizdir. Biz bu gün gənclərimizin hər biri ilə fəxr edirik!Ölkəsinin gələcəyini düşünən, qanında, damarlarında azərbaycanlı qanı axan və Prezidentinin bir çağırışı ilə çağırış məntəqələrinin qarşısında toplaşıb bir nəfər kimi ön cəbhəyə getmək arzusunu ürəyində daşıyan bütün gənclərimiz bizim qürur mənbəyimizdir. Biz onların hər biri ilə qürur duyuruq. Arzu edirik ki, gənclərimiz dövlət siyasətinə hər bir zaman layiq olsunlar. Çünki onların xoşbəxt olması, uğur qazanması üçün bu gün dövlətimiz əlindən gələni edir. Bir daha qeyd etmək istəyirəm ki, Prezident tərəfindən imzalanan bu sərəncam gənclərimizə ən böyük dövlət qayğısının təzahürüdür".

Müəllif: Xeyrənsə Piriyeva