"Çalışsınlar ki, bu cür səhvlərdən uzaq olsunlar" - Politoloq DANIŞDI

"Baş vermiş hadisə Almaniya siyasi elitasına başucalığı gətirmir". Bunu SİA-ya politoloq Tofiq Abbasov deyib.Onun sözlərinə görə, belə səhvləri dayaz düşüncəli, dünyadan xəbəri olmayan insanlar, qruplar, cameələr edir. Almaniya çox ciddi, dünya arenasında qüdrətə malik məmləkətdir: "Almaniya dövlətinin tarixi dövründə çox ciddi düşünən beyinləri, siyasi cəhətdən püxtələşmiş, hazırlıqlı siyasətçiləri olub. Bu səhvi buraxan Frank-Valter Ştaynmayer özü deyil, onun komandasının məsuliyyətsiz üzvləridir. Onlar özlərini yekəxana aparıb, belə bir təəssürat yaradırlar ki, dünyadan xəbərdardırlar, bütün problemlərin təfərrüfatlarına bələddirlər, eləcə də digər məmləkətlərin qlobal səviyyəsindən qat-qat üstündürlər. Düzdür Almaniya iqtisadi qüdrət sahibi, dünya tarixinə müəyyən töhfələr vermiş ölkə olsa da, amma bu ölkənin müasir dönəmdə düşünən beyinləri, siyasi dairələri bəsit formada özlərini ifadə edirlər. Bir tərəfdən siyasi məlumatsızlıq, digər tərəfdən problemli vəziyyətlərin fərqinə varmamaq, başqa ölkələrə yuxarıdan-aşağı baxma cəhdləri özünü büruzə verir. Əlbəttə ki, bu beynəlxalq vəziyyətdə bağışlanılmaz, kobud səhvdir.Xatırladım ki, Frank-Valter Ştaynmayer Xarici İşlər Nazirliyi postunda çalışarkən, çox səylər göstərdi ki, Azərbaycan-Ermənistan arasındakı ərazi problemi dinc yolla həllini tapsın. Hətta belə bir fikir də formalaşmışdı ki, ola bilsin Almaniya Fransanı əvəzləsin və ya Minsk Qrupuna qatılsın. Frank-Valter Ştaynmayer məsələdən xəbərsiz deyildi, Angela Merkel kansler seçildiyi zaman Frank-Valter Ştaynmayer Bakıya gəlmiş, Avropa meydanında Qarabağ haqqında öz fikirlərini açıqlamışdı. Onun piar məsələsi ilə məşğul olan şəxslərin diqqətsizliyi, təxribatlara meylli olmaları belə bir səhvi gündəmə gətirib. Almaniya Azərbaycan-Ermənistan qarşıdurmasında Ermənistanı dəstəkləyir, günü bu gündə də onların səyləri nəticəsində Ermənistana silah-sursat verilir. Bu paradoksal görünsə də faktdır. Bu faktı yaddan çıxara bilmərik. Əminəm ki, cənab Prezident İlham Əliyevin almaniyalı həmkarı ilə danışıqlarında öz prinsipal mövqeyini bildirəcək, digər tərəfdən isə özünəməxsus hesabatını aparacaq ki, Almaniya niyə başı pozuq ölkəni, siyasi rəhbərliyində şəristəsiz, aciz, fərsiz adamları olan Ermənistanı silah-sursatla təmin edir? Almaniya həqiqətən Ermənistana kömək etmək, əl tutmaq istəyirsə maliyyə ilə təmin etsin ki, ölkə iqtisadi cəhətdən inkişaf etsin. Çünki Ermənistan ölümcül, biabırçı vəziyyətdədir. Ermənistan xammalı istehsal edib satır, onlarda dərin emal prosesi yoxdur".O bildirib ki, Almaniya Fransanın fitvasının təsirinə məruz qalıb, Ermənistanı dəstəkləyir: "Bu yolverilməzdir.

Sözügedən təxribatın rəsmi saytda qondarma, reallıqla əlaqəsi olmayan Dağlıq Qarabağ Respublikasının əskisini təsvir etmək, bağışlanılmaz səhvdir. Doğrudur, bu addım üzrlə nəticələnməlidir və belə də oldu. Amma bu zəmanət vermir ki, Almaniyanın və eləcə də digər Avropa ölkələrinin elitası bu səhvi təkrarlamayacaq. Buna göz yummaq olmaz və yummadıq da. Azərbaycan Respublikası onlardan üzr istətdi, Almaniya tərəfi isə bu səhvin bir daha təkrarlanmayacağını bildirdi. Çalışsınlar ki, bu cür səhvlərdən uzaq olsunlar".
Müəllif: Banuçiçək Hüseynli