Almaniya-Azərbaycan münasibətləri yeni strateji əməkdaşlıq mərhələsinə qədəm qoyub

Azərbaycan etibarlı tərəfdaş kimi Almaniya ilə münasibətlərini ildən-ilə möhkəmləndirir. Rəsmi Bakı Avropa İttifaqı ilə sıx əməkdaşlıq çərçivəsində Almaniyanın dəstəyinə xüsusi önəm verir. Almaniya dünya siyasətində və iqtisadiyyatında mühüm rol oynayan ölkə kimi Azərbaycanla bütün sahələrdə əməkdaşlığın genişləndirilməsinin tərəfdarıdır. Bu baxımdan, aprelin 1-də Almaniya Federativ Respublikasının Prezidenti Frank-Valter Ştaynmayerin Azərbaycana səfəri xüsusi əhəmiyyət kəsb edir. Səfər çərçivəsində Azərbaycan Respublikasının Prezidenti İlham Əliyev və Almaniya Federativ Respublikasının Prezidenti Frank-Valter Ştaynmayer mətbuata bəyanatlarla çıxış edib, jurnalistlərin suallarını cavablandırıblar.

Görüşdə müzakirə olunan əsas mövzulardan biri iqtisadi əməkdaşlıq olub. Prezidentlər ticarət dövriyyəsinin artırılması və müxtəlif sahələrdə əməkdaşlığın dərinləşdirilməsinin vacibliyini vurğulayıb. Almaniya Azərbaycanın Avropadakı əsas siyasi-iqtisadi tərəfdaşlarından biridir. Eyni zamanda, Almaniya Avropa İttifaqının Şərqi Avropa ölkələri ilə əməkdaşlığını nəzərdə tutan, Polşa və İsveç tərəfindən irəli sürülmüş “Şərq Tərəfdaşlığı” təşəbbüsünün fəal müdafiəçisi və təşviqatçısıdır. İki ölkə arasında siyasi münasibətlərin yüksək səviyyədə olması qarşılıqlı səfərlər və intensiv parlamentlərarası əməkdaşlıqla müşayiət olunur.
Prezident İlham Əliyev çıxışı zamanı Ermənistanla münasibətlərə də toxunaraq vurğulayıb ki, Azərbaycan 30 il ərzində erməni işğalından əziyyət çəkib, etnik təmizləməyə məruz qalıb, bir milyon azərbaycanlı məcburi köçkün vəziyyətinə düşüb və ərazilərin təxminən 20 faizi işğal altında olub. O bildirib ki, beynəlxalq təşkilatlar bu məsələdə ciddi addımlar atmasa da, Azərbaycan münaqişəni beynəlxalq hüquq çərçivəsində döyüş meydanında və siyasi müstəvidə həll edib. Bu tarixi Zəfər sülh danışıqlarına imkan yaradıb və hazırda Azərbaycanla Ermənistan arasında sülh prosesində mövqelərin kifayət qədər yaxınlaşdığı müşahidə olunur.
Azərbaycan və Almaniya arasında diplomatik münasibətlər 1992-ci il fevralın 20-də qurulub. Həmin ilin sentyabrında hər iki ölkədə səfirliklər açılıb və o vaxtdan bəri əlaqələr davamlı olaraq inkişaf edib. Prezident İlham Əliyevin 2004-cü ildə Almaniyaya ilk rəsmi səfəri əməkdaşlıq üçün geniş potensialın mövcudluğunu bir daha təsdiqləyib. Səfər çərçivəsində imzalanmış bir sıra sazişlər iqtisadi əlaqələrin genişlənməsinə şərait yaradıb.
Almaniya Federativ Respublikasının Prezidenti Frank-Valter Ştaynmayerin Azərbaycana səfəri iki ölkə arasındakı əlaqələrin inkişafını daha da sürətləndirməklə yanaşı, həm də Avropada Azərbaycanla bağlı siyasətin daha pozitiv istiqamətdə formalaşmasına töhfə verir.

Malik Mirzəyev
YAP Lerik rayon təşkilatının sədri