Azərbaycan–Çin strateji əməkdaşlığının yeni mərhələsi - ŞƏRH

2025-ci il aprelin 25-də Azərbaycan Respublikasının Prezidenti İlham Əliyev Çinin CGTN telekanalına verdiyi müsahibədə iki ölkə arasında münasibətlərin yeni dövrünə işıq saldı. Prezident Əliyev, xüsusilə, 2024-cü ilin iyul ayında Çin Xalq Respublikasının Prezidenti Si Cinpinq ilə keçirdiyi görüşün Azərbaycan–Çin əlaqələrinin inkişafında mühüm rol oynadığını vurğuladı. Bu görüş iki ölkə arasında əməkdaşlıq səviyyəsini daha yüksək mərhələyə qaldıraraq strateji tərəfdaşlıqda yeni imkanlar yaratdı.

Prezident İlham Əliyev, Si Cinpinq ilə keçirdiyi sonuncu görüşün Azərbaycan–Çin münasibətlərinin tarixi bir anı olduğunu qeyd etdi. Görüşün nəticəsində əldə olunan razılaşmalar və birgə bəyanatlar iki ölkə arasında siyasi, iqtisadi və mədəni sahələrdə əməkdaşlığın daha da möhkəmlənməsinə yol açdı. Azərbaycan, Çinlə olan əlaqələrini yalnız iqtisadiyyat və ticarətlə məhdudlaşdırmır, həm də beynəlxalq məsələlərdə qarşılıqlı dəstək və əməkdaşlığı davam etdirmək niyyətindədir. Bu görüşün nəticəsi olaraq, Azərbaycanla Çin arasında yeni bir dövr başlayıb ki, bu da hər iki ölkənin maraqlarına uyğun olaraq inkişaf etməyə davam edəcək.

Prezident İlham Əliyev müsahibəsində ölkələrinin bir-birinin milli maraqlarına hörmətlə yanaşdığını və hər iki tərəfin eyni zamanda strateji məqsədlərinə xidmət edən birgə tədbirlər həyata keçirdiyini bildirdi. Azərbaycan və Çin, beynəlxalq səviyyədə bir-birinin siyasi və iqtisadi maraqlarını müdafiə etməklə yanaşı, bir-birinin suverenliyinə və ərazi bütövlüyünə də qətiyyətlə dəstək verirlər. Bu həmrəylik, qarşılıqlı güvən və dostluq əlaqələrinin təməlini təşkil edir. Hər iki tərəf bu prinsipləri əsas tutaraq gələcəkdə birgə əməkdaşlığı daha da möhkəmləndirəcəyini bəyan etdi.

Azərbaycan, Çin Xalq Respublikasının bir sıra beynəlxalq təşəbbüslərində fəal iştirak edir. Prezident İlham Əliyev, həmçinin, Çinin inkişaf, təhlükəsizlik və sivilizasiyalar arasında dialoq sahələrində irəli sürdüyü təşəbbüsləri dəstəklədiyini qeyd etdi. Bu təşəbbüslər, Azərbaycanın qlobal məsələlərdə fəal iştirakını və beynəlxalq təhlükəsizliyə verdiyi töhfəni göstərir. Çinlə əməkdaşlıq, həm də müasir dövrün tələblərinə uyğun olaraq iqtisadiyyat, texnologiya və mədəniyyət sahələrindəki inkişafı daha da sürətləndirir. Azərbaycan, Çinin yeni beynəlxalq təşəbbüslərinə qoşulmaqla yalnız öz mövqeyini gücləndirmək deyil, eyni zamanda regiondakı təhlükəsizlik və sabitliyə də töhfə verir.

Prezident İlham Əliyevin CGTN telekanalına verdiyi müsahibə, Azərbaycan və Çin arasında strateji tərəfdaşlığın daha da dərinləşməsi, eləcə də iki ölkənin bir-birinin suverenliyini və ərazi bütövlüyünü dəstəkləyərək beynəlxalq əməkdaşlığı daha da inkişaf etdirməyə sadiq olduqlarını nümayiş etdirdi. Bu münasibətlər, yalnız siyasi əlaqələrdə deyil, həm də iqtisadiyyat, təhlükəsizlik və mədəniyyət sahələrində yeni mərhələyə qədəm qoyub.

Əli Hüseynov

Yeni Azərbaycan Partiyası Yasamal rayon təşkilatının fəalı