Şəmkirdə Üzeyir Hacıbəylinin 140 illik yubileyi münasibətilə möhtəşəm tədbir keçirilib

17 sentyabr 2025-ci il tarixdə Qazax-Tovuz Regional Mədəniyyət İdarəsinin tabeliyində fəaliyyət göstərən Şəmkir Mədəniyyət Sektorunun və Yeni Azərbaycan Partiyası Şəmkir rayon təşkilatının birgə təşkilatçılığı ilə dahi bəstəkar, Azərbaycan klassik musiqisinin banisi, korifey sənətkar Üzeyir Hacıbəylinin anadan olmasının 140 illik yubileyi münasibətilə Heydər Əliyev Mərkəzində tədbir təşkil edilib.

Tədbirdə Qazax-Tovuz Regional Mədəniyyət İdarəsinin rəhbər heyyəti, Şəmkir Rayon İcra Hakimiyyəti və Yeni Azərbaycan Partiyası Şəmkir rayon təşkilatının əməkdaşları, deputat köməkçiləri, mədəniyyət müəssisələrinin rəhbərləri, rayon ictimaiyyəti və musiqi məktəbində təhsil alan şagirdlərin valideynləri iştirak ediblər.

Tədbir zamanı Üzeyir bəyin zəngin irsi, milli musiqi mədəniyyətimizə bəxş etdiyi ölməz əsərlər, həmçinin onun şəxsiyyətinin Azərbaycan xalqının yaddaşında silinməz iz qoymuş rolu xüsusi vurğulanıb.

Musiqi məktəbinin şagird və müəllimlərinin ifasında təqdim olunan musiqi nömrələri tədbir iştirakçılarına unudulmaz anlar yaşadıb. Çıxışlar arasında təqdim olunan videoçarxlar və Heydər Əliyevin Üzeyir Hacıbəyli haqqında dərin məhəbbətlə söylədiyi fikirlər tədbirə xüsusi məna qatıb.

Tədbirdə "Leyli və Məcnun" operasından "Şəbi-hicran" xoru, müəllimlərdən ibarət xor kollektivi tərəfindən "Arşın mal alan", "O olmasın, bu olsun" operattalarından musiqilər, məktəbin xalq çalğı orkestri tərəfindən "Arşın mal alan "operettasından müqəddimə səsləndirilib, həmçinin "Arşın mal alan " operettasından səhnəciklər nümayiş olunub.

18 sentyabr – Milli Musiqi Günü musiqisevərləri bir araya gətirərək, xalqımızın musiqi mədəniyyətinin əvəzsiz zirvələrindən biri olan Üzeyir Hacıbəyli irsini yaşatmaqdadır.