Sülh, enerji, diplomatiya: BMT-də verilən strateji mesajlar

2025-ci ilin sentyabrında BMT Baş Assambleyasının 80-ci sessiyasında Azərbaycan Respublikasının Prezidenti İlham Əliyevin çıxışı ölkənin beynəlxalq mövqeyini və diplomatik məqsədlərini aydın şəkildə ortaya qoydu.

Prezident İlham Əliyev çıxışında Azərbaycanın müstəqil və suveren siyasətini qoruyaraq, regionda sülhün, təhlükəsizliyin və iqtisadi tərəqqinin təmininə verdiyi önəmi vurğuladı. O, dünyada sülhün və təhlükəsizliyin qorunmasının vacibliyinə diqqət çəkərək, beynəlxalq əməkdaşlığın gücləndirilməsinin əhəmiyyətini qeyd etdi.

Dövlət başçısı Ermənistan-Azərbaycan münasibətlərində əldə olunmuş müsbət irəliləyişlərə toxunaraq bildirdi ki, regionda davamlı sülhün təmin olunması həm Azərbaycan, həm də qonşu ölkələr üçün strateji prioritetdir. Bu məqsədlə Azərbaycan BMT, ATƏT və digər beynəlxalq təşkilatlar çərçivəsində dialoq və əməkdaşlıq platformalarını dəstəkləyir, münaqişələrin sülh yolu ilə həllinə çalışır.

Azərbaycanın enerji siyasətinə də toxunan cənab Prezident İlham Əliyev, ölkənin regional və qlobal enerji bazarlarında sabitliyin təminatçısı kimi rolunu önə çəkdi. Azərbaycanın enerji resurslarının Avropanın enerji təhlükəsizliyindəki strateji əhəmiyyətini vurğuladı, eləcə də enerji şaxələndirməsi və beynəlxalq layihələrdə fəal iştirakını xüsusi qeyd etdi.

Ölkə başçısı Azərbaycanın qonşu dövlətlərlə dostluq və əməkdaşlıq münasibətlərinin inkişafına daim önəm verdiyini bildirərək, bunun regionda uzunmüddətli sabitliyin əsas şərtlərindən biri olduğunu qeyd etdi.

Çıxışda həmçinin Azərbaycanın insan hüquqları, gender bərabərliyi və sosial inkişaf sahəsində atdığı addımlar təqdim olundu. Prezident vurğuladı ki, Azərbaycan beynəlxalq standartlara uyğun olaraq inklüziv və davamlı inkişafı təşviq edir və bu prosesdə beynəlxalq ictimaiyyətə töhfə verir.

Prezident İlham Əliyev Azərbaycanın beynəlxalq təşkilatlarda fəallığının artmasını və diplomatik əlaqələrin genişlənməsini ölkənin xarici siyasətinin mühüm istiqaməti kimi qiymətləndirdi. O, BMT-nin rolunu və beynəlxalq hüququn aliliyinin qorunmasını qlobal çağırışlara cavab verə biləcək əsas platforma kimi dəyərləndirdi.

Sahib Şükürov

YAP Göyçay rayon təşkilatının sədri