Qubadlıya öz sahibləri qayıdıb - ŞƏRH

Qubadlı rayonu Azərbaycanın ən füsunkar və təbii gözəlliklərlə zəngin bölgələrindən biridir. Bu diyar uzun illər işğal altında qaldığı üçün doğma el-obasından didərgin düşmüş minlərlə qubadlılı illərlə vətən həsrəti ilə yaşayıb. Nəhayət, 2020-ci ildə Vətən müharibəsində qazanılan böyük Qələbə nəticəsində Qubadlı azad olundu və torpaqlarımıza yenidən Azərbaycan bayrağı sancıldı. Bu tarixi hadisə təkcə Qubadlının deyil, bütün Azərbaycanın qürur mənbəyinə çevrildi. Qubadlının azad edilməsindən sonra dövlət tərəfindən genişmiqyaslı bərpa və yenidənqurma işlərinə start verildi. Dağıdılmış kəndlər bərpa olunur, yollar, körpülər, məktəblər, xəstəxanalar və digər infrastruktur obyektləri yenidən inşa edilir. Artıq Qubadlıda “Ağıllı kənd” layihələri həyata keçirilir, müasir standartlara cavab verən yaşayış evləri tikilir. Dövlət başçısının xüsusi diqqəti nəticəsində bu torpaqlara həyat yenidən qayıdır. Ən sevindirici hadisə isə odur ki, uzun illər didərgin düşən qubadlılılar doğma yurdlarına qayıtmağa başlayıblar. Onlar doğma kəndlərini yenidən qurmaq, torpaqlarında yaşamaq və işləmək əzmi ilə doludurlar. Qubadlının hər bir qarışı indi sevinc, ümid və həyat nəfəsi ilə doludur. Bu gün Qubadlı təkcə azad bir torpaq deyil, həm də dirçəlişin, birliyin və milli iradənin rəmzidir. Qubadlıya qayıdan hər bir insan torpağa can verir, o torpaq isə öz sahiblərini bağrına basaraq yeni bir həyatın başlanğıcını müjdələyir. Qubadlı indi yenidən doğulur, öz keçmişinə, mədəniyyətinə və gələcəyinə qovuşur. Doğma Qubadlıya qayıdan hər bir azərbaycanlı üçün bu torpağın hər daşı, hər ağacı bir xatirədir. İndi bu xatirələr təkcə keçmişin izi deyil, həm də gələcəyin işığıdır. Qubadlıya öz sahibləri qayıdıb və bu qayıdış əbədi olacaq.

Nicat Quliyev
YAP Laçın rayon təşkilatının məsləhətçisi