"Minute Mirror": "Bakıdakı paradda iştirakımız üçtərəfli əlaqələri möhkəmləndirdi"

Pakistanın ingilisdilli gündəlik qəzeti "Minute Mirror" da Bakıdakı parad barədə məqalə dərc edib. Məqalədə deyilir: "Baş nazir Şehbaz Şərif Prezident İlham Əliyevin xüsusi dəvəti ilə Azərbaycanın paytaxtı Bakıda keçirilən Qələbə Günü şənliklərində iştirak edib. Mərasimdə Türkiyə Prezidenti Rəcəb Tayyib Ərdoğan və dost ölkələrin hərbi kontingentləri də iştirak edib. Tədbir Azərbaycan, Pakistan və Türkiyə arasında artan əlaqələri vurğulayan əhəmiyyətli bir diplomatik hadisə ilə yadda qalıb. Şənliklər zamanı hər üç ölkənin dövlət himnləri səsləndirilib. Pakistan Ordusunun xüsusi kontingenti də Pakistanın Azərbaycanla həmrəyliyini simvolizə edən Qələbə Günü paradında iştirak edib".

Məqalədə deyilir: "Prezident İlham Əliyev mərasimdə çıxış edərək Azərbaycanın Pakistan və Türkiyədən aldığı dəstəyi yüksək qiymətləndirib. O, hər iki ölkənin çətin anlarda göstərdiyi yardımın həmişə xatırlanacağını vurğulayıb. İlham Əliyev Baş nazir Şehbaz Şərifi və Prezident Ərdoğanı "qardaş" adlandırıb və onların iştirakından məmnunluğunu ifadə edib.

O, həmçinin paradda iştirak edən bütün xarici hərbi kontingentləri salamlayıb, regional əməkdaşlığın və dostluğun vacibliyini vurğulayıb. İlham Əliyev Baş nazir Şərifə Azərbaycanla həmrəylik göstərdiyinə görə təşəkkür edib və üç ölkə arasında əlaqələrin hər il daha da gücləndiyini bir daha vurğulayıb".

Məqalə Belə yekunlaşır: "Baş nazirin iştirakı Pakistanın Azərbaycanla sıx diplomatik və strateji münasibətləri qorumağa olan sadiqliyini əks etdirirdi. Həmçinin, Pakistanın regional sabitliyə dəstəyi və müttəfiqləri ilə ortaq inkişaf məqsədləri vurğulanırdı.Prezident İlham Əliyev çıxışını xalqına Qələbə Günü təbriklərini çatdırmaqla və Azərbaycanın Pakistan və Türkiyə ilə münasibətlərini dərinləşdirmək öhdəliyini bir daha təsdiqləməklə yekunlaşdırdı. Tədbir təntənəli əzəməti, hərbi qüruru və diplomatik əhəmiyyəti birləşdirərək, güclənən üçtərəfli tərəfdaşlığı nümayiş etdirdi".

Məqalənin linki:

https://minutemirror.com.pk/pm-shehbaz-sharif-joins-azerbaijan-victory-day-in-baku-459855/

Lalə Mehralı