Üçrəngli bayrağımız – Azərbaycan dövlətçiliyinin və müstəqilliyinin əbədi rəmzi

Azərbaycan xalqı üçün 9 Noyabr – Dövlət Bayrağı Günü yalnız təqvimdə bir tarix deyil, həm də milli qürur, dövlətçilik və müstəqillik təntənəsidir. Bu gün xalqımızın əsrlər boyu azadlıq uğrunda apardığı mübarizənin, milli birliyin və suverenliyinin rəmzidir.

Azərbaycan Respublikasının Dövlət Bayrağı ilk dəfə 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə təsdiq olunub. Bu üçrəngli bayraq azadlıq və milli kimliyimizin simvoluna çevrilərək, bu gün müstəqil Azərbaycan Respublikasının üzərində qürurla dalğalanır. Bayrağımızın mavi rəngi türklüyümüzü, qırmızı rəngi müasir inkişaf və tərəqqiyə sadiqliyimizi, yaşıl rəngi isə İslam mədəniyyətinə mənsubiyyətimizi ifadə edir. Bu üç rəngin vəhdəti Azərbaycan xalqının tarixi köklərini, milli mənsubiyyətini və gələcəyə inamını simvolizə edir. Ulu Öndər Heydər Əliyev Azərbaycan Xalq Cümhuriyyətinin bayrağını yenidən dövlət atributu kimi bərpa etməklə milli dövlətçilik düşüncəsini və azadlıq ideallarını dirçəltmiş oldu. Bu qərar müstəqil Azərbaycanın gələcək inkişafının ideoloji təməlini formalaşdırdı.

Müasir dövrdə Prezident İlham Əliyevin rəhbərliyi ilə Azərbaycan bayrağı dünya miqyasında daha da ucaldı. 44 günlük Vətən müharibəsində qazanılan möhtəşəm Qələbə nəticəsində üçrəngli bayrağımız işğaldan azad edilmiş torpaqlarımızda – Şuşada, Füzulidə, Cəbrayılda, Qubadlıda, Zəngilanda, Laçında və Xankəndidə qürurla dalğalanmağa başladı. Hər bir azərbaycanlı üçün bu mənzərə milli qürurun, xalq birliyinin və dövlətimizin gücünün təcəssümüdür.

Prezident İlham Əliyevin sözləri ilə desək: “Azərbaycan bayrağı bu gün müstəqil Azərbaycanın rəmzidir. Biz onu qoruyacaq, onu daim zirvələrdə dalğalandıracağıq.”

Bu gün üçrəngli bayraq altında birləşən xalqımız dövlətinə, ordusuna və Ali Baş Komandanına dərin sevgi və etimad hissi ilə yaşayır. 9 Noyabr – Dövlət Bayrağı Günü hər bir azərbaycanlıya xatırladır ki, müstəqilliyimizi qorumaq, milli dəyərlərimizi yaşatmaq və dövlətçiliyimizi daha da möhkəmləndirmək hər birimizin müqəddəs vətəndaşlıq borcudur.

Üçrəngli bayrağımız daim uca zirvələrdə dalğalansın!

Yaşasın müstəqil Azərbaycan!

Mansur QULİYEV

YAP Ağdam rayon təşkilatının sədri