Müasir Ağdam – böyük qayıdışın parlaq nümunəsi

Ağdamın azad olunması təkcə torpaq üzərində suverenliyin bərpası deyil, həm də Azərbaycanın yenidənqurma gücünün nümayişidir. 2020-ci il noyabrın 26-da Prezident İlham Əliyevin sərəncamı ilə “Ağdamın azad olunmasına görə” medalı təsis edildi və minlərlə əsgərimiz bu şərəfə layiq görüldü. 2023-cü il 31 iyul tarixli sərəncamla 20 noyabr tarixi “Ağdam şəhəri günü” kimi qeyd olunmağa başlandı.

Azərbaycan hökumətinin əsas məqsədi Ağdamın əvvəlki şöhrətini bərpa etmək, onu müasir sənaye və mədəniyyət mərkəzinə çevirməkdir. 2022-ci ildə “Ağdam şəhərinin 2040-cı ilədək inkişafına dair Baş Plan” təsdiqləndi. Bu plana əsasən, Ağdam gələcəkdə azad olunmuş ərazilərin ən böyük, ölkənin isə dördüncü ən iri şəhəri olacaq. Burada 100 minə yaxın insanın yaşaması planlaşdırılır. Şəhərdə müasir infrastruktur – yollar, parklar, məktəblər, xəstəxanalar, sənaye və xidmət sahələri yaradılır.

Bu inkişafın simvollarından biri 190 hektar sahədə fəaliyyət göstərən Ağdam Sənaye Parkıdır. Parkda 28 rezident şirkət fəaliyyət göstərir, 1000-ə yaxın iş yeri yaradılıb, 260 milyon manatdan çox investisiya yatırılıb. Həmçinin 2025-ci ildə açılışı olan Ağdam Dəmir Yolu və Avtovağzal Kompleksi bölgənin nəqliyyat əlaqələrini tam bərpa edib. Müasir gözləmə zalları, kitabxana, istirahət guşələri və elektromobil dayanacaqları ilə təchiz olunan bu kompleks bir nəqliyyat qovşağı kimi fəaliyyət göstərir.

Ağdam həm də Qarabağ mədəniyyətinin beşiyidir. 2025-ci ildə açılmış Ağdam Muğam Mərkəzi qədim muğam sənətinin bərpası və gənc nəsillərə ötürülməsi baxımından mühüm əhəmiyyət daşıyır. Burada 474 yerlik zal, sərgi salonu, dərs otaqları və amfiteatr yaradılıb.

Prezident İlham Əliyev və Birinci vitse-prezident Mehriban Əliyevanın azad olunmuş Ağdama çoxsaylı səfərləri şəhərin inkişafının canlı sübutudur. Hər səfər zamanı yeni obyektlərin təməli qoyulur, bərpa olunan kəndlər – Kəngərli, Xıdırlı, Sarıcalı, Qiyaslı, Eyvazxanbəyli və digərlərində həyat yenidən canlanır. 2025-ci ilin oktyabrına qədər artıq 825 ailə – 3318 nəfər öz doğma yurduna qayıdıb.

Bu gün Ağdamda müasir yaşayış kompleksləri, məktəblər, uşaq bağçaları, su anbarları, enerji və kommunikasiya xətləri yenidən qurulur. Qısa zamanda xarabalıqlardan doğan Ağdam Qarabağın mərkəzində yeni həyatın simvoluna çevrilmişdir. Bu dirçəliş Müzəffər Ali Baş Komandan İlham Əliyevin rəhbərliyi ilə həyata keçirilən Böyük Qayıdış proqramının parlaq təcəssümüdür.

Ağdamın işıqlı sabahı artıq uzaqda deyil – o, doğma torpağına qayıdan hər bir vətəndaşın, şəhərin hər bir küçəsində ucalan binanın, hər bir əkilən ağacın nəfəsində yaşayır. Ağdam dirçəlir, Azərbaycan isə daha da güclənir!

Rövşən Qasımov,

YAP Gədəbəy rayon təşkilatının məsləhətçisi