Sülhün düsturu - RAKURS

Makron və AB-dən yeni proqnoz

2026-2027-ci illərdə Ukraynaya dəstəyin səviyyəsini planlaşdırarkən Avropa Komissiyası hazırda öz proqnozlarında Rusiya-Ukrayna müharibəsinin 2026-cı ilin sonuna qədər bitə biləcəyini fərz edir. Fransa prezidenti Emmanuel Makron 2027-ci ilə qədər Ukraynada sülhün əldə olunacağına ümid edir.O, Rusiyaya təzyiqləri davam etdirməyə çağırıb. "Ümid edirəm ki, 2027-ci ilə qədər sülh əldə olunacaq. İnanıram ki, son aylar əsl dönüş nöqtəsinə çevrilmiş qərarlarla yadda qalıb", - Fransa prezidenti deyir.Makron hesab edir ki, Rusiyaya təzyiq göstərmək üçün Avropa İttifaqını ABŞ və onun əsas tərəfdaşları ilə birləşdirmək çox vacibdir. Fransa prezidenti Vaşinqtonun Rusiyanın neft-qaz şirkətləri “Rosneft” və “Lukoyl”a qarşı sanksiyalar tətbiq etmək qərarını “Rusiyanın hərbi əməliyyatlarının üçdə birindən çoxunu maliyyələşdirən Rusiyanın kölgə donanmasına qarşı fəaliyyətimizi gücləndirdiyimiz zaman öz bəhrəsini verməyə başlayacaq dönüş nöqtəsi” adlandırıb. “Ümumiyyətlə, mən inanıram ki, biz son həftələrdə təzyiq baxımından vəziyyəti dəyişmişik”, – Makron bildirib.Onun sözlərinə görə, tərəfdaşların sanksiyalar və kölgə donanması ilə mübarizə vasitəsilə etdikləri kimi, indi də təzyiqlər davam etdirilməlidir. Fransa prezidenti həmçinin ABŞ-la dialoq aparmağın və daha çox tərəfdaş cəlb etməyin vacibliyini vurğulayıb. Makron "bu sülhə nail olmaqda qərarlı olduğunu" söyləyib.
Avropa Komissiyasının proqnozu
Avropa Komissiyasının sədri Ursula fon der Leyenin noyabrın 17-də Aİ liderlərinə göndərdiyi məktuba əsasən, 2026 və 2027-ci illər üçün Ukraynaya maliyyə yardımı planlaşdırarkən, Avropa Komissiyası hazırda Rusiyanın Ukraynaya qarşı müharibəsinin 2026-cı ilin sonuna qədər başa çatacağını güman edir. 2026-2027-ci illərdə Ukrayna üçün maliyyələşdirmə variantlarının layihəsini hazırlayarkən Avropa Komissiyası Ukraynadakı müharibənin 2026-cı ilin sonuna qədər bitəcəyi ehtimalına əsaslanıb."Ukrayna üçün maliyyə çatışmazlığının miqyası əhəmiyyətlidir. Beynəlxalq Valyuta Fondunun ilkin proqnozlarına görə - müharibənin 2026-cı ilin sonuna qədər bitəcəyini fərz etsək və Aİ, üzv dövlətlər və beynəlxalq tərəfdaşların vəd etdiyi bütün dəstəyi nəzərə alsaq - Ukrayna hələ də yeni maliyyələşdirmə olmadan aradan qaldırıla bilməyəcək əhəmiyyətli çatışmazlıqlarla üzləşəcək", - AB lideri yazıb.O xatırladıb ki, 2025-ci ilin oktyabrında Avropa Şurası “Ukraynanın 2026-2027-ci illər üçün təcili maliyyə ehtiyaclarını, o cümlədən hərbi və müdafiə səylərini həll etmək” öhdəliyini götürüb. Avropa Komissiyasının sədri Ukraynaya maliyyə yardımının göstərilməsi üçün dörd əsas parametr müəyyən edib. Birincisi, ilk ödənişlər 2026-cı ilin ikinci rübünün əvvəlində ödənilməli olmaqla, maliyyələşdirmə sürətlə əldə edilməlidir. İkincisi, istənilən yeni maliyyə paketi Ukrayna üçün əlavə fiskal yük yaratmamasını təmin etməlidir. Üçüncüsü, maliyyələşdirmə Ukraynanın 2026-2027-ci illər üçün dəqiq maliyyə ehtiyacları ilə bağlı əhəmiyyətli qeyri-müəyyənlikləri qarşılamaq üçün kifayət qədər çevik olmalıdır. Dördüncüsü, Ukraynanın Aİ-nin beynəlxalq tərəfdaşları ilə maliyyələşdirmə yükünün ədalətli şəkildə bölüşdürülməsi təmin edilməlidir.
Rusiyaya qarşı yeni sanksiyalar
Floridadan Ağ Evə yola düşməzdən əvvəl ABŞ prezidenti Donald Tramp jurnalistlərə bildirib ki, respublikaçılar Rusiya ilə iş aparan istənilən ölkəyə qarşı sanksiyalar tətbiq edəcək qanun layihəsi üzərində işləyirlər. O qeyd edib ki, İran bu siyahıya daxil ola bilər. Respublikaçı Lindsi Qrem və Demokrat Riçard Blumentalın sponsorluğu ilə Rusiyaya qarşı ikinci dərəcəli sanksiyalar haqqında qanun layihəsi 2025-ci ilin yazında təqdim edilib. O, Rusiyadan neft, təbii qaz və ya uran alan ölkələrdən idxala 500% tarifləri nəzərdə tutur.Kreml rejiminin sözçüsü Dmitri Peskov artıq bəyan edib ki, Moskva qanun layihəsinin ABŞ-da irəliləyişini yaxından izləyəcək. O, həmçinin Kremldən son dərəcə mənfi reaksiya vəd edib.

V.VƏLİYEV