Ukrayna 60-90 gün ərzində prezident seçkiləri keçirə bilər FOTO

Ukrayna Prezidenti Volodimir Zelenski çərşənbə axşamı medianın suallarını cavablandıraraq, səsvermə təhlükəsizliyi təmin ediləcəyi təqdirdə, növbəti iki-üç ay ərzində ölkədə seçkilər keçirməyə hazır olduğunu bildirib. Zelenski seçkilərin keçirilməsinin Ukrayna xalqının qərarı olduğunu vurğulayıb.O, həmçinin Moskvanın oxşar addıma razılaşacağı təqdirdə Rusiya ilə "enerji atəşkəsi"nə hazır olduğunu təsdiqləyib. Zelenski İtaliyada jurnalistlərə bildirib ki, Kiyev çərşənbə günü sülh planının yenilənmiş versiyasını ABŞ-a təhvil verəcək.

O, seçki kampaniyasına şəxsən hazır olduğunu bildirib, lakin iki əsas şərti vurğulayıb: hərbi iştirak imkanı da daxil olmaqla səsvermə təhlükəsizliyi və hərbi vəziyyət dövründə seçkilərin qanuni keçirilməsi üçün zəruri olan qanunvericilik dəyişiklikləri.

Prezident bildirib ki, ABŞ və Avropa tərəfdaşlarından seçki prosesinin təhlükəsizliyini təmin etməyə kömək etmələrini istəyib.

Onun sözlərinə görə, belə bir dəstək ilə Ukrayna 60-90 gün ərzində seçkilər keçirə biləcək.

O, həmçinin parlament üzvlərinə müharibə dövründə seçkiləri tənzimləyən qanunvericiliyə düzəlişlər hazırlamağı tapşırıb. "Mən sabah Ukraynada olacağam, tərəfdaşlardan və parlament üzvlərindən təkliflər gözləyirəm və seçki məntəqələrinə getməyə hazıram", - deyə prezident əlavə edib.

Ukrayna qanunvericiliyinə görə, prezident seçkiləri də daxil olmaqla, seçkilər hərbi vəziyyət dövründə keçirilə bilməz.

Müharibə səbəbindən Ukraynada 2023-cü ilin oktyabrına təyin olunmuş Ali Rada seçkiləri, eləcə də 2024-cü ilin martında sülh dövründə keçiriləcək prezident seçkiləri keçirilməyib. Buna görə də Rusiya hakimiyyəti Zelenskinin "qanunsuz" olduğu iddiasını irəli sürür.

Prezident Donald Tramp dəfələrlə Ukraynada prezident seçkilərinin keçirilməsi məsələsini qaldırıb. Dekabrın əvvəlində "Politico"ya verdiyi müsahibədə o, hazırkı anı səsvermə üçün əlverişli hesab etdiyini bildirib. Onun sözlərinə görə, ukraynalılara seçim etmək imkanı verilməlidir və müharibə, qeyd etdiyi kimi, seçkilərdən imtina etmək üçün bir səbəb olmamalıdır, Meduza xəbər verir.

İlham