Tərəfdaşlığın yüksəlişi

Prezident İlham Əliyevin 8 dekabr 2025-ci ildə Slovakiyaya səfəri zamanı mətbuata verdiyi bəyanat iki ölkə arasındakı münasibətlərin yeni mərhələyə keçdiyini göstərdi və səfərin əsas məqamları müxtəlif strateji sahələrdə əməkdaşlığın dərinləşməsinə dair mesajlarla yadda qaldı. Prezident çıxışında ilk olaraq qeyd etdi ki, Slovakiya ilə müdafiə sənayesi sahəsində əməkdaşlıq imkanları genişdir və bu sahə gələcək perspektivlər baxımından böyük potensiala malikdir. Azərbaycanın müdafiə sənayesi son illərdə sürətlə inkişaf edib və istehsal gücünün modernləşdirilməsi, texnologiyaların yenilənməsi, habelə yüksək keyfiyyətli hərbi təchizat məhsullarının hazırlanması Slovakiya ilə bu istiqamətdə əməkdaşlığı daha da cazibədar edir. Sərhəd təhlükəsizliyi, hərbi-texniki əməkdaşlıq və qarşılıqlı təcrübə mübadiləsi kimi sahələr tərəflərin maraq dairəsindədir. Prezident İlham Əliyev bəyanatında həmçinin Slovakiyanın uğurlu inkişafını xüsusi vurğuladı və bu inkişafın Azərbaycanı böyük məmnuniyyətlə sevindirdiyini bildirdi. Slovakiya Avropanın modern və dinamik inkişaf edən ölkələrindən biri kimi sosial-iqtisadi sahədə ciddi nailiyyətlər əldə edib. Azərbaycanın bu ölkə ilə əməkdaşlığı yalnız iqtisadi maraqlara deyil, həm də humanitar və siyasi dəyərlərə əsaslanır. Prezident qeyd etdi ki, Slovakiyanın əldə etdiyi uğurlar regionda sabitliyin möhkəmlənməsinə xidmət edir və Azərbaycan üçün də etibarlı tərəfdaş imicini gücləndirir. Dövlət başçısı çıxışında Slovakiya və Azərbaycanın, sözün əsl mənasında, dost ölkələr və strateji tərəfdaşlar olduğunu xüsusi olaraq ifadə etdi. Bu strateji tərəfdaşlıq qarşılıqlı etimada, dəstəyə və oxşar beynəlxalq prioritetlərə söykənir. İki ölkə arasında əlaqələr energetika, nəqliyyat, mədəniyyət və siyasi dialoq sahələrində davamlı şəkildə genişlənir. Prezident İlham Əliyev bildirdi ki, bu münasibətlərin əsasında qarşılıqlı hörmət, suverenlik və ərazi bütövlüyünə dəstək prinsipləri dayanır və bu prinsiplər Azərbaycanın xarici siyasətinin də əsas sütunlarındandır. Energetika sahəsinə toxunan Prezident qeyd etdi ki, Azərbaycanın zəngin qaz yataqları ölkəyə bugün dünyanın bir çox ölkələrinə təbii qaz ixrac etmək imkanı yaradır. Enerji təhlükəsizliyi qlobal miqyasda getdikcə daha çox əhəmiyyət kəsb edir və Azərbaycan bu sahədə etibarlı tərəfdaş kimi tanınır. Cənub Qaz Dəhlizi və digər enerji layihələri Azərbaycanın regional və qlobal enerji xəritəsində əsas oyunçulardan biri olduğunu göstərir. Prezident vurğuladı ki, enerji ixracı Azərbaycan iqtisadiyyatının güclənməsinə, habelə müxtəlif ölkələrlə əməkdaşlıq formatlarının formalaşmasına öz müsbət təsirini göstərir. Azərbaycanın xarici siyasət prioritetlərinə toxunan Prezident İlham Əliyev qeyd etdi ki, ölkə bu prioritetləri çoxdan müəyyən edib və ardıcıl şəkildə həyata keçirir. Azərbaycanın xarici siyasəti müstəqillik dövründən bəri birmənalı olaraq balanslaşdırılmış, qarşılıqlı hörmətə əsaslanan və milli maraqları qoruyan xəttə söykənir. Regional sabitliyin təmin olunması, beynəlxalq arenada fəallığın artırılması, iqtisadi əməkdaşlıqların genişləndirilməsi bu siyasətin əsas istiqamətlərindəndir. Prezident bildirdi ki, ölkə həm regionda, həm də qlobal miqyasda əməkdaşlıq təşəbbüslərində aktiv iştirak edir və etibarlı tərəfdaş kimi mövqeyini möhkəmləndirir. Bəyanatın mühüm hissələrindən biri də gələcək illərdə nəqliyyat və bağlantılar sahəsində əlavə vəsait qoyuluşu məsələsi idi. Prezident İlham Əliyev bildirdi ki, Azərbaycan öz tranzit imkanlarını daha da genişləndirmək niyyətindədir. Coğrafi mövqeyinə görə böyük logistika potensialına malik olan ölkə Şərq-Qərb və Şimal-Cənub nəqliyyat dəhlizlərinin inkişafında əsas rol oynayır. Yeni infrastruktur layihələri, dəmir yolu və avtomobil yollarının genişləndirilməsi, liman imkanlarının artırılması Azərbaycanın regionun nəqliyyat mərkəzinə çevrilməsini sürətləndirəcək. Bu isə həm iqtisadi axınların artması, həm də beynəlxalq əməkdaşlığın güclənməsi deməkdir. Prezident məruzəsini enerji sahəsinin geniş potensialı barədə fikirlərlə tamamladı. Azərbaycanda kifayət qədər böyük enerji potensialının mövcudluğunu qeyd edən dövlət başçısı bildirdi ki, ölkənin həm neft-qaz ehtiyatları, həm də alternativ enerji mənbələri üzrə geniş imkanları var. Xüsusilə külək və günəş enerjisi sahəsində həyata keçirilən layihələr Azərbaycanın yaşıl enerji istiqamətində də fəal olduğunu göstərir. Bu potensial həm daxili enerji sabitliyi, həm də xarici tərəfdaşlarla səmərəli əməkdaşlıq üçün möhkəm baza formalaşdırır. Prezident İlham Əliyevin Slovakiya səfəri çərçivəsində mətbuata verdiyi bəyanat iki ölkə arasındakı çoxşaxəli əməkdaşlığın daha da dərinləşəcəyinin və qarşılıqlı münasibətlərin yeni inkişaf mərhələsinə qədəm qoyduğunun bariz göstəricisi oldu. Bu çıxış həm iqtisadi, həm siyasi, həm də strateji baxımdan müsbət perspektivləri ehtiva edir və Azərbaycan-Slovakiya münasibətlərinin gələcək inkişafı üçün ciddi stimul verir.

İlqar İlyasov
YAP Laçın rayon təşkilatının sədri