Şəmkirdə Ulu Öndər Heydər Əliyevin əziz xatirəsi anılıb

Şəmkir Rayon İcra Hakimiyyətinin başçısı Rəşad Tağıyev, hüquq-mühafizə orqanlarının, idarə və təşkilatların rəhbərləri, rayon ictimaiyyəti dahi şəxsiyyət Heydər Əliyevin Şəmkir şəhərinin mərkəzində ucaldılmış abidəsi önünə gül dəstələri düzüb, əziz xatirəsini dərin ehtiramla yad ediblər.

Daha sonra Ümummilli Liderin vəfatı günü ilə əlaqədar rayon ictimaiyyəti üçün ehsan süfrəsi açılıb.

Rayon İcra Hakimiyyətinin başçısı Rəşad Tağıyev bildirib ki, 12 dekabr Azərbaycan xalqı üçün yalnız anım günü deyil, müasir dövlətçiliyimizin memarı, milli ideologiyamızın formalaşmasında həlledici rol oynamış Ulu Öndər Heydər Əliyevin əziz xatirəsinə ehtiram günüdür. Heydər Əliyev böyük tarixi şəxsiyyətdir. Müstəqil Azərbaycanın qurucusu və onun banisidir.

İcra başçısı qeyd edib ki, Ümummilli Lider Heydər Əliyevin ölkəmizə rəhbərlik etdiyi bütün dövrlərdə Vətəni və xalqı qarşısında müstəsna xidmətləri, dövlət müstəqilliyinin qorunmasında və möhkəmləndirilməsində, Azərbaycan dövlətçiliyinin nailiyyətlərində əvəzsiz rolu və misilsiz fəaliyyəti xalqımız tərəfindən həmişə dərin minnətdarlıq hissi ilə yad edilir, Ulu Öndərin əziz xatirəsi daim uca tutulur.

Heydər Əliyev müstəqilliyini yeni bərpa edən dövlətin qarşılaşdığı ən ağır sınaqlar dövründə misilsiz iradə, siyasi çevik düşüncə və böyük dövlət xadimi qətiyyəti nümayiş etdirərək Azərbaycanı dağılmaq təhlükəsindən çıxardığını bildirən Rəşad Tağıyev vurğulayıb ki, Ümummilli Liderin formalaşdırdığı strateji kurs ölkəmizin sabitliyinin, inkişafının və qlobal nüfuzunun möhkəm təməlini qoydu: “Heydər Əliyev siyasətinin davamı və Azərbaycan uğurlu inkişafının nəticəsində Müzəffər Ali Baş Komandan İlham Əliyevin rəhbərliyi ilə Vətən müharibəsi və antiterror tədbirləri nəticəsində respublikamızın ərazi bütövlüyü və suverenliyi tam bərpa olundu. Ulu Öndər siyasətini uğurla davam etdirəm prezident İlham Əliyevin sərkərdəlik bacarığı sayəsində ölkəmiz, xalqımız bu gün öz müstəqillik tarixinin ən şərəfli dövrünü yaşayır”.

Rəşad Tağıyev sonda qeyd edib ki, Şəmkir rayonu da daim Ulu Öndərin diqqət və qayğısını hiss edib. Heydər Əliyevin Şəmkirə qayğısı öz bəhrəsini vermiş, Azərbaycanın bu qədim və tarixi bölgəsi ölkəmizin ən inkişaf etmiş bölgələrindən birinə çevrilib.

YAP Şəmkir rayon Təşkilatının sədri Fəxrəddin Vəliyevçıxış edərək Ulu Öndər Heydər Əliyevin Azərbaycanı güclü təməllər üzərində inkişaf etdirdiyini, dövlət maraqlarını daim qoruduğunu, milli həmrəyliyə nail olduğunu vurğulayıb. Bildirib ki, Ümummilli Lider bütün həyatını xalqımızın rifahının yüksəlməsinə, Azərbaycan xalqının dünyada nüfuzunun daha da artmasına, dövlətimizin güclənməsinə və qüdrətlənməsinə sərf edib.

Şəmkir Rayon İcra Hakimiyyəti başçısının Düyərli kənd inzibati ərazi dairəsi üzrə nümayəndəsi Aybəniz Nəsibova və digər natiqlər də çıxışlarında Ulu Öndər Heydər Əliyevin Azərbaycan xalqı qarşısındakı misilsiz xidmətlərindən bəhs ediliblər.

Diqqətə çatdırılıb ki, Ümummilli Lider fəaliyyətinin bütün mərhələlərində Azərbaycanın inkişafına, milli maraqlarının, dövlətçilik mənafelərinin qorunmasına, tarixi ənənələrin və milli-mənəvi dəyərlərin yaşadılmasına xidmət edən müstəsna işlər görmüşdür.