BDU-da “Qalib lider faktoru: Ölkəmizin dünyada artan nüfuzu və yeni reallıqlar” mövzusunda tədbir keçirilib - FOTOLAR

“Konstitusiya və Suverenlik İli” çərçivəsində YAP Yasamal rayon təşkilatı, Bakı Dövlət Universiteti və Bakı Dövlət Universitetinin Geologiya fakültəsinin birgə təşkilatçılığı ilə “Qalib lider faktoru: Ölkəmizin dünyada artan nüfuzu və yeni reallıqlar” mövzusunda tədbir keçirilib.

Tədbirdə YAP Yasamal rayon təşkilatının sədri Bəxtiyar Nəbiyev, Yeni Azərbaycan Partiyası İdarə Heyətinin üzvü, Azərbaycan Respublikası Milli Məclisinin Gənclər və idman komitəsinin sədri, millət vəkili Şahin İsmayılov, Azərbaycan Respublikası Milli Məclisinin deputatları Samir Vəliyev, Mahir Süleymanlı, Geologiya fakültəsinin dekanı Mamoy Mansurov, YAP Yasamal rayon “Z.Xəlilov küç.33” (BDU) ünvanı üzrə ərazi partiya təşkilatının sədri Zahid Cəfərov,Yeni Azərbaycan Partiyası Gənclər Birliyi üzvü, Geologiya fakültəsinin tədris işləri üzrə dekan müavini İlqar Quliyev, Geologiya fakültəsinin professor-müəllim heyəti və tələbələr iştirak edib.

Tədbirdə ilk öncə Azərbaycan Respublikasının Dövlət Himni səsləndirilib, Ümummilli Lider Heydər Əliyevin, torpaqlarımızın azadlığı və suverenliyi uğrunda canlarını fəda etmiş şəhidlərin xatirəsi bir dəqiqəlik sükutla anılıb.

Sonra “Qalib lider faktoru: Ölkəmizin dünyada artan nüfuzu və yeni reallıqlar” mövzusu ilə əlaqədar videoçarx nümayiş etdirilib.

Tədbiri giriş sözü ilə açan Yeni Azərbaycan Partiyası Gənclər Birliyi üzvü, Geologiya fakültəsinin tədris işləri üzrə dekan müavini İlqar Quliyev çıxışında ali təhsilin dövlətçilik ideyalarının təbliğində mühüm rolundan bəhs edib. O, qeyd edib ki, Konstitusiya və Suverenlik İli çərçivəsində keçirilən bu cür tədbirlər tələbələrin yalnız peşəkar mütəxəssis kimi deyil, eyni zamanda vətənpərvər, hüquqi və siyasi baxımdan məlumatlı vətəndaş kimi formalaşmasına xidmət edir. İlqar Quliyev Prezident İlham Əliyevin rəhbərliyi ilə həyata keçirilən təhsil islahatlarının ölkənin uzunmüddətli inkişaf strategiyasının əsas tərkib hissəsi olduğunu vurğulayıb. O, Geologiya fakültəsində tədrisin müasir tələblərə uyğun qurulduğunu, elmi biliklərlə yanaşı, milli-mənəvi dəyərlərin də tələbələrə aşılandığını bildirib. Dekan müavini belə tədbirlərin universitet mühitində ictimai-siyasi maarifləndirməni gücləndirdiyini və gənclərin ölkədə baş verən yeni reallıqları daha dərindən dərk etməsinə imkan yaratdığını qeyd edib.

Geologiya fakültəsinin dekanı Mamoy Mansurov Konstitusiya və Suverenlik İlinin ölkəmizin müasir tarixində xüsusi yerə malik olduğunu bildirib. Ulu Öndərin siyasi uzaqgörənliyi müasir Azərbaycan dövlətinin davamlı inkişafının təməlində dayanır. Onun rəhbərliyi ilə hüquqi sistemin institusionallaşması dövlət idarəçiliyinin səmərəliliyini təmin edən əsas şərtə çevrildi. Ulu Öndər Heydər Əliyev tərəfindən müəyyən edilən konstitusion prinsiplər bu gün ölkənin siyasi, iqtisadi və sosial həyatının dayanıqlı inkişafını təmin edir. Tədbir həmin tarixi irsin elmi şəkildə öyrənilməsi üçün mühüm zəmindir. Prezident İlham Əliyevin apardığı modern hüquqi islahatlar Ulu Öndərin müəyyən etdiyi strateji xəttin davamı kimi xüsusi əhəmiyyət kəsb edir. Bu islahatlar Azərbaycanı regionun ən güclü hüquqi dövlət modellərindən birinə çevirib. O, Prezident İlham Əliyevin rəhbərliyi ilə Azərbaycan dövlətinin müstəqilliyinin və suverenliyinin tam təmin edildiyini, ölkəmizin beynəlxalq nüfuzunun əhəmiyyətli dərəcədə artdığını vurğulayıb. Dekan universitetlərin və elmi müəssisələrin bu ideyaların gənc nəslə çatdırılmasında mühüm rol oynadığını qeyd edib.

Çıxış edən Yeni Azərbaycan Partiyası İdarə Heyətinin üzvü, Azərbaycan Respublikası Milli Məclisinin Gənclər və idman komitəsinin sədri, millət vəkili Şahin İsmayılov qeyd edib ki, qalib lider faktoru Azərbaycanın dövlətçilik tarixində Ulu Öndər Heydər Əliyevin yaratdığı möhkəm təməllər üzərində formalaşıb. Məhz onun qurucu siyasəti müstəqil Azərbaycanın gələcək inkişaf strategiyasını müəyyənləşdirdi. Bu siyasi kurs Prezident İlham Əliyev tərəfindən müasir çağırışlara uyğun şəkildə uğurla davam etdirilir. Nəticədə ölkəmizin beynəlxalq nüfuzu davamlı şəkildə artmaqdadır. Güclü liderlik modeli daxili sabitliklə xarici siyasət arasında sağlam tarazlıq yaradıb. Yeni reallıqlar fonunda Azərbaycan milli maraqlarını qətiyyətlə müdafiə edən dövlət kimi çıxış edir. Əldə edilən Zəfərlər bu siyasətin real nəticəsidir. Hərbi-siyasi uğurlar regionda güc balansını köklü şəkildə dəyişib. Azərbaycan artıq regional deyil, qlobal miqyasda söz sahibi olan aktora çevrilib. Enerji və nəqliyyat layihələri bu mövqeyi daha da möhkəmləndirir. Xalq-lider birliyi dövlət siyasətinə güclü ictimai dəstək yaradır.

Çıxış edən YAP Yasamal rayon təşkilatının sədri Bəxtiyar Nəbiyev bildirib ki, ölkəmizin artan beynəlxalq nüfuzu Ulu Öndər Heydər Əliyevin əsasını qoyduğu müstəqil dövlətçilik siyasətinin məntiqi nəticəsidir. Onun formalaşdırdığı güclü idarəetmə modeli müasir Azərbaycanın dayanıqlı inkişafını təmin etdi. Prezident İlham Əliyev bu siyasi xətti yeni reallıqlara uyğun şəkildə zənginləşdirib. Xüsusilə əldə olunan Zəfərlər dövlətin gücünü və siyasi iradəsini nümayiş etdirdi. Bu Zəfərlər beynəlxalq hüquqa əsaslanan haqlı mövqeyimizin təsdiqinə çevrildi. Yeni geosiyasi şəraitdə Azərbaycan təşəbbüskar mövqe tutur. Xarici siyasətdə prinsipiallıq ölkəmizə etibarlı tərəfdaş imici qazandırıb. Enerji təhlükəsizliyinə verdiyimiz töhfələr qlobal əhəmiyyət daşıyır. Qalib lider faktoru milli maraqların qorunmasında həlledici rol oynayır. Daxili sabitlik iqtisadi və siyasi gücü artırır. Xalqın dövlətə inamı daha da möhkəmlənir. Nəticədə Azərbaycan yeni dünya düzənində mövqeyini inamla gücləndirir.

Azərbaycan Respublikası Milli Məclisinin deputatı Samir Vəliyev çıxış edərək qeyd edib ki, qalib lider faktoru müasir Azərbaycanın uğurlarının əsas sütunlarından biridir. Bu faktorun ideoloji və siyasi təməli Ulu Öndər Heydər Əliyev tərəfindən formalaşdırılıb. Onun qurucu fəaliyyəti güclü, müstəqil və davamlı dövlət modelini ortaya qoydu. Prezident İlham Əliyev həmin modeli müasir dövrün tələblərinə uyğun inkişaf etdirib. Əldə edilən tarixi Zəfərlər bu siyasətin zirvə nöqtəsidir. Zəfər nəticəsində ölkəmizin beynəlxalq mövqeyi əhəmiyyətli dərəcədə möhkəmləndi. Yeni reallıqlar Azərbaycanın regionda əsas güc mərkəzinə çevrildiyini göstərir. Diplomatik uğurlar hərbi-siyasi qələbələrlə vəhdət təşkil edir. Dövlətin qətiyyətli mövqeyi beynəlxalq arenada hörmət doğurur. İqtisadi potensial siyasi təsir imkanlarını genişləndirir. Bu birlik Azərbaycanın gələcək inkişafını təmin edir.

Çıxış edən Azərbaycan Respublikası Milli Məclisinin deputatı Mahir Süleymanlı bildirib ki, müasir Azərbaycan dövlətinin uğurlarının başlanğıcı Ulu Öndər Heydər Əliyevin tarixi xilaskarlıq missiyası ilə bağlıdır. Onun yaratdığı siyasi sabitlik inkişaf üçün möhkəm zəmin formalaşdırdı. Prezident İlham Əliyev bu irsi qalib lider modeli ilə yeni mərhələyə daşıdı. Məhz bu davamlılıq ölkəmizin əldə etdiyi Zəfərləri mümkün etdi. Zəfərlər Azərbaycanın hərbi, siyasi və diplomatik gücünü nümayiş etdirdi. Yeni reallıqlar regionda tamamilə fərqli siyasi mənzərə yaratdı. Azərbaycan bu proseslərin mərkəzində dayanır. Xarici siyasətdə müstəqillik və prinsipiallıq əsas xətt kimi qorunur. Enerji və nəqliyyat layihələri strateji əhəmiyyət daşıyır. Qalib lider faktorunun yaratdığı inam beynəlxalq əməkdaşlığı gücləndirir. Daxili sabitlik sosial rifahın artmasına xidmət edir.

Tədbirdə çıxış edən BDU Geologiya fakültəsinin Faydalı qazıntılar kafedrasının müdiri Vasif Babazadə Azərbaycanın təbii ehtiyatlarının səmərəli idarə olunmasının milli suverenliyin iqtisadi əsaslarını möhkəmləndirdiyini bildirib. Akademik elmin, xüsusilə geologiya sahəsinin ölkənin strateji inkişaf planlarında mühüm yer tutduğunu vurğulayıb. Bu cür tədbirlərin Konstitusiya və Suverenlik İli çərçivəsində ideoloji maarifləndirmə işinin gücləndirilməsinə, dövlətçilik dəyərlərinin təbliğinə və universitet–ictimaiyyət əlaqələrinin möhkəmləndirilməsinə mühüm töhfə verdiyi qeyd olunub. Qeyd olunub ki, Ulu Öndər Heydər Əliyev Azərbaycan dövlətçiliyinin siyasi və ideoloji sütunlarını müəyyənləşdirərək ölkənin gələcək inkişaf yolunu dəqiq formalaşdırdı. O, ağır tarixi şəraitdə xalqı parçalanmaq təhlükəsindən xilas edən xilaskar lider kimi yaddaşlara həkk olundu. Ulu Öndər milli həmrəyliyi gücləndirmək üçün ardıcıl və prinsipial addımlar atdı. Bu addımlar sonrakı dövr üçün də dövlət idarəçiliyində etibarlı yol xəritəsinə çevrildi. Prezident İlham Əliyev bu siyasi irsin davamçısı kimi ölkəni yeni zirvələrə yüksəltdi. Onun həyata keçirdiyi nəhəng iqtisadi, diplomatik və hərbi islahatlar Azərbaycanın gücünü dünya miqyasında daha da artırdı.

Sonda çıxış edən YAP Yasamal rayon “Z.Xəlilov küç.33” (BDU) ünvanı üzrə ərazi partiya təşkilatının sədri Zahid Cəfərov qeyd edib ki, qalib lider faktoru Azərbaycanın son onilliklərdə keçdiyi uğurlu yolun əsas izahıdır. Bu yolun ideoloji əsası Ulu Öndər Heydər Əliyevin qurucu siyasəti ilə müəyyənləşdirilib. Onun müəyyən etdiyi strateji kurs bu gün də aktuallığını qoruyur. Prezident İlham Əliyev həmin kursu Qələbələr və Zəfərlərlə zənginləşdirib. Əldə olunan Zəfərlər milli qürur və dövlət gücünün rəmzinə çevrilib. Bu uğurlar Azərbaycanın beynəlxalq mövqeyini köklü şəkildə dəyişib. Yeni reallıqlar ölkəmizin regional liderliyini təsdiqləyir. Diplomatik müstəvidə əldə olunan nailiyyətlər hərbi-siyasi uğurlarla tamamlanır.Prezident İlham Əliyevin rəhbərliyi ilə aparılan dövlət siyasəti xalqın iradəsinə söykənir. Bu vəhdət davamlı inkişafın əsas təminatıdır. Nəticə etibarilə Azərbaycan güclü, qalib və nüfuzlu dövlət kimi dünya miqyasında özünə layiqli yer tapıb.

Çıxışlardan sonra “Konstitusiya və Suverenlik İli” çərçivəsində Partiyada ictimai-siyasi fəaliyyətinə görə bir qrup universitet əməkdaşına fəxri fərmanlar təqdim edilib.

Sonda xatirə şəkli çəkdirilib