Konstitusiya və Suverenlik İli: humanizmə əsaslanan dövlət siyasəti və amnistiya təşəbbüsü

Azərbaycan Respublikasında 2025-ci ilin “Konstitusiya və Suverenlik İli” elan edilməsi dövlətçilik tariximizdə mühüm ideoloji və siyasi mərhələnin göstəricisidir. Bu il çərçivəsində həyata keçirilən təşəbbüslər bir daha sübut edir ki, Azərbaycan dövləti öz inkişaf yolunu Konstitusiya prinsipləri, suverenlik anlayışı və ümumbəşəri humanizm dəyərləri üzərində qurur. Prezident İlham Əliyevin təşəbbüsü ilə irəli sürülən amnistiya aktı da məhz bu ideoloji xəttin bariz nümunəsidir.

Azərbaycan Konstitusiyası insan hüquq və azadlıqlarının qorunmasını dövlətin ali məqsədi kimi müəyyən edir. Hüquqi dövlət anlayışı yalnız qanunların sərt tətbiqi ilə deyil, eyni zamanda sosial ədalət, mərhəmət və humanizm prinsipləri ilə tamamlanmalıdır. Prezident İlham Əliyevin amnistiya təşəbbüsü Konstitusiyanın bu ruhunu praktik müstəvidə reallaşdıran mühüm addımdır. Dövlət başçısının bu qərarı hüququn humanist mahiyyətini ön plana çıxararaq cəmiyyətə etimad mesajı verir.

Amnistiya aktının geniş əhatə dairəsi xüsusi diqqətə layiqdir. Vətən müharibəsində və 2023-cü ilin sentyabrında həyata keçirilmiş antiterror əməliyyatlarında iştirak etmiş şəxslər, həmin əməliyyatlarda həlak olmuş və ya itkin düşmüş şəxslərin yaxın qohumları, mülki əhaliyə qarşı hərbi təxribatlar nəticəsində zərər çəkmiş şəxslər, qadınlar, yaşlılar və yetkinlik yaşına çatmayanlar bu humanist təşəbbüsün əsas benefisiarları sırasındadır. Bu yanaşma dövlətin sosial məsuliyyət anlayışını və milli həmrəyliyə verdiyi önəmi aydın şəkildə göstərir.

Müstəqil Azərbaycanın tarixində ən böyük amnistiya aktı kimi qiymətləndirilən bu təşəbbüsün 20 mindən çox şəxsi əhatə edəcəyi gözlənilir. Minlərlə məhkumun azadlığa buraxılması, bir çoxlarının cəzalarının azaldılması və cinayət məsuliyyətindən azad olunması cəmiyyətin sosial strukturuna müsbət təsir göstərir. Bu addım bir tərəfdən ictimai sabitliyi möhkəmləndirir, digər tərəfdən isə reabilitasiya və yenidən cəmiyyətə inteqrasiya prosesini stimullaşdırır.

Prezident İlham Əliyevin rəhbərliyi ilə həyata keçirilən bu siyasət təkcə hüquqi akt deyil, eyni zamanda dərin mənəvi və ideoloji məzmun daşıyır. Dövlət başçısının indiyədək 12 amnistiya və 71 əfv təşəbbüsü irəli sürməsi humanizmin Azərbaycan dövlət idarəçiliyinin ayrılmaz hissəsi olduğunu təsdiqləyir. Bu, təsadüfi qərar deyil, sistemli və ardıcıl dövlət siyasətidir.

“Konstitusiya və Suverenlik İli” çərçivəsində amnistiya təşəbbüsü bir daha göstərir ki, Azərbaycan güclü dövlətdir və bu güc yalnız hərbi və siyasi sahədə deyil, həm də mənəvi-əxlaqi dəyərlərə söykənir. Suveren dövlət olmaq, eyni zamanda öz vətəndaşına mərhəmət göstərmək, onun yenidən cəmiyyətə qazandırılmasına şərait yaratmaq deməkdir.

Nəticə etibarilə, Prezident İlham Əliyevin amnistiya təşəbbüsü hüquqi dövlət, sosial ədalət və humanizm anlayışlarının vəhdətini təşkil edir. Bu siyasət Azərbaycan cəmiyyətində etimadı möhkəmləndirir, milli birliyi gücləndirir və dövlət-vətəndaş münasibətlərini daha da sağlam əsaslar üzərində qurur.

Abbas Pənahov,

Yeni Azərbaycan Partiyası

Nəsimi rayon təşkilatının sədr müavini