Böyük əhəmiyyət daşıyan hadisələrdən biri də bizim Çinlə olan strateji tərəfdaşlığımızdır

Azərbaycan Respublikasının Prezidenti İlham Əliyevin yerli televiziya kanallarına verdiyi müsahibə ölkənin xarici siyasət prioritetlərini və qlobal əməkdaşlıq strategiyasını əhatə edən mühüm siyasi məzmunu ilə diqqət çəkir. Dövlət başçısının müsahibədə xüsusi vurğuladığı əsas məsələlərdən biri Azərbaycan ilə Çin Xalq Respublikası arasında formalaşmış strateji tərəfdaşlıq münasibətləridir.
Prezident İlham Əliyev qeyd edib ki, Azərbaycan–Çin əlaqələri qarşılıqlı hörmət, suverenliyin tanınması və daxili işlərə qarışmamaq prinsiplərinə əsaslanır. Bu münasibətlər beynəlxalq hüququn fundamental normalarına söykənir və tərəflər arasında etibarlı siyasi dialoqun mövcudluğunu təsdiqləyir. Azərbaycan “Vahid Çin” siyasətini dəstəklədiyi kimi, Çin də Azərbaycanın ərazi bütövlüyünü və suverenliyini ardıcıl şəkildə dəstəkləyir.
Müsahibədə iqtisadi əməkdaşlıq məsələlərinə də geniş yer ayrılıb. Prezident İlham Əliyev Çinin “Bir kəmər, bir yol” təşəbbüsü çərçivəsində Azərbaycanın mühüm nəqliyyat və logistika qovşağına çevrildiyini vurğulayıb. Xüsusilə Orta Dəhliz layihəsi Azərbaycan–Çin strateji tərəfdaşlığının praktik əsaslarını gücləndirən əsas istiqamətlərdən biri kimi dəyərləndirilib. Bu əməkdaşlıq regionda ticarət əlaqələrinin genişlənməsinə və iqtisadi təhlükəsizliyin möhkəmləndirilməsinə xidmət edir.
Dövlət başçısının müsahibəsində səsləndirilən fikirlər Azərbaycanın çoxvektorlu və balanslaşdırılmış xarici siyasət kursunun davamlılığını bir daha təsdiqləyir. Çinlə strateji tərəfdaşlıq Azərbaycanın beynəlxalq mövqelərini gücləndirir, qlobal miqyasda etibarlı tərəfdaş kimi nüfuzunu artırır və ölkənin regional əhəmiyyətini daha da yüksəldir.
Prezident İlham Əliyevin yerli televiziya kanallarına verdiyi müsahibə bir daha göstərir ki, Azərbaycan milli maraqlara əsaslanan müstəqil xarici siyasət yürüdür və qlobal proseslər fonunda strateji tərəfdaşlıqlara xüsusi önəm verir. Azərbaycan–Çin münasibətləri bu baxımdan ölkənin uzunmüddətli siyasi və iqtisadi inkişaf strategiyasının mühüm tərkib hissəsidir.

Lalə İskəndərova

YAP Qusar rayon təşkilatının fəal üzvü