Ermənistan dövləti su terroru həyata keçirirdi - ŞƏRH

Uzun illər ərzində Ermənistan dövləti Azərbaycan ərazilərinə qarşı yalnız hərbi və siyasi təzyiqlərlə kifayətlənməyərək, eyni zamanda ekoloji və humanitar xarakterli cinayətlər də həyata keçirmişdir. Bu cinayətlərdən biri də su resurslarından silah kimi istifadə edilməsi, yəni su terroru siyasətidir. Xüsusilə işğal dövründə Ermənistan tərəfindən transsərhəd su hövzələrinin məqsədli şəkildə idarə olunması Azərbaycan əhalisinin təhlükəsizliyinə, sağlamlığına və sosial rifahına ciddi zərbə vurmuşdur.

İşğal altında saxlanılan ərazilərdə yerləşən su anbarları və çaylar Ermənistan tərəfindən nəzarətə götürülərək Azərbaycana qarşı təzyiq alətinə çevrilmişdir. Sərsəng su anbarı bu siyasətin ən bariz nümunəsidir. Qış aylarında suyun normadan artıq buraxılması nəticəsində Tərtər, Bərdə, Ağdam və digər rayonlarda sel və daşqın təhlükəsi yaranmış, kənd təsərrüfatı sahələri, yollar və yaşayış məntəqələri zərər görmüşdür. Yay aylarında isə əksinə, suyun qarşısı süni şəkildə kəsilərək minlərlə hektar əkin sahəsi susuzluqla üz-üzə qalmışdır. Bu cür məqsədli addımlar təkcə iqtisadi zərər deyil, eyni zamanda humanitar fəlakət riski yaratmışdır. Su çatışmazlığı kənd təsərrüfatının məhvinə, əhalinin gəlir imkanlarının azalmasına və regionda sosial gərginliyin artmasına səbəb olmuşdur. Ermənistanın bu siyasəti beynəlxalq humanitar hüququn, o cümlədən mülki əhalinin həyat şəraitinin məqsədli şəkildə pisləşdirilməsini qadağan edən normaların kobud şəkildə pozulmasıdır. Ermənistanın həyata keçirdiyi su terroru ekoloji tarazlığa da ağır zərbə vurmuşdur. Çayların təbii axınının pozulması torpaqların şoranlaşmasına, biomüxtəlifliyin azalmasına və uzunmüddətli ekoloji problemlərin yaranmasına gətirib çıxarmışdır. Bu təsirlər illər boyu davam edərək regionun təbii mühitinə dərin izlər buraxmışdır. 2020-ci ildə Azərbaycanın ərazi bütövlüyünün bərpa olunması ilə su resursları üzərində nəzarətin geri qaytarılması bu təhlükənin aradan qaldırılması baxımından mühüm dönüş nöqtəsi olmuşdur. Dövlət tərəfindən həyata keçirilən bərpa və yenidənqurma tədbirləri su təhlükəsizliyinin təmin olunmasına, kənd təsərrüfatının dirçəldilməsinə və əhalinin normal yaşayış şəraitinin bərpasına yönəlmişdir. Ermənistanın Azərbaycana qarşı həyata keçirdiyi su terroru siyasəti məqsədli, sistemli və uzunmüddətli zərər doğuran bir fəaliyyət olmuşdur. Bu siyasət təkcə bir ölkəyə deyil, bütövlükdə regionun təhlükəsizliyinə və ekoloji sabitliyinə təhdid yaratmışdır. Azərbaycanın bu sahədə gördüyü tədbirlər isə həm milli təhlükəsizliyin möhkəmləndirilməsinə, həm də regionda davamlı inkişafın təmin olunmasına xidmət edir.

Nicat Quliyev

YAP Laçın rayon təşkilatının məsləhətçisi