20 Yanvar – Xalqın azadlıq iradəsinin qanla yazılan tarixi - ŞƏRH

Azərbaycan xalqının milli yaddaşında 20 Yanvar faciəsi müstəqillik uğrunda mübarizənin ən ağrılı, lakin ən şərəfli səhifələrindən biri kimi yaşayır. 1990-cı ilin yanvarında sovet imperiyasının həyata keçirdiyi hərbi müdaxilə bir daha sübut etdi ki, totalitar rejimlər azadlıq istəyən xalqlar qarşısında aciz qalır və bu acizlik silah gücü ilə ört-basdır edilməyə çalışılır. Lakin tarix göstərdi ki, zorakılıq xalq iradəsini sındıra bilmir.

Yanvarın 19-dan 20-nə keçən gecə Bakı və ətraf ərazilərə yeridilən sovet ordusu dinc əhaliyə qarşı amansız cinayətlər törətdi. Küçələrdə, meydanlarda, hətta yaşayış məntəqələrində açılan atəş nəticəsində onlarla insan həlak oldu, yüzlərlə vətəndaş yaralandı. Bu hadisə təkcə Azərbaycan xalqına qarşı deyil, ümumilikdə insanlığa qarşı törədilmiş ağır cinayət idi. Həmin gecə hüquq, ədalət və humanizm anlayışları tapdalanmış oldu.

Faciənin miqyası nə qədər ağır olsa da, 20 Yanvar hadisələri xalqın ruhunu sarsıtmadı. Əksinə, bu qanlı hadisə milli şüurun formalaşmasında dönüş nöqtəsinə çevrildi. Azərbaycan cəmiyyəti artıq aydın dərk edirdi ki, azadlıq və müstəqillik yalnız milli birlik, qətiyyət və mübarizə yolu ilə mümkündür. Şəhidlərin dəfn mərasimi xalqın bir yumruq kimi birləşdiyini, azadlıq ideyasının artıq geri dönməz olduğunu bütün dünyaya nümayiş etdirdi.

Müstəqil Azərbaycan dövləti qurulduqdan sonra 20 Yanvar hadisələrinə dövlət səviyyəsində hüquqi-siyasi qiymət verilməsi milli yaddaşın bərpası baxımından mühüm mərhələ oldu. Ulu Öndər Heydər Əliyevin qətiyyətli mövqeyi nəticəsində bu faciə sovet rejiminin Azərbaycan xalqına qarşı törətdiyi cinayət kimi tanındı. Şəhidlərin xatirəsinin əbədiləşdirilməsi, onların ailələrinə göstərilən dövlət qayğısı tarixi ədalətin bərpasının bariz nümunəsidir.

Bu gün Prezident İlham Əliyevin rəhbərliyi ilə Azərbaycan Respublikası güclü dövlətə çevrilmişdir. Ölkəmizin beynəlxalq aləmdə artan nüfuzu, ərazi bütövlüyünün təmin olunması, iqtisadi və sosial inkişaf 20 Yanvar şəhidlərinin ideallarının reallaşmasının nəticəsidir. Dövlətin suverenliyi və təhlükəsizliyi naminə atılan hər bir addım həmin şəhidlərin ruhuna ehtiramın ifadəsidir.

20 Yanvar faciəsi gələcək nəsillər üçün böyük dərsdir. Bu tarix azadlığın hansı bədəllə qazanıldığını xatırladır və milli məsuliyyət hissini gücləndirir. Azərbaycan xalqı bu günü təkcə hüznlə deyil, eyni zamanda qürurla yad edir. Çünki 20 Yanvar göstərdi ki, xalqın azadlıq iradəsi heç bir güc qarşısında əyilmir.

Bu faciənin xatırlanması milli yaddaşın qorunması, tarixi həqiqətlərin gələcək nəsillərə ötürülməsi baxımından xüsusi əhəmiyyət daşıyır. 20 Yanvar şəhidlərinin əziz xatirəsi Azərbaycan xalqının qəlbində daim yaşayacaq və müstəqil dövlətimizin əbədiyaşarlığının rəmzi olaraq qalacaqdır.

Natiq Hüseynov,

Arıqıran kənd ərazi partiya təşkilatının sədri