Şəhidlərin xatirəsi uca tutulur, ailələrinə dövlət qayğısı göstərilir - ŞƏRH

Azərbaycan cəmiyyətində şəhidlik anlayışı hər zaman xüsusi məna daşıyıb. Vətən uğrunda canını fəda edən insanlar xalqın yaddaşında qəhrəman kimi yaşayır və onların xatirəsinə hörmət göstərilməsi milli-mənəvi dəyərlərimizin əsas tərkib hissəsidir. Bu dəyərlərin qorunması və yaşadılması isə dövlət siyasətində də öz əksini tapır. Prezident İlham Əliyevin şəhidlərin xatirəsinin uca tutulmasına və şəhid ailələrinin sosial məsələlərinin həllinə göstərdiyi diqqət bunun bariz nümunəsidir.

Dövlət başçısı dəfələrlə vurğulayıb ki, şəhid ailələrinə və qazilərə qayğı göstərmək dövlətin borcudur. Bu yanaşma illərdir ardıcıl şəkildə həyata keçirilən sosial proqramlar və qəbul edilən qərarlarla təsdiqlənir. Şəhidlərin adlarının əbədiləşdirilməsi məqsədilə ölkənin müxtəlif bölgələrində memorial komplekslərin yaradılması, abidələrin ucaldılması, məktəb, küçə və digər obyektlərə şəhid adlarının verilməsi bu siyasətin mühüm istiqamətlərindəndir. Bu addımlar təkcə keçmişə hörmət deyil, eyni zamanda gələcək nəsillər üçün vətənpərvərlik nümunəsidir.

Şəhid ailələrinin sosial müdafiəsinin gücləndirilməsi dövlət siyasətinin prioritet istiqamətlərindən biridir. Son illər bu sahədə görülən işlər sistemli və məqsədyönlü xarakter daşıyır. Şəhid ailələrinin mənzil şəraitinin yaxşılaşdırılması, sosial müavinət və təqaüdlərin artırılması, birdəfəlik maddi yardımların verilməsi onların sosial rifahının yüksəldilməsinə xidmət edir. Minlərlə şəhid ailəsinin yeni mənzillərlə təmin olunması bu sahədə atılan addımların real nəticəsidir.

Vətən müharibəsindən sonra şəhid ailələri və qazilərlə bağlı sosial proqramlar daha da genişləndirilib. Prezident İlham Əliyevin tapşırıqları əsasında reabilitasiya mərkəzləri yaradılıb, tibbi və psixoloji dəstək xidmətləri gücləndirilib. Müharibə iştirakçılarının məşğulluq imkanlarının artırılması, peşə hazırlığı və özünüməşğulluq proqramlarına cəlb olunması onların cəmiyyətə daha fəal inteqrasiyasına şərait yaradır. Bu yanaşma göstərir ki, dövlət vətəndaşına yalnız çətin günlərdə deyil, sonrakı dövrdə də dəstək verir.

Şəhid ailələrinə göstərilən diqqət yalnız sosial tədbirlərlə məhdudlaşmır. Onların cəmiyyətdə hörmətlə qarşılanması, problemlərinin dinlənilməsi və həllinə operativ yanaşılması bu siyasətin mənəvi tərəfini daha da gücləndirir. Rəsmi tədbirlərdə və anım mərasimlərində şəhid ailələrinin iştirakı onlara göstərilən ehtiramın ifadəsidir.

Bu siyasət cəmiyyətdə həmrəyliyin və birlik ruhunun möhkəmlənməsinə də mühüm töhfə verir. Vətəndaşlar əmindir ki, Vətən uğrunda canını fəda edənlərin ailələri heç vaxt unudulmur və daim dövlətin diqqət mərkəzindədir. Bu inam dövlətə olan etimadı gücləndirir, xalq–dövlət birliyini daha da möhkəmləndirir.

Prezident İlham Əliyevin şəhidlərin xatirəsinin uca tutulmasına və şəhid ailələrinin sosial məsələlərinin həllinə göstərdiyi xüsusi diqqət müasir Azərbaycan dövlətinin sosial və humanist mahiyyətini aydın şəkildə əks etdirir. Bu siyasət bir daha sübut edir ki, şəhidlərimizin xatirəsi daim yaşayır, onların ailələri isə güclü və qayğıkeş dövlətin himayəsindədir.

Leyla Quliyeva,

YAP fəalı