Konstitusiya və Suverenlik irsinə Naxçıvandan konseptual elmi töhfə FOTO

Naxçıvanda “Konstitusiya, Suverenlik və yeni siyasi konfiqurasiya: tarixi irs, müasir çağırışlar, gələcəyə baxış” adlı kitab nəşr edilib. Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Ceyhun Cəlilovun məsləhətçisi olduğu kitabın müəllifi Ali Məclisin sədr müavini, tarix üzrə fəlsəfə doktoru, dosent Arzu Abdullayevdir.

2025-ci il üçün elan olunan Konstitusiya və Suverenlik ilinə həsr edilən kitabın elmi redaktoru Azərbaycan Respublikası Milli Məclisi sədrinin müavini, hüquq elmləri üzrə fəlsəfə doktoru, professor Ziyafət Əsgərov, ön sözün müəllifi Azərbaycan Respublikası Milli Məclisi sədrinin müavini, AMEA-nın müxbir üzvü Musa Qasımlı, rəyçiləri isə AMEA Naxçıvan Bölməsinin sədri, akademik İsmayıl Hacıyev və AMEA Fəlsəfə və Sosiologiya İnstitutunun direktoru, fəlsəfə elmləri doktoru, professor İlham Məmmədzadədir.

Kitabda müəllif xalqımızın milli ruhunun gücündən yaranmış konstitusiya, suverenlik və siyasi sistem quruculuğu salnaməsindən bəhs edir. Həmçinin, Ulu Öndər Heydər Əliyev tərəfindən əsası qoyulan milli inkişaf strategiyasının real nəticələri olaraq, respublikamızda son 30 ildən artıq dövrdə həyata keçirilən düzgün iqtisadi-sosial, siyasi, hüquqi, xarici siyasətin təntənəsindən söhbət açılır. Müəllif Azərbaycanın çağdaş siyasi tarixinə yeni missiya ilə daxil olan cənab İlham Əliyevin milli dövlət quruculuğu və siyasi idarəçiliyinin şərəfli mərhələsinin konseptual elmi və tarixi şərhini verir.

Ön söz, giriş, üç fəsil və nəticədən ibarət olan kitabın "Azərbaycan Konstitusiyası: tarixi irsin, yeni çağırışların, strateji hədəflərin hüquqi tənzimlənməsi" adlı I fəslində milli dövlətçilik ənənələrimizdə Konstitusiya anlayışından, Azərbaycan Xalq Cümhuriyyətində hüquqi dövlət quruculuğundan, Naxçıvandan başlanan hüquqi dövlətçilik yolundan və Qurtuluş missiyasının hüquqi təntənəsindən ətraflı bəhs edilir. Müəllif bu proseslərin məntiqi ardıcıllığını tarixi kontekstdə əks etdirərək, müfəssəl təhlilini verir.

"Suverenlik: Azərbaycanın bütövlük təsdiqi" adlanan II fəsildə möhkəm təmələ əsaslanan qüdrətli suverenlik kursundan, Prezident İlham Əliyevin suverenlik prioritetlerindən, “Qarabağ Azərbaycandır və Nida”nın Zəfər çağırışlarından, suverenliyin “Dəmir Yumruq” təminatından və qüdrətli Suverenliyin mərhəmət gücündən söhbət açılır.

Sonuncu - "Yeni siyasi konfiqurasiya: dayanıqlı inkişafın və milli birliyin etibarlı təməli" adlanan III fəsildə isə müəllif yeni tarixi mərhələdə yeni siyasi konfiqurasiya, Heydər Əliyev siyasi arxitekturası, siyasi islahatlarda yeni prioritet - siyasi konfiqurasiyanın modernləşməsi, siyasi sistemin möhkəmlənməsi, tarixi ədalətin bərpası: Qərbi Azərbaycana Qayıdış, yeni siyasi konfiqurasiyanın antiazərbaycançı şəbəkəyə böyük zərbələri və IV Sənaye İnqilabı Dövrünün siyasi konsepsiyası və çağırışları kimi aktual mövzuları geniş araşdırır, bu tarixi-siyasi prosesin ilkin nəticələri barədə rəy bildirir.

“Konstitusiya, Suverenlik və yeni siyasi konfiqurasiya: tarixi irs, müasir çağırışlar, gələcəyə baxış” kitabı elm və təhsil ictimaiyyəti, tədqiqatçılar, politoloqlar, xüsusən də gənc nəsil üçün dəyərli vəsaitdir.