Ağdamda Azərbaycan Gəncləri Gününə həsr olunmuş tədbir keçirilib

2 fevral 2026-cı il tarixində Ağdam Rayon Heydər Əliyev Mərkəzində Ağdam Rayon İcra Hakimiyyətinin və Yeni Azərbaycan Partiyası Ağdam Rayon Təşkilatının birgə təşkilatçılığı ilə 2 fevral-Azərbaycan Gəncləri Gününə həsr olunmuş tədbir keçirilib. Tədbirdə Ağdam Rayon İcra Hakimiyyəti başçısının müavini-Ərazi təşkilat və ictimai-siyasi məsələlər şöbəsinin müdiri Xəqani Nəzərov, YAP Ağdam rayon təşkilatının sədri Mansur Quliyev, YAP fəalları, idarə, müəssisə və təşkilatların rəhbərləri, Ağdam rayonu üzrə Gənclər və İdman sektorunun nümayəndələri, qazilər və rayonun gənc fəalları iştirak ediblər. Tədbir iştirakçıları əvvəlcə Ulu öndər Heydər Əliyevin mərkəzi meydanda ucaldımış abidəsini ziyarət etmiş, önünə gül dəstələri düzərək ruhuna ehtiramlarını ifadə ediblər. Ağdam Rayon Heydər Əliyev Mərkəzində davam edən tədbirdə əvvəlcə gənc rəssamların əl işlərindən ibarət sərgiyə baxış keçirilib. Ulu Öndər Heydər Əliyevin və respublikamızın ərazi bütövlüyü uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilmişdir. Çıxış edən Ağdam Rayon İcra Hakimiyyəti başçısının müavini Xəqani Nəzərov, YAP Ağdam rayon təşkilatının sədri Mansur Quliyev və digər natiqlər Ulu Öndərin 1997-ci il fevralın 2-də imzaladığı Fərmana əsasən fevralın 2-si Azərbaycan Gəncləri Günü elan edilməsindən, Prezident İlham Əliyevin mətin iradəsi və böyük səyləri nəticəsində Azərbaycanın dünyanın qabaqcıl idman ölkələrindən birinə çevrilməsindən, 44 günlük Vətən müharibəsi zamanı rəşadətli Azərbaycan Ordusunun sıralarında Vətən uğrunda mətanətlə vuruşan qəhrəman gənclərimizin adlarını xalqımızın ən yeni tarixinə qızıl hərflərlə yazmalarından bəhs etmişlər. Tədbirin rəsmi hissəsinin sonunda rayonun ictimai-siyasi həyatında fərqlənən bir qrup gənc YAP Ağdam rayon təşkilatı tərəfindən fəxri fərmanla təltif edilmiş, YAP sıralarına yeni qoşulanlara üzvlük vəsiqələri təqdim olunmuşdur.

Ağdam Musiqi Kollecində davam edən tədbirin bədii hissəsində “Qarabağ” instrumental ansamblının müşayiəti ilə Respublikanın əməkdar artisti Fehruz Səxavətin, kollecin müəllim və tələbələrinin ifasında rəngarəng musiqi nömrələri iştirakçılara təqdim edilmişdir.