Şeyx Zayed irsi və Prezident İlham Əliyevin liderlik missiyası ŞƏRH

Şeyx Zayed bin Sultan Al Nəhyanın adı ilə təsis olunmuş beynəlxalq mükafat humanizm, sülh, tərəqqi və xalqlar arasında qarşılıqlı anlaşma ideyalarının ali təcəssümüdür. Şeyx Zayed bin Sultan Al Nəhyan tərəfindən formalaşdırılmış dövlətçilik konsepsiyası milli dəyərlərə sadiqliklə yanaşı, açıq dünyagörüşü, sosial ədalət və davamlı inkişaf prinsiplərinə əsaslanmışdır. Onun müəyyən etdiyi strateji xətt bu gün də aktuallığını qoruyur və beynəlxalq münasibətlər sistemində nümunəvi model kimi qəbul edilir.

Məhz belə nüfuzlu və yüksək mənəvi dəyərə malik mükafatın Azərbaycan Respublikasının Prezidenti Cənab İlham Əliyevə təqdim olunması böyük siyasi və mənəvi əhəmiyyət daşıyır. Bu təltif yalnız bir dövlət başçısının fəaliyyətinə verilən qiymət deyil, eyni zamanda müasir Azərbaycanın inkişaf modelinə, ölkəmizin beynəlxalq sülh və əməkdaşlığa verdiyi töhfəyə göstərilən yüksək etimadın ifadəsidir.

Cənab Prezident İlham Əliyevin rəhbərliyi ilə Azərbaycan Respublikası son illər ərzində sürətli və davamlı inkişaf yolu keçmişdir. Onun siyasi fəaliyyəti ardıcıllıq, prinsipiallıq və milli maraqlara sadiqlik kimi keyfiyyətlərlə xarakterizə olunur. Dövlətimizin başçısı tərəfindən müəyyən edilmiş strateji inkişaf kursu ölkənin iqtisadi gücünün artmasına, beynəlxalq mövqeyinin möhkəmlənməsinə və sosial rifahın yüksəlməsinə xidmət etmişdir.

Cənab Prezident İlham Əliyev güclü dövlət quruculuğunu prioritet istiqamət kimi müəyyən etmiş, siyasi sabitliyin qorunmasını və idarəetmədə səmərəliliyin artırılmasını təmin etmişdir. Onun rəhbərliyi ilə həyata keçirilən genişmiqyaslı infrastruktur layihələri, regionların sosial-iqtisadi inkişaf proqramları, enerji və nəqliyyat strategiyaları Azərbaycanı regionun aparıcı dövlətlərindən birinə çevirmişdir. Bu inkişaf modeli həm milli resursların səmərəli idarə olunmasına, həm də beynəlxalq tərəfdaşlıq imkanlarının genişləndirilməsinə əsaslanır. Onun təşəbbüsü ilə keçirilən beynəlxalq forumlar, humanitar tədbirlər və mədəniyyətlərarası dialoq platformaları Azərbaycanı sivilizasiyalararası körpüyə çevirmişdir. Multikulturalizm və tolerantlıq prinsiplərinin dövlət siyasəti səviyyəsində təşviqi Prezident İlham Əliyevin humanist və uzaqgörən baxışının nəticəsidir. Müxtəlif din və millətlərin nümayəndələrinin harmonik birgəyaşayışı Azərbaycanın sabitlik və qarşılıqlı hörmət məkanı kimi tanınmasını təmin etmişdir.

Azərbaycan ilə Birləşmiş Ərəb Əmirlikləri arasında münasibətlər qarşılıqlı hörmət və etimada əsaslanır. Bu əlaqələrin strateji səviyyəyə yüksəlməsində Cənab Prezident İlham Əliyevin rolu xüsusi əhəmiyyət kəsb edir. BƏƏ Prezidenti Şeyx Məhəmməd bin Zayed Al Nəhyan ilə qurulan yüksək səviyyəli dialoq siyasi, iqtisadi və humanitar əməkdaşlığın genişlənməsinə mühüm təkan vermişdir.

Energetika, investisiya, bərpa olunan enerji və digər sahələrdə həyata keçirilən birgə layihələr iki ölkə arasında möhkəm tərəfdaşlığın göstəricisidir. Bu əməkdaşlıq regional sabitliyin möhkəmləndirilməsinə və iqtisadi tərəqqinin təmin olunmasına xidmət edir. Cənab Prezident İlham Əliyevin diplomatik uzaqgörənliyi nəticəsində Azərbaycan beynəlxalq arenada etibarlı tərəfdaş kimi mövqeyini daha da gücləndirmişdir.

Şeyx Zayedin adını daşıyan nüfuzlu mükafata Cənab Prezident İlham Əliyevin layiq görülməsi onun çoxşaxəli və məqsədyönlü fəaliyyətinin beynəlxalq səviyyədə yüksək qiymətləndirilməsidir. Bu mükafat Prezident İlham Əliyevin qlobal liderlik keyfiyyətlərinin, humanist dəyərlərə sadiqliyinin və milli maraqlara əsaslanan siyasətinin təntənəsidir.

Müəllim qələmindən yazılan bu məqalədə qeyd etmək istəyirəm ki, Cənab Prezident İlham Əliyev müasir Azərbaycanın inkişaf memarı, güclü dövlətçilik ənənələrinin davamçısı və beynəlxalq miqyasda sülhə və əməkdaşlığa töhfə verən nüfuzlu liderdir. Onun fəaliyyəti Azərbaycanın gələcək inkişafı və beynəlxalq nüfuzunun daha da artması üçün möhkəm təməl yaradır.

Çinarə Məmmədova

YAP Naxçıvan şəhər təşkilatının fəalı