Qlobal barışığın Azərbaycan modeli ŞƏRH

4 fevral 2026-cı il tarixi Azərbaycanın diplomatiya tarixinə və qlobal sülh hərəkatına qızıl hərflərlə yazıldı. Birləşmiş Ərəb Əmirliklərinin paytaxtı Əbu-Dabi şəhərində, bəşəriyyətin ən ali dəyərlərini tərənnüm edən “Zayed İnsan Qardaşlığı Mükafatı”- nın təntənəli təqdim olunma mərasimi keçirildi. Tədbirin ən diqqətçəkən məqamı isə mükafata layiq görülən liderlərdən biri, Azərbaycan Respublikasının Prezidenti cənab İlham Əliyevin sülh, humanizm və yeni dünya nizamı haqqındakı konseptual çıxışı oldu.

Prezident İlham Əliyev çıxışına bu mükafatın məhz Əbu-Dabidə təqdim edilməsinin dərin simvolik mənasını vurğulamaqla başladı. Xatırladaq ki, Azərbaycan və Ermənistan arasında sülh danışıqlarının ən həlledici mərhələlərindən biri məhz burada, BƏƏ Prezidenti Şeyx Məhəmməd bin Zayed Əl Nəhyanın himayəsi ilə baş tutmuşdu. Dövlət başçısı qeyd etdi ki, Əbu-Dabi artıq sadəcə iqtisadi mərkəz deyil, həm də qlobal barışıq və dialoq platformasına çevrilib.

Prezident İlham Əliyevin Əbu-Dabi çıxışı Azərbaycanın beynəlxalq aləmdə “sülh carçısı” statusunu möhkəmləndirdi. Bu çıxış göstərdi ki, Azərbaycan artıq təkcə öz torpaqlarını azad edən qalib ölkə deyil, həm də qlobal miqyasda sülhün memarı və humanitar dəyərlərin qoruyucusudur.

Dövlət başçısı vurğuladı ki, sülh sadəcə müharibənin olmaması deyil, o, cəmiyyətlərin daxili transformasiyasıdır. Son altı ayın regionda tam sabitlik şəraitində keçməsini "tarixi bir presedent" adlandıran Prezident, Azərbaycanın bu sülhü həm döyüş meydanında, həm də masada qazandığını xatırlatdı.

Prezident çıxışında 2025-ci ilin iyul ayında Əbu-Dabidə keçirilən mühüm görüşlərə xüsusi yer ayırdı. O, BƏƏ Prezidenti Şeyx Məhəmməd bin Zayed Əl Nəhyanın vasitəçilik səylərini və sülh prosesinə verdiyi səmimi dəstəyi yüksək qiymətləndirdi. Bu, Azərbaycanın xarici siyasətində Körfəz ölkələri ilə qurulan strateji tərəfdaşlığın həm də qlobal humanitar məqsədlərə xidmət etdiyini göstərir.

Əbu-Dabi mərasimi göstərdi ki, Azərbaycan artıq sadəcə enerji resursları və hərbi qüdrəti ilə deyil, həm də bəşəri ideyaları və sülh təşəbbüsləri ilə dünya siyasətinə istiqamət verir. Prezident İlham Əliyevin "Zayed İnsan Qardaşlığı Mükafatı"nı alması, Azərbaycanın haqlı davasının və sülhpərvər siyasətinin ən ali səviyyədə təsdiqidir.

Əli Paşayev

YAP Tərtər rayon təşkilatının məsləhətçisi