NATO komandanlıq postu Avropaya təhvil veriləcək FOTO

ABŞ prezidenti Donald Trampın Avropa ölkələrinin öz təhlükəsizlikləri üçün daha çox məsuliyyət daşımaları tələbi fonunda ABŞ iki əsas NATO komandanlıq postunu Avropa zabitlərinə təhvil verəcək. Bununla bağlı Reuters məlumat yayıb. Nəşrin iddiasına görə, sözügedən postlar İtaliyanın Neapol şəhərində və Virciniya ştatının Norfolk şəhərindədir. Məsələyə NATO sözçüsü münasibət bildirərkən qeyd edib ki, müttəfiqlər NATO komandanlıq strukturunda yüksək vəzifəli zabitlər üçün yeni məsuliyyət bölgüsü barədə razılığa gəliblər ki, bu da NATO-nun ən yeni üzvləri də daxil olmaqla, Avropa müttəfiqlərinin Alyansın hərbi rəhbərliyində daha görkəmli rol oynayacağı deməkdir: “Bu qərar "gələcək rotasiyaların planlaşdırılması" ilə bağlıdır və daha ətraflı məlumat vaxtında veriləcək”.

Daha əvvəl Tramp administrasiyası uzun müddətdir ABŞ-ın dominantlıq etdiyi hərbi alyansı "Avropa liderliyindəki NATO"ya çevirməyə çağırmışdı. Agentliyin mənbəyinə görə, bu dəyişikliyin bir hissəsi olaraq, avropalı zabitlər hazırda Amerika admiralları tərəfindən idarə olunan NATO-nun Neapol Birgə Qüvvələr Komandanlığına və Norfolk Birgə Qüvvələr Komandanlığına rəhbərlik edəcəklər.

Eyni zamanda, Amerika Birləşmiş Ştatları iyerarxiyada bir qədər aşağıda yerləşən, lakin əhəmiyyətli əməliyyat məsuliyyəti daşıyan üç komandanlığa nəzarəti öz üzərinə götürəcək: Birgə Hava Komandanlığı, Birgə Dəniz Komandanlığı və Birgə Quru Komandanlığı.

İlham