Azərbaycan–ABŞ strateji tərəfdaşlığı - ŞƏRH

Azərbaycan Respublikasının Prezidenti İlham Əliyev mətbuata verdiyi geniş müsahibədə Azərbaycan ilə Amerika Birləşmiş Ştatları arasında münasibətlərin hazırkı vəziyyəti və perspektivləri barədə ətraflı danışıb. Dövlət başçısı iki ölkə arasında formalaşmış tərəfdaşlığın strateji xarakter daşıdığını vurğulayaraq bu münasibətlərin uzunmüddətli və möhkəm təməllər üzərində qurulduğunu bildirib.

Prezident İlham Əliyev çıxışında qeyd edib:“Bizim üçün dünyanın ən qüdrətli ölkəsi – Amerika Birləşmiş Ştatları ilə strateji tərəfdaş olmaq böyük şərəfdir.”

Dövlət başçısının sözlərinə görə, Azərbaycan ilə ABŞ arasında münasibətlər qarşılıqlı hörmətə, beynəlxalq hüququn norma və prinsiplərinə və milli maraqlara əsaslanır. O bildirib ki, iki ölkə arasında siyasi dialoq müntəzəm xarakter daşıyır və müxtəlif səviyyələrdə qarşılıqlı səfərlər, görüşlər və məsləhətləşmələr əməkdaşlığın dərinləşməsinə xidmət edir.

Prezident müsahibəsində enerji sahəsində əməkdaşlığın xüsusi əhəmiyyətini vurğulayıb. Azərbaycanın təşəbbüsü və iştirakı ilə reallaşdırılan beynəlxalq enerji layihələrinin Avropanın və ümumilikdə qlobal bazarın enerji təhlükəsizliyinə mühüm töhfə verdiyi qeyd olunub. ABŞ-ın da bu layihələrə siyasi dəstək göstərdiyi diqqətə çatdırılıb.

Bununla yanaşı, iqtisadi əməkdaşlığın genişləndirilməsi, investisiya mühitinin yaxşılaşdırılması və Amerika şirkətlərinin Azərbaycandakı fəaliyyəti də münasibətlərin mühüm istiqamətlərindən biri kimi göstərilib. Dövlət başçısı Azərbaycanın əlverişli biznes mühiti və sabit iqtisadi siyasəti ilə xarici investorlar üçün cəlbedici tərəfdaş olduğunu vurğulayıb.

Prezident İlham Əliyev regional təhlükəsizlik məsələlərinə də toxunaraq bildirib ki, Azərbaycan beynəlxalq terrorizmlə mübarizə, sülhməramlı missiyalarda iştirak və enerji marşrutlarının təhlükəsizliyinin təmin olunması sahəsində ABŞ ilə sıx əməkdaşlıq edib. Onun sözlərinə görə, bu əməkdaşlıq regionda sabitliyin möhkəmləndirilməsinə və etibarlı tərəfdaşlıq mühitinin formalaşmasına töhfə verir.

Dövlət başçısı qeyd edib ki, Azərbaycan müstəqil və balanslaşdırılmış xarici siyasət kursu həyata keçirir və bütün tərəfdaşlarla, o cümlədən ABŞ ilə əlaqələrin qarşılıqlı fayda əsasında inkişafına xüsusi önəm verir.

Müsahibədə vurğulanıb ki, Azərbaycan–ABŞ münasibətləri yeni çağırışlar və qlobal dəyişikliklər fonunda daha da inkişaf etmək potensialına malikdir. Mövcud siyasi iradə və qarşılıqlı maraqlar əməkdaşlığın daha geniş sahələri əhatə etməsinə imkan yaradır.

Sonda Prezident İlham Əliyev bir daha bəyan edib ki, Azərbaycan beynəlxalq tərəfdaşlıq münasibətlərini yüksək qiymətləndirir və ABŞ ilə strateji əməkdaşlığın möhkəmləndirilməsi ölkənin xarici siyasət prioritetlərindən biri olaraq qalır.

Nicat Əsədli

YAP Ordubad rayon təşkilatında məsləhətçi