Enerji siyasətində gələcəyə yönəlmiş yanaşma - ŞƏRH

Bu gün Azərbaycan özünü bütün əsas enerji mənbələri ilə tam təmin edən, enerji təhlükəsizliyini milli təhlükəsizliyin ayrılmaz tərkib hissəsinə çevirən ölkələr sırasında yer alır. Neft və təbii qaz ehtiyatlarının səmərəli istismarı, elektrik enerjisi istehsalının davamlı şəkildə artırılması və enerji infrastrukturunun müasir tələblərə uyğun yenilənməsi ölkənin enerji müstəqilliyini tam təmin etmişdir. Enerji sahəsində həyata keçirilən uzunmüddətli strategiya Azərbaycanın xarici təsirlərdən asılılığını minimuma endirmiş, daxili bazarın fasiləsiz və dayanıqlı enerji təminatını təmin etmişdir.

Son onilliklər ərzində enerji sektoruna yönəldilən investisiyalar istehsal güclərinin artmasına, yeni yataqların istismara verilməsinə və mövcud resurslardan daha səmərəli istifadə olunmasına şərait yaratmışdır. Elektrik stansiyalarının yenidən qurulması, yeni generasiya güclərinin yaradılması və regional enerji şəbəkələrinin inteqrasiyası nəticəsində ölkə üzrə enerji təminatında sabitlik əldə edilmişdir. Bu amil həm əhalinin sosial rifahına müsbət təsir göstərmiş, həm də sənaye və kənd təsərrüfatı sahələrinin inkişafını sürətləndirmişdir.

Enerji təminatında özünütəminetmə Azərbaycanın iqtisadi dayanıqlığının əsas sütunlarından biridir. İstehsal olunan enerjinin daxili tələbatı tam ödəməsi inflyasiya risklərini azaldır, istehsal xərclərini aşağı salır və iqtisadi planlaşdırmanı daha etibarlı edir. Eyni zamanda enerji sahəsində əldə edilən müstəqillik ölkənin siyasi qərarlarının sərbəstliyini artırır, beynəlxalq münasibətlərdə milli maraqların qorunmasına əlavə imkanlar yaradır. Bu baxımdan enerji sektoru təkcə iqtisadi deyil, həm də strateji əhəmiyyət daşıyan sahə kimi çıxış ed

Azərbaycan daxili enerji tələbatını tam təmin etməklə yanaşı, eyni zamanda enerji resurslarını beynəlxalq bazarlara uğurla çıxaran mühüm ixracatçı ölkədir. Neft və təbii qazın dünya bazarlarına çıxarılması ölkəyə valyuta axınını təmin edir, dövlət büdcəsinin gəlirlərini artırır və sosial-iqtisadi layihələrin maliyyələşdirilməsinə geniş imkanlar yaradır. Azərbaycan enerjisi bir çox ölkələrin enerji balansında mühüm yer tutur və bu amil ölkənin beynəlxalq nüfuzunu daha da möhkəmləndirir.

Enerji ixracı sahəsində həyata keçirilən layihələr regional və qlobal enerji təhlükəsizliyinə töhfə verir. Azərbaycan etibarlı tərəfdaş kimi tanınaraq uzunmüddətli əməkdaşlıq münasibətləri qurur və bu əməkdaşlıq siyasi dialoqun dərinləşməsinə də xidmət edir. Enerji resurslarının şaxələndirilmiş marşrutlarla ixracı ölkənin geostrateji əhəmiyyətini artırır, onu regionda mühüm enerji qovşağına çevirir. Bu mövqe Azərbaycanın beynəlxalq proseslərdə söz sahibi olmasına şərait yaradır.

Bununla yanaşı, Azərbaycan enerji siyasətində gələcəyə yönəlmiş yanaşmanı da ön planda saxlayır. Bərpa olunan enerji mənbələrinin inkişafı, “yaşıl enerji” layihələrinin həyata keçirilməsi və ekoloji dayanıqlılığın təmin edilməsi enerji strategiyasının mühüm istiqamətlərindən birinə çevrilmişdir. Xüsusilə günəş və külək enerjisi potensialından istifadə edilməsi həm ətraf mühitin qorunmasına, həm də enerji istehsalının diversifikasiyasına xidmət edir. Bu yanaşma Azərbaycanın qlobal iqlim çağırışlarına məsuliyyətli münasibətinin göstəricisidir.Azərbaycan bu gün enerji sahəsində tam təminatlı, ixrac yönümlü və strateji baxımdan güclü bir dövlət kimi çıxış edir. Daxili tələbatın ödənilməsi, dünya bazarlarına çıxış və alternativ enerji mənbələrinin inkişafı ölkənin enerji siyasətinin əsas sütunlarını təşkil edir. Bu siyasət yalnız bu günü deyil, gələcək nəsillərin rifahını da təmin etməyə yönəlmiş uzunmüddətli və düşünülmüş inkişaf modelidir.

Cəmilə Bağırova

YAP Ordubad rayon təşkilatının məsləhətçisi