İnnovasiya və idarəetmənin yeni dövrü - ŞƏRH

11 fevral 2026-cı il tarixdə Azərbaycan Respublikasının Prezidenti İlham Əliyevin sədrliyi ilə “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirə keçirilib. Müşavirədə süni intellekt texnologiyalarının tətbiqi dövlət siyasətinin əsas prioritet istiqamətlərindən biri kimi dəyərləndirilmişdir. Qlobal texnoloji transformasiya şəraitində rəqəmsal idarəetmə modellərinə keçid Azərbaycanın uzunmüddətli inkişaf strategiyasının mühüm tərkib hissəsidir.

Prezident çıxışında qeyd etmişdir: “Bu gün süni intellektin tətbiqi, data mərkəzlərinin yaradılması, rəqəmsallaşma ilə bağlı islahatlar faktiki olaraq ölkələrin gələcək inkişafını müəyyən edir. Azərbaycanda bu istiqamətdə müəyyən işlər görülüb. Ən önəmlisi gələcək fəaliyyətimizdə bu məsələni əsas prioritetlər siyahısına daxil etməyimizdir.” Bu yanaşma süni intellektin yalnız texnoloji yenilik deyil, həm də strateji inkişaf aləti kimi qiymətləndirildiyini göstərir. Müşavirədə vurğulanmışdır ki, süni intellekt dövlət informasiya resurslarının effektiv idarə olunmasına, məlumatların operativ emalına və analitik qərar qəbuletmə mexanizmlərinin təkmilləşdirilməsinə imkan yaradır. Böyük həcmli məlumatların təhlili sosial-iqtisadi proseslərin dəqiq qiymətləndirilməsinə, risklərin öncədən müəyyən edilməsinə və idarəetmədə çevikliyin artırılmasına şərait yaradır. Bu isə dövlət siyasətinin daha əsaslandırılmış və nəticəyönümlü həyata keçirilməsini təmin edir.

Süni intellektin tətbiqi vətəndaşlara göstərilən elektron xidmətlərin keyfiyyətinə də müsbət təsir göstərir. Avtomatlaşdırılmış sistemlər xidmətlərin icra müddətini azaldır, şəffaflığı gücləndirir və insan amilindən asılılığı minimuma endirir. Rəqəmsal platformalar üzərindən təqdim olunan ağıllı həllər dövlət-vətəndaş münasibətlərində yeni, daha müasir idarəetmə modelinin formalaşmasına zəmin yaradır.

Müşavirədə kibertəhlükəsizliyin təmin olunması da əsas məsələlərdən biri kimi qeyd edilmişdir. Süni intellekt əsaslı təhlükəsizlik mexanizmləri informasiya sistemlərinin qorunmasını gücləndirir, kiberhücumların qarşısının alınmasında effektiv vasitə kimi çıxış edir. Rəqəmsal arxitekturanın dayanıqlılığı ölkənin milli təhlükəsizliyinin mühüm komponenti hesab olunur. Eyni zamanda, süni intellektin geniş tətbiqi üçün insan kapitalının inkişafı xüsusi əhəmiyyət daşıyır. Müasir təhsil proqramlarının tətbiqi, innovasiya mühitinin gücləndirilməsi və yüksək texnologiyalar sahəsində ixtisaslı kadrların hazırlanması rəqəmsal transformasiyanın davamlılığını təmin edəcəkdir.

Beləliklə, müşavirədə süni intellekt Azərbaycanın yeni rəqəmsal inkişaf mərhələsinin əsas istiqamətlərindən biri kimi müəyyən edilmişdir. Bu sahədə həyata keçiriləcək sistemli və məqsədyönlü tədbirlər dövlət idarəçiliyinin effektivliyini artıracaq, iqtisadi inkişafı sürətləndirəcək və Azərbaycanın beynəlxalq rəqabət mövqeyini daha da möhkəmləndirəcəkdir.

Teymur Əsgərov

YAP Kəngərli rayon təşkilatının fəalı