Azərbaycan–Serbiya münasibətləri strateji tərəfdaşlıq səviyyəsinə yüksəlir ŞƏRH

Fevralın 15-də Azərbaycan Prezidenti İlham Əliyevin Serbiyaya rəsmi səfəri iki ölkə arasında münasibətlərin yeni mərhələyə qədəm qoyduğunu göstərdi. Belqrad səfəri sadəcə diplomatik protokol çərçivəsində baş tutmadı, həm də xalqlar arasında dostluğun möhkəmlənməsinə xidmət edən mühüm hadisə oldu. Liderlərin görüşü həm siyasi, həm iqtisadi, həm də mədəni sahələrdə əməkdaşlığın genişlənməsi üçün yeni imkanlar açdı.

Görüş zamanı enerji sahəsində əməkdaşlıq xüsusi diqqət mərkəzində idi. Azərbaycan qazının Avropaya ixracında Serbiyanın tranzit imkanlarının nəzərdən keçirilməsi, həmçinin yeni enerji layihələrinin reallaşdırılması müzakirə olundu. Bununla yanaşı, sənaye və kənd təsərrüfatı sahələrində birgə layihələrin həyata keçirilməsi, Serbiya şirkətlərinin Azərbaycanda fəaliyyət imkanları və Azərbaycan investorlarının Serbiya bazarına çıxışı məsələləri gündəmə gətirildi.

Mədəniyyət və təhsil sahəsində əməkdaşlıq da danışıqların mühüm istiqamətlərindən biri oldu. Universitetlərarası əlaqələrin gücləndirilməsi, tələbə mübadiləsi proqramlarının genişləndirilməsi və mədəni tədbirlərin təşkili iki ölkə xalqlarını daha da yaxınlaşdıracaq addımlar kimi dəyərləndirildi.
Serbiya Prezidenti Aleksandar Vuçiç Azərbaycanın Avropada etibarlı tərəfdaş olduğunu vurğuladı. İlham Əliyev isə iki ölkə arasında əməkdaşlığın davamlı xarakter daşıdığını və yeni layihələrin həyata keçirildiyini bildirdi. Onların “yaxın gələcəkdə yenidən görüşəcəyik” bəyanatı münasibətlərin ardıcıl və davamlı inkişafına işarə idi.
Belqrad səfəri Azərbaycan–Serbiya münasibətlərinin strateji tərəfdaşlıq səviyyəsinə yüksəldiyini bir daha təsdiqlədi. İmzalanan sənədlər və verilən bəyanatlar göstərdi ki, bu əməkdaşlıq yalnız iqtisadi maraqlara əsaslanmır, həm də xalqlar arasında dostluq və qarşılıqlı etimad üzərində qurulub. Liderlərin gələcəkdə yenidən görüşəcəklərinə dair sözləri isə bu münasibətlərin uzunmüddətli və davamlı olacağına inamı gücləndirdi.

Səbinə Əliyeva

Ordubad rayon YAP təşkilatının məsləhətçisi