Azərbaycan–Serbiya arasında davamlı əməkdaşlıq ŞƏRH

Fevralın 15-də Prezident İlham Əliyevin Serbiya Respublikasına səfəri çərçivəsində verdiyi bəyanat iki ölkə arasındakı münasibətlərin mahiyyətini və gələcək inkişaf trayektoriyasını aydın şəkildə ortaya qoyan mühüm siyasi hadisə kimi yadda qaldı. Dövlət başçısının çıxışında səsləndirilən fikirlər yalnız diplomatik protokol çərçivəsində verilmiş mesajlar deyil, eyni zamanda Azərbaycan–Serbiya əlaqələrinin fəlsəfəsini əks etdirən strateji yanaşmanın ifadəsi kimi diqqət çəkdi.

Prezident İlham Əliyevin “bizim təmaslarımız uzun illərdir davam edir” fikri Azərbaycan və Serbiya arasında münasibətlərin təsadüfi xarakter daşımadığını göstərən əsas məqamlardan biridir. Müasir beynəlxalq münasibətlər sistemində uzunmüddətli təmaslar dövlətlərarası əlaqələrin sabitliyini müəyyən edən mühüm indikator kimi çıxış edir. Bu baxımdan Azərbaycan–Serbiya münasibətləri zamanın sınağından çıxmış, qarşılıqlı hörmət və etimad prinsipləri üzərində formalaşmış tərəfdaşlıq modelini nümayiş etdirir.
Dövlət başçısının “biz bir-birimizi yaxından tanıyırıq” ifadəsi münasibətlərin yalnız rəsmi diplomatik çərçivə ilə məhdudlaşmadığını aydın şəkildə göstərir. Qarşılıqlı anlayış və açıq siyasi dialoq mühiti dövlətlərarası əməkdaşlığın dayanıqlığını təmin edən əsas amillərdən biri hesab olunur. Bu yanaşma Azərbaycan və Serbiya arasında formalaşmış əlaqələrin dərin siyasi etimad üzərində qurulduğunu nümayiş etdirir.
Prezident İlham Əliyevin bəyanatında xüsusi diqqət çəkən məqamlardan biri də tərəflər arasında aparılan dialoqun xarakteri ilə bağlı idi. “Səmimi söhbətlər aparırıq” fikri diplomatik münasibətlərin formal ritorika deyil, konstruktiv və açıq kommunikasiya əsasında inkişaf etdiyini göstərir. Müasir geosiyasi reallıqlar fonunda bu cür yanaşma dövlətlərarası münasibətlərin sabitliyini və davamlılığını təmin edən mühüm element kimi çıxış edir.
Bəyanatda səsləndirilən “dostluq münasibətlərimiz var” mesajı isə Azərbaycan–Serbiya əlaqələrinin siyasi məzmununu daha da aydınlaşdırır. Dostluq anlayışı burada təkcə diplomatik ifadə deyil, eyni zamanda siyasi, iqtisadi və humanitar əməkdaşlıq fonunda real məna kəsb edən strateji tərəfdaşlıq modelinin göstəricisidir. Bu münasibətlər qarşılıqlı maraqların uzlaşdırılması və uzunmüddətli əməkdaşlıq iradəsinə əsaslanır.
İki ölkə arasındakı münasibətlərin inkişafında imzalanmış sənədlər xüsusi əhəmiyyət daşıyır. Hüquqi baza rolunu oynayan bu razılaşmalar əməkdaşlığın sistemli və institusional xarakter daşıdığını nümayiş etdirir. Dövlətlərarası əlaqələrin dayanıqlığı, ilk növbədə, hüquqi mexanizmlərin mövcudluğu ilə şərtləndiyindən, imzalanmış sənədlər Azərbaycan–Serbiya münasibətlərinin strateji əsaslara söykəndiyini göstərən mühüm faktorlardan biridir.
Səfər çərçivəsində əldə olunmuş razılaşmalar yalnız mövcud əlaqələrin formal təsdiqi deyil, eyni zamanda gələcək əməkdaşlıq istiqamətlərinin müəyyənləşdirilməsi baxımından da mühüm əhəmiyyət kəsb edir.

Mələk Rzayeva

YAP Kəngərli rayon təşkilatının məsləhətçisi