"Azərbaycan beynəlxalq sülh proseslərində fəal tərəf kimi çıxış edir" - POLİTOLOQ DANIŞDI

"Sülh Şurası sammiti, beynəlxalq diplomatiyada mühüm hadisə kimi qiymətləndirilə bilər. Xüsusilə Azərbaycan Prezidenti İlham Əliyevin şəxsən dəvət olunması, ölkəmizin qlobal sülh təşəbbüslərində artan rolunun açıq göstəricisidir".Bu sözləri SİA-ya açıqlamasında politoloq Yusif Bağırzadə deyib.Onun sözlərinə görə, bu dəvət yalnız rəsmi protokolda bir yer deyil, bu həm də Azərbaycanın regiondakı strateji əhəmiyyətini və diplomatik nüfuzunu birbaşa vurğulayan siyasi hadisədir: "Prezident Əliyevin iştirakının fonunda Azərbaycan, artıq sadəcə regional aktor olmaqdan çıxaraq, beynəlxalq sülh proseslərinə töhfə verən tərəf kimi tanınmağa başlayır.Sammit zamanı Sülh Şurasının ilkin addımlarının atılması, o cümlədən iştirakçı ölkələrin maliyyə və humanitar öhdəliklərini açıqlaması, regionda əməkdaşlıq imkanlarını əhəmiyyətli dərəcədə artırır. Azərbaycan üçün bu həm siyasi, həm də iqtisadi perspektivlər yaradır. Belə ki, ölkəmiz, post-münaqişə idarəçiliyi və humanitar layihələr sahəsində təcrübəsini qlobal səviyyədə təqdim etməklə, həm etimad qazanır, həm də beynəlxalq təşəbbüslərdə aktiv tərəf kimi tanınır.Azərbaycanın iştirakının strateji əhəmiyyəti həm də regionun balanslaşdırılmış inkişaf perspektivində özünü göstərir. Sülh Şurasının əsas məqsədi gərginlikləri azaltmaq, humanitar yardımı koordinasiya etmək və dayanıqlı əməkdaşlıq mühitini təşviq etməkdir. Azərbaycanın təcrübəsi və mövqeyi, xüsusilə Cənubi Qafqaz və yaxın regionlarda sülhün möhkəmləndirilməsinə xidmət edə bilər. Eyni zamanda, bu təşəbbüsün uğurlu icrası, Azərbaycanın diplomatik manevr imkanlarını artıraraq, digər regional güc mərkəzləri ilə əməkdaşlığı genişləndirməyə imkan verir. Sammitin nəticələri göstərir ki, Azərbaycanın beynəlxalq nüfuzu, yalnız iqtisadi və enerji amilləri ilə ölçülmür; həm də sülh təşəbbüslərində fəal iştirak və konstruktiv rol oynamaqla güclənir. Bu baxımdan, Azərbaycan həm regional sabitlik üçün etibarlı tərəfdaş imici yaradır, həm də qlobal sülh platformalarında mövqeyini möhkəmləndirir. Bunun nəticəsi olaraq, ölkəmiz üçün yeni dialoq imkanları, investisiya və humanitar layihələrdə iştirak perspektivləri açılır.Bunları nəzərə alaraq deyə bilərik ki, Sülh Şurası sammiti çərçivəsində praktik addımlarının atılması və Azərbaycanın iştirakının önə çıxması, ölkəmizin beynəlxalq sülh təşəbbüslərində rolunu artırmaqla yanaşı, gələcək regional əməkdaşlıq üçün də strateji zəmin yaradır. Azərbaycan burada yalnız iştirakçı deyil, həm də təşəbbüskar və koordinasiya potensialına malik tərəf kimi ön plana çıxır, bu isə ölkənin həm diplomatik, həm də geosiyasi statusunu əhəmiyyətli dərəcədə gücləndirir".

Müəllif: Günel Fərzəliyeva