Qazaxda Xocalı soyqırımı qurbanlarının xatirəsi anılıb FOTOLAR

YAP Qazax rayon təşkilatı və Qazax rayon İcra Hakimiyyətinin birgə təşkilatçılığı ilə 24 fevral 2026 - cı il tarixdə Xocalı soyqırımının 34- cü ildönümünə həsr olunmuş “Xocalı soyqırımı müdrik Azərbaycan xalqının qan yaddaşıdır” mövzusunda tədbir keçirilib. Tədbir iştirakçıları tərəfindən Qazax şəhərinin mərkəzindəki Şəhidlər xiyabanı ziyarət edilib, abidə önünə tər güllər düzülüb, şəhidlərin ruhuna dualar oxunub. Tədbirdə Azərbaycan Respublikasının Dövlət Himni səsləndirilib. Ümummilli Lider Heydər Əliyevin və şəhidlərin əziz xatirəsi ehtiramla yad edilib.

YAP Qazax rayon təşkilatının sədri Anar Nəbiyev, Qazax Rayon İcra Hakimiyyətinin başçısı Rəcəb Babaşov, partiya fəalları Günel Bəxtiyarlı, Aytəkin Hüseynova, şəhid atası Qədir Əfəndiyev çıxış edərək 1992-ci il fevralın 25-dən 26-na keçən gecə Xocalıda erməni faşistləri tərəfindən törədilən soyqırımın Azərbaycan tarixinin ən dəhşətli səhifələrindən biri olduğunu və bunun bəşəriyyətə qarşı bir cinayət olduğunu bildiriblər. Natiqlər görünməmiş qəddarlıqla həyata keçirilən bu faciənin əsrlər boyu azərbaycanlılara qarşı yönəlmiş etnik təmizləmə və soyqırımı siyasətinin davamı və ən qanlı səhifəsi olduğunu, Xocalı faciəsinə ilk dəfə Ulu Öndər Heydər Əliyev tərəfindən siyasi - hüquqi qiymət verildiyini, məhz Dahi Rəhbərin təşəbbüsü ilə 1994-cü il fevralın 24-də Milli Məclis tərəfindən “Xocalı soyqırımı günü haqqında” qərarın qəbul edildiyini vurğulayıblar. Çıxış edənlər onu da qeyd ediblər ki, həmin faciədən 34 il ötməsinə, bu gün ürəyimizin ağrımasına, qəlbimizin göynəməsinə baxmayaraq, ancaq qürurluyuq. Bu gün hər birimiz, hər bir azərbaycanlı qalib xalqın qalib övladı kimi, müasir, müstəqil , suveren Azərbaycanın qazandığı qələbələrə, uğurlara görə, regionda və dünyada söz sahibi olduğuna görə, sözünün imzası qədər əhəmiyyətli olmasına görə qürur hissi keçirir və fəxr edirik. Əlbəttə ki, bütün bunlara görə biz Ulu Öndər Heydər Əliyevə, Möhtərəm Prezident İlham Əliyevə və müqəddəs şəhidlərə borcluyuq.

Tədbirin sonunda partiya veteranları şair Cavanşir Rüstəm və Kazım Kazımlı Xocalı soyqırımına və şəhidlərə ithaf etdikləri şeirlərini səsləndiriblər.