Şəhidlərin ruhuna ucalan əbədiyyət abidəsi ŞƏRH

İki il əvvəl təməli qoyulan Xocalı Soyqırımı Memorial Kompleksi bu gün xalqımızın böyük ehtiramı və dərin hüznü ilə açıldı. Bu kompleks yalnız daşdan və mərmərdən ibarət memarlıq əsəri deyil – o, tariximizin ağrı-acısını, xalqımızın yaddaşını və ədalətə olan sarsılmaz inamını özündə yaşadan müqəddəs məkandır.

1992-ci ilin fevralında baş verən Xocalı soyqırımı Azərbaycan xalqına qarşı həyata keçirilmiş ən ağır cinayətlərdən biri kimi tarixə düşüb. Dinc əhali – qadınlar, uşaqlar, qocalar xüsusi qəddarlıqla qətlə yetirildi, ailələr məhv edildi, şəhər yerlə-yeksan olundu. Bu faciə təkcə bir şəhərin deyil, bütöv bir xalqın taleyinə yazılmış qanlı səhifədir.

Memorial Kompleksin inşası şəhidlərimizin xatirəsinin əbədiləşdirilməsi ilə yanaşı, həm də tarixi həqiqətlərin gələcək nəsillərə ötürülməsi baxımından mühüm əhəmiyyət daşıyır. Burada yaradılan hər bir kompozisiya, hər bir rəmz Xocalıda yaşanan dəhşətləri və eyni zamanda xalqımızın sınmayan iradəsini ifadə edir. Bu məkan ziyarət yeri olmaqla bərabər, həm də ibrət və yaddaş ünvanıdır.

Bu gün memorialın açılışı Azərbaycanın güclü dövlət kimi öz tarixinə sahib çıxmasının, şəhidlərinin ruhuna sədaqətinin göstəricisidir. İşğaldan azad olunmuş torpaqlarda ucaldılan bu abidə həm də dirçəlişin, qayıdışın və milli qürurun rəmzidir. Xocalı artıq təkcə faciənin adı deyil, həm də ədalət uğrunda mübarizənin simvoludur.

Şəhidlərimizin əziz xatirəsi daim yaşayacaq. Xocalı soyqırımı heç vaxt unudulmayacaq, unutdurulmayacaq. Bu memorial isə əsrlər boyu xalqımızın yaddaşını qoruyan, gələcək nəsillərə həqiqəti çatdıran əbədi bir abidə kimi qalacaq.

Süleyman Tağıyev

YAP Sədərək rayon təşkilatının məsləhətçisi