Tarixi yaddaşın rəmzi - ŞƏRH

Xocalı soyqırımı Azərbaycan xalqının yaddaşında silinməz iz buraxmış ən faciəli hadisələrdən biridir. 1992-ci il fevralın 26-da Ermənistan silahlı qüvvələri tərəfindən Xocalı şəhərində törədilən qətliam nəticəsində yüzlərlə günahsız insan vəhşicəsinə qətlə yetirilmiş, şəhər yerlə-yeksan edilmişdir. Bu faciə təkcə Azərbaycan xalqına qarşı deyil, bütün bəşəriyyətə qarşı törədilmiş ağır cinayət kimi tarixə düşmüşdür. Xocalı qurbanlarının xatirəsinin əbədiləşdirilməsi məqsədilə yaradılan Xocalı Soyqırımı Memorial Kompleksinin açılışı bu baxımdan xüsusi əhəmiyyət daşıyır.

Prezident İlham Əliyev memorial kompleksin açılış mərasimində etdiyi çıxışında qeyd etmişdir ki, iki il əvvəl bu memorialın təməli qoyulmuş və bu gün artıq onun açılışı baş tutur. Dövlət başçısı vurğulamışdır ki, Xocalı soyqırımı Ermənistan dövləti və erməni faşistləri tərəfindən Azərbaycan xalqına qarşı törədilmiş qanlı hərbi cinayətdir. Həmin gecə 600-dən çox günahsız mülki insan, o cümlədən qadınlar və uşaqlar amansızlıqla qətlə yetirilmiş, yüzlərlə insan itkin düşmüşdür. Bu hadisə Azərbaycan xalqı üçün ən böyük faciələrdən biri kimi tarixə həkk olunmuşdur.

Prezident çıxışında həmçinin Xocalı həqiqətlərinin dünya ictimaiyyətinə çatdırılması istiqamətində görülən işlərdən bəhs etmişdir. O qeyd etmişdir ki, Azərbaycan dövləti, ictimai təşkilatlar və qeyri-hökumət qurumları bu faciənin tanıdılması üçün böyük səylər göstərmişdir. Bu istiqamətdə Heydər Əliyev Fondunun fəaliyyəti xüsusi əhəmiyyət daşıyır. Fondun təşəbbüsü ilə həyata keçirilən “Xocalıya ədalət!” beynəlxalq kampaniyası nəticəsində dünyanın müxtəlif ölkələrində tədbirlər keçirilmiş, kitablar və materiallar nəşr olunmuş və Xocalı həqiqətləri geniş auditoriyaya çatdırılmışdır. Bu səylər nəticəsində artıq bir sıra ölkələr Xocalı hadisələrini soyqırımı kimi tanımışdır.

Dövlət başçısı vurğulamışdır ki, Azərbaycan xalqı uzun illər ədalətin bərpa olunmasını gözləmişdir. 2020-ci ildə baş verən Vətən müharibəsi və Azərbaycanın qazandığı şanlı Zəfər bu ədalətin bərpasında mühüm rol oynamışdır. 44 günlük müharibə nəticəsində Azərbaycan öz torpaqlarını işğaldan azad etmiş və ərazi bütövlüyünü bərpa etmişdir. 2023-cü ildə keçirilən antiterror əməliyyatı isə ölkəmizin suverenliyinin tam təmin olunmasına gətirib çıxarmışdır. Bu hadisələr nəticəsində Xocalı da azad edilmiş və bu gün artıq memorial kompleksi məhz Xocalı torpağında açılmışdır.

Prezident İlham Əliyev çıxışında qeyd etmişdir ki, bu memorial kompleksi xalqımızın tarixi yaddaşının və əyilməz ruhunun rəmzidir. Uzun illər doğma yurdlarından didərgin düşmüş Xocalı sakinləri böyük iradə və səbir göstərmiş, dövlətə və ədalətə olan inamlarını qoruyub saxlamışlar. Bu gün onların doğma torpaqlarına qayıtması və Xocalıda belə bir memorialın açılması ədalətin təntənəsi kimi qiymətləndirilir.

Sonda dövlət başçısı vurğulamışdır ki, Azərbaycan xalqı Xocalı soyqırımını heç vaxt unutmayacaq. Bu faciə gələcək nəsillərə tarix dərsi kimi ötürüləcək və belə hadisələrin bir daha təkrarlanmaması üçün xalqımız daim güclü olmalıdır. Güclü dövlət, güclü ordu və milli birlik Azərbaycanın təhlükəsizliyinin və sülh içində yaşamasının əsas təminatıdır.

Pərviz Hüseynzadə

Yeni Azərbaycan Partiyası Babək rayon təşkilatının əməkdaşı