Biz Azərbaycana qarşı törədilmiş bu əsassız terror aktı ilə, təcavüzlə barışmayacağıq - ŞƏRH

Prezident İlham Əliyev Təhlükəsizlik Şurasının iclasında bildirib. "Silahlı Qüvvələrimizə təlimat verildi ki, cavab tədbirləri hazırlansın və həyata keçirilsin".
Azərbaycan xalqı bir daha şahid oldu ki, qonşu İran dövləti Azərbaycan Respublikasına və azərbaycanlılara qarşı düşmənçilik siyasətindən əl çəkməyib. Tehranda səfirliyimizə yönəldilmiş xain hücumdan sonra, bu dəfə İran silahlı qüvvələri tərəfindən Naxçıvan Muxtar Respublikasının beynəlxalq hava limanına və digər mülki infrastruktura pilotsuz uçuş aparatları ilə həyata keçirilmiş terror aktı, açıq-aşkar və qəbuledilməz bir təxribatdır.
Azərbaycan Respublikası hər zaman beynəlxalq hüququn prinsiplərinə, dövlətlərin suverenliyinə və ərazi bütövlüyünə hörmətlə yanaşan, regionda sülh və sabitliyin möhkəmlənməsi üçün ardıcıl siyasət yürüdən bir ölkə olmuşdur. Lakin son dövrlərdə bəzi qüvvələrin Azərbaycana qarşı həyata keçirdiyi təxribat xarakterli addımlar regionda sabitliyə ciddi təhdid yaradır.
Martın 5-də İran İslam Respublikasının ərazisindən Azərbaycan Respublikasının Naxçıvan Muxtar Respublikasına pilotsuz uçuş aparatları vasitəsilə həyata keçirilmiş xain hücum cəhdi də bu cür təhlükəli və məsuliyyətsiz addımların növbəti təzahürü kimi qiymətləndirilməlidir. Bu hadisə təkcə Azərbaycan dövlətinə qarşı deyil, eyni zamanda beynəlxalq hüququn fundamental prinsiplərinə qarşı yönəlmiş açıq təxribatdır.
Azərbaycan cəmiyyəti bu hadisəni haqlı olaraq ciddi narahatlıq və qəzəblə qarşılamışdır. Çünki dövlətimizin ərazi bütövlüyünə və təhlükəsizliyinə yönəlmiş hər hansı hücum heç vaxt qəbul edilə bilməz. İran ərazisindən Naxçıvan istiqamətində həyata keçirilmiş dron hücumu regionda gərginliyi artırmağa xidmət edən təhlükəli addım olmaqla yanaşı, iki qonşu dövlət arasında münasibətlərə kölgə salan məsuliyyətsiz davranışıdır.
Azərbaycan xalqı yaxşı xatırlayır ki, ölkəmiz uzun illər ərzində müxtəlif xarici təzyiqlər və təxribatlarla üzləşmişdir. Buna baxmayaraq, Azərbaycan dövləti hər zaman prinsipial mövqe nümayiş etdirərək milli maraqlarını qətiyyətlə qorumuş, təhlükəsizliyini təmin etmək üçün bütün zəruri tədbirləri görmüşdür. Bu gün də ölkəmiz istənilən təxribatın qarşısını almaq gücündə olan güclü dövlətə çevrilmişdir.
İranın Azərbaycana münasibətdə son illərdə nümayiş etdirdiyi ziddiyyətli və bəzən düşmənçilik xarakterli mövqe regionda suallar doğurur. Halbuki Azərbaycan hər zaman qonşuluq münasibətlərinə sadiq qalmış, regionda əməkdaşlıq və qarşılıqlı etimad mühitinin formalaşması üçün səylər göstərmişdir. Buna baxmayaraq, zaman-zaman baş verən belə hadisələr rəsmi Tehranın Azərbaycana qarşı riyakar və qeyri-konstruktiv siyasət yürütməsi barədə ciddi düşünməyə əsas verir.
Naxçıvan Muxtar Respublikası Azərbaycanın ayrılmaz tərkib hissəsi olmaqla yanaşı, strateji əhəmiyyətə malik regiondur. Bu əraziyə qarşı hər hansı təhdid Azərbaycan dövlətinin təhlükəsizliyinə qarşı yönəlmiş addım kimi qəbul edilir. Bu baxımdan martın 5-də baş vermiş dron hücumu cəhdinə ölkəmizin siyasi və hüquqi qiymət verməsi tamamilə qanunauyğundur.
Azərbaycan dövləti bu kimi hallara qarşı həm diplomatik müstəvidə, həm də beynəlxalq hüquq çərçivəsində qətiyyətli addımlar atmaq hüququna malikdir. Dövlətimizin əsas prioriteti regionda sülh və sabitliyin qorunmasıdır. Lakin bu, heç də Azərbaycanın öz təhlükəsizliyinə qarşı yönəlmiş təhdidlərlə barışacağı anlamına gəlmir. Azərbaycan xalqı və dövləti öz suverenliyini və ərazi bütövlüyünü qorumaq üçün bütün imkanlara malikdir.
Tarix dəfələrlə göstərmişdir ki, Azərbaycan xalqı hər zaman milli maraqlarını qətiyyətlə müdafiə etmişdir. 2020-ci ildə 44 günlük Vətən müharibəsində qazanılmış tarixi Qələbə Azərbaycan dövlətinin gücünü və xalqımızın iradəsini bütün dünyaya nümayiş etdirdi. Bu gün Azərbaycan regionun ən güclü və nüfuzlu dövlətlərindən biri kimi öz təhlükəsizliyini təmin etmək iqtidarındadır.
Martın 5-də baş vermiş hadisə bir daha göstərdi ki, regionda sabitliyin qorunması üçün dövlətlər beynəlxalq hüququn norma və prinsiplərinə ciddi riayət etməlidirlər. Qonşu dövlətlər arasında qarşılıqlı hörmət və etimad mühitinin qorunması regional təhlükəsizliyin əsas şərtidir.
Azərbaycan dövləti və xalqı isə qəti mövqeyini açıq şəkildə ifadə edir: ölkəmizə qarşı törədilən hər hansı terror aktı və təxribat cəzasız qalmayacaq. Biz Azərbaycana qarşı yönəlmiş bu əsassız terror aktı və təcavüzlə heç vaxt barışmayacağıq. Dövlətimizin təhlükəsizliyi, suverenliyi və ərazi bütövlüyü Azərbaycan xalqı üçün dəyişməz və müqəddəs dəyərlərdir.

Şamo Qasımov
Yeni Azərbaycan Partiyası Laçın rayon təşkilatının sədr müavini