Azərbaycan tarixində qadınların müdrikliyi və mənəvi dayağı - ŞƏRH

Hər il qeyd olunan 8 Mart – Beynəlxalq Qadınlar Günü təqvimdə yalnız bir bayram deyil. Bu tarix qadınların cəmiyyət həyatındakı roluna verilən qiymətin, onların zəhmətinin və fədakarlığının ifadəsidir. Azərbaycan tarixində qadınlar sadəcə ailənin dayağı olmaqla kifayətlənməyib, həm də dövlətin, mədəniyyətin, mənəviyyatın və milli kimliyin qoruyucusu kimi mühüm rol oynayıblar.

Azərbaycan qadını əsrlər boyu gücün, sədaqətin və müdrikliyin rəmzi kimi formalaşıb. Tarixin müxtəlif mərhələlərində bu torpağın qadınları cəmiyyətə istiqamət verən, milli dəyərləri qoruyan və gələcək nəsilləri yetişdirən aparıcı qüvvələrdən biri olub.

Azərbaycan tarixində qadınların rolu təkcə ailə institutu ilə məhdudlaşmayıb. Onlar dövlət idarəçiliyində, ictimai həyatda, mədəniyyət və elmdə mühüm mövqelər tutublar. XII əsrdə yaşamış görkəmli dövlət xadimi Möminə Xatun siyasi müdrikliyi və dövlət idarəçiliyindəki bacarığı ilə tarixə düşmüş qadınlardan biridir. Onun adı Azərbaycan dövlətçilik tarixində güclü qadın iradəsinin simvolu kimi yaşayır.

Azərbaycan qadınlarının qəhrəmanlıq ənənəsi də zəngin və şərəflidir. Tarix boyu vətənin çətin günlərində qadınlar yalnız arxa cəbhədə deyil, mənəvi mübarizədə də ön sırada dayanmışlar. Onlar igid övladlar yetişdirmiş, milli ruhu qorumuş və xalqın birlik ideyasını yaşatmışlar.

Xalqımızın yaddaşında qadınların fədakarlığı xüsusilə XX əsrin faciəli səhifələrində daha aydın görünür. Xocalı soyqırımı zamanı Azərbaycan qadınları böyük ağrılar və itkilər yaşasa da, milli iradəni sarsıtmağa imkan vermədilər. Onların səbr və möhkəmliyi xalqın mübarizə ruhunun qorunmasında mühüm rol oynadı.

Müstəqillik dövründə isə Azərbaycan qadınlarının cəmiyyət həyatındakı rolu daha da genişlənmişdir. Dövlət siyasətində qadınların fəallığının artması, onların elm, təhsil, səhiyyə, mədəniyyət və diplomatiya sahələrində qazandığı uğurlar ölkənin inkişafında mühüm yer tutur. Bu istiqamətdə dövlət səviyyəsində həyata keçirilən siyasət qadınların cəmiyyətin bütün sahələrində fəal iştirakına şərait yaradıb. Bu dəyərli qadınlardan biri də görkəmli alim, akademik Zərifə Əliyeva idi. O, təkcə tibb elminə verdiyi böyük töhfələrlə deyil, həm də yüksək mənəviyyatı, sadəliyi və insanlara olan qayğısı ilə Azərbaycan qadınının ən gözəl simasını təcəssüm etdirirdi. Zərifə xanım oftalmologiya sahəsində apardığı elmi araşdırmalarla minlərlə insanın sağlamlığına ümid olmuş, Azərbaycan tibb elminin inkişafına böyük töhfələr vermişdir.

Onun həyat yolu Azərbaycan qadınının nə qədər güclü, savadlı və vətəninə bağlı olduğunu göstərən parlaq nümunədir. Zərifə Əliyevanın xatirəsi bu gün də xalqımızın qəlbində böyük ehtiramla yaşayır və yeni nəsillər üçün örnək olaraq qalır

Azərbaycan qadını həm də mənəvi dəyərlərin qoruyucusudur. Ana sevgisi, ailə sədaqəti və milli tərbiyə ənənələri məhz qadınların sayəsində nəsildən-nəsilə ötürülür. Onlar yalnız övlad böyütmür, eyni zamanda vətənə bağlı, milli ruhlu və məsuliyyətli vətəndaşlar yetişdirirlər.

Bu gün Azərbaycan qadını cəmiyyətin bütün sahələrində fəal iştirak edir. Elm adamı, müəllim, həkim, hərbçi, siyasətçi və sahibkar kimi fəaliyyət göstərən qadınlar ölkənin inkişafına böyük töhfə verirlər. Onların əzmi və zəhməti Azərbaycanın güclənməsində mühüm rol oynayır.

8 Mart həm də Azərbaycan qadınına ehtiram günüdür. Bu gün biz analarımızın, bacılarımızın və qızlarımızın cəmiyyət həyatındakı əvəzsiz rolunu bir daha xatırlayırıq. Azərbaycan qadını tarix boyu olduğu kimi bu gün də gücün, sədaqətin və mənəvi saflığın simvolu olaraq qalır.

Çünki Azərbaycan qadını yalnız bir ailənin deyil, bütöv bir xalqın gələcəyini formalaşdıran müqəddəs bir dəyərdir.

David Həsənov

YAP Naxçıvan şəhər təşkilatının əməkdaşı