Strateji tərəfdaşlıq güclənir - ŞƏRH

Azərbaycan ilə Avropa İttifaqı arasında münasibətlər son illərdə yeni inkişaf mərhələsinə qədəm qoymuşdur. Bu münasibətlərin möhkəmlənməsi baxımından Avropa İttifaqı Şurasının Prezidenti Antonio Kostanın Azərbaycana səfəri mühüm siyasi hadisə kimi qiymətləndirilir. Səfər zamanı Azərbaycan Prezidenti İlham Əliyevin verdiyi bəyanatlarda vurğulandığı kimi, Azərbaycan və Avropa İttifaqı hazırda müxtəlif səviyyələrdə tərəfdaşlığın fəal mərhələsindədir. Bu fikir tərəflər arasında formalaşmış əməkdaşlığın geniş spektrini və strateji əhəmiyyətini aydın şəkildə nümayiş etdirir.

Müasir beynəlxalq münasibətlər sistemində Azərbaycan etibarlı tərəfdaş və sabitlik məkanı kimi tanınır. Ölkənin həyata keçirdiyi müstəqil və balanslaşdırılmış xarici siyasət kursu onun həm regionda, həm də beynəlxalq arenada nüfuzunu daha da artırmışdır. Avropa İttifaqı ilə münasibətlər də məhz bu siyasətin mühüm istiqamətlərindən biridir. Azərbaycan uzun illərdir ki, Avropa İttifaqı ilə siyasi dialoq, iqtisadi əməkdaşlıq, enerji təhlükəsizliyi, nəqliyyat və humanitar sahələrdə sıx tərəfdaşlıq əlaqələri qurmuşdur.

Antonio Kostanın Azərbaycana səfəri bu münasibətlərin daha da dərinləşdirilməsi üçün yeni imkanlar yaradır. Səfər çərçivəsində keçirilən görüşlərdə iki tərəf arasında mövcud əməkdaşlığın hazırkı vəziyyəti və gələcək inkişaf perspektivləri geniş müzakirə olunmuşdur. Xüsusilə iqtisadi əlaqələrin genişləndirilməsi, ticarət dövriyyəsinin artırılması və qarşılıqlı investisiyaların təşviqi kimi məsələlər diqqət mərkəzində olmuşdur. Bu baxımdan Azərbaycan ilə Avropa İttifaqı arasında mövcud tərəfdaşlıq həm regional, həm də qlobal miqyasda mühüm əhəmiyyət kəsb edir.

Enerji sahəsi Azərbaycan–Avropa İttifaqı münasibətlərində əsas istiqamətlərdən biridir. Avropanın enerji təhlükəsizliyinin təmin olunmasında Azərbaycanın rolu getdikcə artır. Azərbaycan zəngin enerji ehtiyatlarına malik olmaqla yanaşı, həm də bu resursların beynəlxalq bazarlara təhlükəsiz və etibarlı şəkildə çatdırılması üçün mühüm infrastruktur layihələri həyata keçirmişdir. Bu baxımdan Cənub Qaz Dəhlizi kimi iri enerji layihələri Avropa ölkələrinin enerji mənbələrinin şaxələndirilməsinə mühüm töhfə verir. Avropa İttifaqı da öz növbəsində Azərbaycanı etibarlı enerji tərəfdaşı kimi qiymətləndirir.

Bununla yanaşı, nəqliyyat və logistika sahəsində əməkdaşlıq da xüsusi əhəmiyyət daşıyır. Azərbaycan coğrafi mövqeyinə görə Avropa ilə Asiyanı birləşdirən mühüm tranzit mərkəzlərindən biridir. Son illərdə ölkədə həyata keçirilən genişmiqyaslı infrastruktur layihələri Azərbaycanın beynəlxalq nəqliyyat dəhlizlərində rolunu daha da gücləndirmişdir. Bu imkanlar Avropa İttifaqı ilə əməkdaşlığın genişləndirilməsi üçün əlavə perspektivlər yaradır.

Prezident İlham Əliyevin səsləndirdiyi “biz müxtəlif səviyyələrdə tərəfdaşlığın fəal mərhələsindəyik” fikri Azərbaycan ilə Avropa İttifaqı arasında münasibətlərin yalnız iqtisadi və enerji sahələri ilə məhdudlaşmadığını göstərir. Bu tərəfdaşlıq siyasi dialoq, təhlükəsizlik, humanitar əlaqələr, elm, təhsil və mədəniyyət kimi sahələri də əhatə edir. Tərəflər arasında qarşılıqlı etimad və əməkdaşlıq prinsipləri üzərində qurulan bu münasibətlər regionda sabitliyin və inkişafın təmin olunmasına da töhfə verir.

Mələk Rzayeva

YAP Kəngərli rayon təşkilatının məsləhətçisi