Avrasiyanın mühüm tranzit mərkəzi ŞƏRH

Ölkəmiz beynəlxalq nəqliyyat və logistika sistemində mühüm mövqeyə malikdir. Əsasəndə Şərq–Qərb və Şimal–Cənub nəqliyyat dəhlizləri üzrə ölkəmiz artıq əvəzolunmaz tərəfdaş kimi qəbul olunur. Azərbaycanın əlverişli coğrafi mövqeyi, həyata keçirilən strateji layihələr və uzaqgörən siyasi qərarlar nəticəsində ölkəmiz Avrasiyanın mühüm tranzit mərkəzlərindən birinə çevrilmişdir.

Bizim nəqliyyat dəhlizləri üzrə fəaliyyətimiz xüsusilə müstəqillik illərində daha da sürətlənmişdir. Ümummilli lider Heydər Əliyev Azərbaycanın beynəlxalq nəqliyyat layihələrində fəal iştirakının əsasını qoymuşdur. Onun təşəbbüsü ilə ölkəmiz regional əməkdaşlıq layihələrinə qoşulmuş, Şərqlə Qərbi, eləcə də Şimalla Cənubu birləşdirən nəqliyyat xətlərinin formalaşmasına töhfə vermişdir. Bu siyasət sonrakı illərdə də uğurla davam etdirilmişdir.

Bu gün isə Azərbaycan Respublikasının Prezidenti İlham Əliyev tərəfindən həyata keçirilən siyasət nəticəsində ölkəmiz nəqliyyat və logistika sahəsində mühüm regional mərkəzə çevrilmişdir. Prezident İlham Əliyev bu məsələyə toxunaraq demişdir:

“Azərbaycan yerləşdiyi coğrafi mövqedən səmərəli istifadə edərək Şərqlə Qərb arasında, eləcə də Şimalla Cənub arasında mühüm nəqliyyat və logistika mərkəzinə çevrilmişdir.”

Şərq–Qərb nəqliyyat dəhlizi qədim İpək yolu ənənələrinin müasir dövrdə yenidən canlandırılması kimi qiymətləndirilir. Bu istiqamətdə həyata keçirilən ən mühüm layihələrdən biri Bakı–Tbilisi–Qars dəmir yolu xəttidir. Bu dəmir yolu xətti Asiya ilə Avropanı birləşdirən mühüm logistika arteriyası kimi fəaliyyət göstərir və Azərbaycanı beynəlxalq yükdaşımalarının əsas tranzit ölkələrindən birinə çevirir. Bununla yanaşı, Bakı Beynəlxalq Dəniz Ticarət Limanı da Şərq–Qərb marşrutunun əsas qovşaqlarından biridir.

Prezident İlham Əliyev bu layihələrin əhəmiyyətini belə ifadə etmişdir: “Biz nəqliyyat infrastrukturuna böyük sərmayələr qoymuşuq və bunun nəticəsində Azərbaycan bu gün beynəlxalq nəqliyyat dəhlizlərinin mühüm hissəsinə çevrilmişdir.”

Şimal–Cənub nəqliyyat dəhlizi də Azərbaycan üçün strateji əhəmiyyət daşıyan layihələrdən biridir. Bu dəhliz Hind okeanı hövzəsindən başlayaraq İran, Azərbaycan və Rusiya üzərindən Avropaya qədər uzanan geniş bir logistika marşrutunu əhatə edir. Bu layihə çərçivəsində Azərbaycanda yeni dəmir yolları, avtomobil magistralları və logistika mərkəzləri inşa edilmişdir. Xüsusilə Şimal–Cənub Beynəlxalq Nəqliyyat Dəhlizi region ölkələri arasında iqtisadi əməkdaşlığın genişlənməsinə mühüm töhfə verir.

Prezident İlham Əliyev bu dəhlizin əhəmiyyətini vurğulayaraq demişdir: “Şimal–Cənub nəqliyyat dəhlizi təkcə iqtisadi deyil, həm də siyasi baxımdan ölkələr arasında əməkdaşlığın möhkəmlənməsinə xidmət edir.”

Son illərdə Azərbaycanın işğaldan azad olunmuş ərazilərində də yeni nəqliyyat infrastrukturu yaradılır. Qarabağ və Şərqi Zəngəzur bölgələrində inşa edilən yollar, dəmir yolları və hava limanları ölkəmizin regional nəqliyyat sistemində rolunu daha da artırır. Bu layihələr Azərbaycanın nəqliyyat-logistika potensialını genişləndirərək onu Avrasiyanın əsas tranzit qovşaqlarından birinə çevirir.

Beləliklə, Azərbaycanın həyata keçirdiyi strateji layihələr nəticəsində ölkəmiz bu gün Şərq–Qərb və Şimal–Cənub nəqliyyat dəhlizləri üzrə əvəzolunmaz tərəfdaşa çevrilmişdir. Bu dəhlizlər yalnız iqtisadi əlaqələrin inkişafına deyil, həm də regionda sabitliyin, əməkdaşlığın və qarşılıqlı etimadın möhkəmlənməsinə xidmət edir. Azərbaycanın təşəbbüsləri və həyata keçirdiyi layihələr gələcəkdə də ölkəmizin beynəlxalq nəqliyyat sistemində mövqeyini daha da gücləndirəcəkdir.

Elnarə Vəlibəyli

YAP fəalı