Sülhün və sabitliyin möhkəmləndirilməsinə yönəlmiş təşəbbüslər

“Azərbaycan Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “Keçid dövründə olan dünyada fikir ayrılıqlarının aradan qaldırılması” mövzusunda XIII Qlobal Bakı Forumunun əhəmiyyəti olduqca böyükdür. Ölkəmiz növbəti dəfə mötəbər qonaqların iştirakı ilə vacib bir tədbirə ev sahibliyi etməklə qlobal miqyasda baş verən proseslərə dair vacib fikirlərin səsləndiyi mühüm platforma kimi çıxış edir. Sözsüz ki, bu xüsusda Nizami Gəncəvi Beynəlxalq Mərkəzi genişspektrli məsələləri əhatə edən və çox yüksək beynəlxalq nüfuza malik aparıcı beynəlxalq qurumlardan biri kimi çıxış edir.” Bu sözləri YAP Təftiş Komissiyasının sədri, Milli Məclisin deputatı Sevinc Hüseynova deyib.

O qeyd edib ki, Qlobal Bakı Forumu çox nüfuzlu beynəlxalq tədbirdir: “Forumda çıxış edən Prezident İlham Əliyev də Forumun əhəmiyyətindən bəhs etdi. Sözsüz ki, bu prezidentlərin, baş nazirlərin, parlament spikerlərinin, tanınmış ictimai fiqurların, diplomatların, işgüzar dairələrin və vətəndaş cəmiyyəti nümayəndələrinin təcrübəsi baxımından bu olduqca vacib bir platformadır.
Builki Forumun gündəliyi çox genişdir. Forum bir çox məsələləri əhatə edib. Ölkə başçısının da qeyd etdiyi kimi regional təhlükəsizlik Azərbaycan üçün hər zaman bir nömrəli məsələ olub.
Müasir dövrdə qlobal siyasi və iqtisadi proseslərin intensiv şəkildə dəyişdiyi bir mərhələdə təşkil olunan forum beynəlxalq əməkdaşlığın gücləndirilməsi, dialoq mühitinin inkişafı və qlobal problemlərin birgə müzakirəsi baxımından mühüm əhəmiyyət kəsb edir.
Qlobal Bakı Forumu artıq uzun illərdir ki, dünyanın müxtəlif regionlarından dövlət və hökumət başçılarını, sabiq prezidentləri və baş nazirləri, beynəlxalq təşkilatların rəhbərlərini, nüfuzlu siyasətçiləri, alimləri və ekspertləri bir araya gətirən nüfuzlu beynəlxalq platforma kimi tanınır. Bu forum çərçivəsində qlobal gündəlikdə duran ən aktual məsələlər müzakirə olunur, müxtəlif baxışların qarşılaşdırılması və konstruktiv dialoq vasitəsilə ortaq mövqelərin formalaşdırılması üçün geniş imkanlar yaradılır”.
Deputat bildirib ki, Forumun açılış mərasimində çıxış edən Prezident İlham Əliyev həmçinin müasir beynəlxalq münasibətlər sistemində müşahidə olunan mürəkkəb proseslərə diqqət çəkib: “Dövlət başçısı qeyd edib ki, hazırda dünya siyasi, iqtisadi və texnoloji transformasiyaların təsiri altında yeni mərhələyə qədəm qoyur. Bu proseslər qlobal təhlükəsizlik arxitekturasına, beynəlxalq hüquq sisteminə və dövlətlərarası münasibətlərə ciddi təsir göstərir. Prezident vurğulamışdır ki, belə bir şəraitdə qarşılıqlı hörmətə, beynəlxalq hüququn prinsiplərinə və çoxtərəfli əməkdaşlığa əsaslanan dialoq mexanizmləri xüsusi əhəmiyyət kəsb edir.
Azərbaycanın beynəlxalq əməkdaşlıq və dialoq təşəbbüslərində fəal rol oynayır. Ölkəmiz müxtəlif mədəniyyətlərin və sivilizasiyaların qovşağında yerləşməklə multikulturalizm, tolerantlıq və qarşılıqlı hörmət dəyərlərinin təşviqinə daim xüsusi önəm verir. Bu baxımdan Bakı şəhərinin beynəlxalq dialoq platformalarının təşkil olunduğu mühüm mərkəzlərdən birinə çevrilməsi təsadüfi deyil.
Forum çərçivəsində keçirilən plenar iclaslarda və panel müzakirələrində beynəlxalq təhlükəsizlik, regional sabitlik, qlobal iqtisadi inkişaf, enerji təhlükəsizliyi, iqlim dəyişiklikləri, texnoloji innovasiyalar, humanitar əməkdaşlıq və qlobal idarəetmə sisteminin gələcəyi kimi mövzular geniş müzakirə olunub. Tədbir iştirakçıları müasir dövrdə beynəlxalq münasibətlər sistemində yaranan fikir ayrılıqlarının və geosiyasi gərginliklərin aradan qaldırılması üçün dialoq və əməkdaşlığın əhəmiyyətini xüsusi vurğulayıblar”.
Sevinc Hüseynova vurğulayıb ki, Forumda qlobal səviyyədə artan çağırışların yalnız kollektiv yanaşma və çoxtərəfli əməkdaşlıq vasitəsilə həll edilə biləcəyi bir daha bəyan edilib: “Xüsusilə iqlim dəyişiklikləri, enerji resurslarının təhlükəsiz və dayanıqlı istifadəsi, beynəlxalq ticarət əlaqələrinin inkişafı, qlobal səhiyyə problemləri və humanitar böhranlar kimi məsələlər dünya dövlətlərinin birgə səylərini tələb edən əsas istiqamətlər kimi qeyd olunub.
Forum çərçivəsində keçirilən müzakirələr göstərib ki, müasir dövrdə qlobal problemlərin həlli üçün beynəlxalq təşkilatların fəaliyyətinin daha da gücləndirilməsi, regional əməkdaşlıq mexanizmlərinin inkişaf etdirilməsi və dövlətlər arasında etimad mühitinin möhkəmləndirilməsi zəruridir. Bu baxımdan Qlobal Bakı Forumu kimi platformalar müxtəlif baxışların qarşılıqlı anlaşma və dialoq mühitində müzakirə olunmasına şərait yaradır.
Eyni zamanda forum çərçivəsində iştirakçılar qlobal təhlükəsizlik mühitində müşahidə olunan dəyişikliklərə də diqqət çəkmişlər. Qeyd olunmuşdur ki, regional münaqişələr, geosiyasi rəqabət, iqtisadi qeyri-müəyyənlik və sosial problemlər beynəlxalq sabitliyə ciddi təsir göstərir. Bu problemlərin aradan qaldırılması üçün dövlətlər arasında əməkdaşlığın genişləndirilməsi, beynəlxalq hüququn norma və prinsiplərinə hörmət və qarşılıqlı etimadın gücləndirilməsi xüsusi əhəmiyyət daşıyır.
Forumun iştirakçıları həmçinin qlobal iqtisadi inkişafın davamlılığının təmin olunması, yeni texnologiyaların tətbiqi, innovasiya mühitinin inkişafı və rəqəmsal transformasiyanın yaratdığı imkanlar barədə də fikir mübadiləsi aparmışlar. Müasir texnologiyaların sürətli inkişafı dövlətlərin iqtisadi strategiyalarına, əmək bazarına və sosial münasibətlər sisteminə ciddi təsir göstərdiyindən bu sahədə beynəlxalq əməkdaşlığın genişləndirilməsi vacib hesab olunub.
Bütün bunların fonunda Qlobal Bakı Forumunun keçirilməsi Azərbaycanın beynəlxalq münasibətlər sistemində artan rolunun və nüfuzunun göstəricilərindən biridir. Bu cür mötəbər tədbirlərin Bakı şəhərində təşkil olunması ölkəmizin qlobal dialoq mərkəzlərindən biri kimi mövqeyini daha da möhkəmləndirir. Azərbaycan müxtəlif beynəlxalq təşəbbüslər vasitəsilə qlobal problemlərin həllinə töhfə vermək, dövlətlər və xalqlar arasında qarşılıqlı anlaşmanı gücləndirmək istiqamətində fəal fəaliyyət göstərir.
Bu xüsusda “Keçid dövründə olan dünyada fikir ayrılıqlarının aradan qaldırılması” mövzusuna həsr olunan XIII Qlobal Bakı Forumu qlobal miqyasda dialoq və əməkdaşlığın təşviqinə xidmət edən mühüm beynəlxalq platforma kimi bir daha öz əhəmiyyətini nümayiş etdirib. Forum çərçivəsində aparılan müzakirələr beynəlxalq ictimaiyyət üçün aktual olan məsələlərin daha dərindən təhlilinə, yeni əməkdaşlıq imkanlarının müəyyənləşdirilməsinə və qlobal problemlərin həlli istiqamətində ortaq yanaşmaların formalaşdırılmasına mühüm töhfə verib.
Beləliklə, XIII Qlobal Bakı Forumu beynəlxalq dialoqun və əməkdaşlığın inkişafına xidmət edən mühüm platforma kimi dövlətlər arasında qarşılıqlı etimadın gücləndirilməsinə, qlobal çağırışların birgə müzakirəsinə və sülhün, sabitliyin möhkəmləndirilməsinə yönəlmiş təşəbbüslərin təşviqinə öz töhfəsini verməkdə davam edir”.