Tarixi dostluq və qonşuluq prinsipləri - ŞƏRH

Cənubi Qafqaz regionunda sabitliyin və inkişafın təmin olunmasında mühüm rol oynayan amillərdən biri dövlətlərarası əməkdaşlıqdır. Bu baxımdan Azərbaycan və Gürcüstan arasında formalaşmış ikitərəfli münasibətlər xüsusi əhəmiyyət kəsb edir. Azərbaycan Respublikası ilə Gürcüstan Respublikası arasında diplomatik əlaqələr 1992-ci il noyabrın 18-də yaradılıb. 1995-ci ilin fevral ayında Bakıda Gürcüstan səfirliyinin, 1996-cı ilin mart ayında isə Tbilisidə Azərbaycan səfirliyinin açılışı ikitərəfli əlaqələrin inkişafına əlavə stimul verib. Bundan başqa, 2010-cu ildə Gürcüstanın Batumi şəhərində Azərbaycanın, 2013-cü ildə isə Azərbaycanın Gəncə şəhərində Gürcüstanın baş konsulluqları açılıb.

Heydər Əliyevin və Eduard Şevardnadzenin əsasını qoyduğu strateji əməkdaşlıq keçən müddətdə bütün sahələr üzrə davam edib. Bu gün Gürcüstanla Azərbaycanı hər şeydən əvvəl Bakı-Supsa, Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars və Trans-Anadolu Qaz Boru Kəməri kimi qlobal enerji, nəqliyyat-kommunikasiya layihələri birləşdirir. Qeyd olunan layihələr həmin ölkələri bir-birinə strateji cəhətdən bağlayır. Bununla paralel olaraq, GUAM, Qara Dəniz İqtisadi Əməkdaşlıq Təşkilatı və digər qurumlar daxilində əməkdaşlıq ikitərəfli strateji əlaqələri daha da möhkəmləndirib. Siyasi yaxınlaşma iqtisadi inteqrasiya fonunda baş verir və strateji xarakter alır.

Azərbaycan və Gürcüstan arasında siyasi əlaqələr, qarşılıqlı dəstək və yaxın əməkdaşlıq əsasında qurulub. Hər iki ölkə bir-birinin suverenliyini və ərazi bütövlüyünü dəstəkləyir. Gürcüstan, Azərbaycanı Qarabağ münaqişəsində dəstəkləyir və hər iki ölkə birgə regional təhlükəsizlik məsələlərində əməkdaşlıq edir. Azərbaycan və Gürcüstan arasında mədəniyyətlərarası əlaqələr də çox güclüdür. Hər iki ölkənin mədəniyyətində bir-birinə təsir edən amillər mövcuddur. Azərbaycan və Gürcüstan xalqları arasında qarşılıqlı ziyarətlər, mədəniyyət festivalları, incəsənət nümayişləri və təhsil sahəsində əməkdaşlıq mühüm rol oynayır. Azərbaycan və Gürcüstan, regional təhlükəsizlik məsələlərində də sıx əməkdaşlıq edirlər.

Tarixən dostluq və qonşuluq prinsiplərinə əsaslanan bu əlaqələr bu gün strateji tərəfdaşlıq səviyyəsinə yüksəlmişdir.

Gülnaz Rüstəmova

YAP Babək rayon təşkilatının əməkdaşı