Cənubi Qafqazda dostluq və etimadın nümunəsi ŞƏRH

Azərbaycan Respublikası ilə Gürcüstan Respublikası arasında münasibətlər tarixən dostluq, qarşılıqlı hörmət və etibarlı tərəfdaşlıq prinsipləri üzərində formalaşmışdır. Bu iki qonşu dövlət Cənubi Qafqaz regionunda sülhün, sabitliyin və iqtisadi inkişafın təmin olunmasında mühüm rol oynayır.

Müstəqillik dövründən etibarən Azərbaycan və Gürcüstan arasında siyasi əlaqələr davamlı şəkildə inkişaf etmiş, dövlətlərarası münasibətlər strateji tərəfdaşlıq səviyyəsinə yüksəlmişdir. Son dövrlərdə keçirilən siyasi məsləhətləşmələr və rəsmi görüşlər bu əməkdaşlığın yüksək səviyyədə olduğunu bir daha təsdiq edir.

İki ölkə arasında iqtisadi münasibətlər xüsusilə enerji və nəqliyyat sahələrində özünü daha aydın göstərir. Azərbaycan neft və qazının Gürcüstan üzərindən dünya bazarlarına çıxarılması, həmçinin Bakı–Tbilisi–Qars dəmir yolu layihəsi regionun tranzit imkanlarını əhəmiyyətli dərəcədə artırmışdır. Bu layihələr yalnız iki ölkənin deyil, bütövlükdə Avropa və Asiya arasında iqtisadi əlaqələrin güclənməsinə xidmət edir.

Azərbaycan və Gürcüstan beynəlxalq təşkilatlar çərçivəsində də bir-birinin mövqeyini dəstəkləyən ölkələr kimi çıxış edir. Qarşılıqlı dəstək və əməkdaşlıq regionda sabitliyin qorunması baxımından mühüm əhəmiyyət daşıyır.

Xüsusilə Azərbaycan Respublikasının Prezidenti cənab İlham Əliyevin Gürcüstana son dövlət səfəri iki ölkə arasındakı strateji tərəfdaşlığın daha da möhkəmləndiyini bir daha nümayiş etdirmişdir. 6 aprel 2026-cı il tarixində baş tutan bu səfər çərçivəsində Prezident İlham Əliyev Gürcüstan Prezidenti Mixeil Kavelaşvili və Baş nazir İrakli Kobaxidze ilə görüşlər keçirmiş, ikitərəfli münasibətlərin gələcək inkişaf perspektivləri, regional təhlükəsizlik, enerji əməkdaşlığı və nəqliyyat layihələri ətrafında geniş fikir mübadiləsi aparılmışdır. Səfər zamanı Bakı–Tbilisi–Ceyhan neft kəməri, Cənub Qaz Dəhlizi və Orta Dəhliz çərçivəsində birgə layihələrin əhəmiyyəti xüsusi vurğulanmış, regionda sabitliyin və iqtisadi inteqrasiyanın gücləndirilməsi istiqamətində ortaq mövqe ifadə olunmuşdur. Eyni zamanda, bu səfər Azərbaycan və Gürcüstan arasında dostluq münasibətlərinin yüksək səviyyədə olduğunu və qarşılıqlı etimada əsaslandığını bir daha təsdiqləmişdir. Səfər çərçivəsində səsləndirilən fikirlər Azərbaycan ilə Gürcüstan arasında dostluğun sadəcə qonşuluq deyil, strateji baxışa söykənən uzunmüddətli tərəfdaşlıq olduğunu bir daha nümayiş etdirdi. Bundan əlavə, humanitar və mədəni sahədə də əlaqələr geniş şəkildə inkişaf edir. Təhsil, elm, turizm və mədəniyyət istiqamətlərində həyata keçirilən birgə layihələr xalqlar arasında dostluq münasibətlərini daha da möhkəmləndirir.

Nəticə etibarilə, Azərbaycan Respublikası ilə Gürcüstan Respublikası arasındakı münasibətlər dostluq, etimad və ortaq maraqlara əsaslanan nümunəvi tərəfdaşlıq modelidir. Bu münasibətlər gələcəkdə də regionun inkişafı və təhlükəsizliyi üçün vacib rol oynamağa davam edəcəkdir.

Elnur Əsədov

YAP Kəngərli rayon təşkilatının əməkdaşı