Xatirələrdə əbədi yaşayan Zərifə xanım Əliyeva - ŞƏRH

Azərbaycanın elm və ictimai fikir tarixində elə simalar var ki, onların adı çəkiləndə ilk növbədə mənəvi saflıq, yüksək intellekt və sonsuz insanpərvərlik xatırlanır. Bu görkəmli şəxsiyyətlər sırasında adı xüsusi ehtiramla anılan akademik Zərifə xanım Əliyevanın həyat yolu, sadəcə bir həkimin deyil, həm də fədakar bir ana və müdrik Azərbaycan qadınının kamillik məktəbidir.

Azərbaycan xalqı hər il görkəmli alim, akademik və yüksək mənəvi keyfiyyətləri ilə seçilən Zərifə Əliyevanın anım gününü dərin hörmət hissi ilə qeyd edir. Onun zəngin ömür yolu, elmə verdiyi töhfələr və insanlara sonsuz qayğısı bu gün də minnətdarlıqla xatırlanır. Zərifə xanım yalnız tibb sahəsində böyük uğurlar qazanmış alim deyil, həm də mərhəmət, nəciblik və vətəndaşlıq nümunəsi kimi xalqın yaddaşında yaşayır.

Zərifə Əliyeva Azərbaycan qadınının zəka, müdriklik və fədakarlıq simvolu idi. O, sübut etdi ki, qadın eyni zamanda uğurlu alim, qayğıkeş ana, sədaqətli həyat yoldaşı və cəmiyyət üçün dəyərli şəxsiyyət ola bilər. Onun həyatı Azərbaycan qadınının ailəyə, elmə və Vətənə bağlılığının parlaq təcəssümüdür.

Zərifə xanımın ailə həyatı da örnək olmuşdur. O, Heydər Əliyev ilə birlikdə dövlətçilik tariximizdə xüsusi yeri olan bir ailənin mənəvi dayaqlarından biri idi. Bu ailədə yaşadılan yüksək dəyərlər bu gün də cəmiyyətimiz üçün nümunə kimi qəbul olunur.

Bu gün böyük qürur hissi ilə qeyd edilir ki, Zərifə xanımın xeyirxahlıq yolu onun ailəsində davam etdirilir. Mehriban Əliyevanın humanitar fəaliyyəti, insanlara diqqət və qayğısı, milli-mənəvi dəyərlərə sadiqliyi Zərifə xanımın işıqlı yolunun davamı kimi qiymətləndirilir.

Zərifə Əliyevanın elmi fəaliyyəti xüsusilə oftalmologiya sahəsində mühüm mərhələ təşkil edir. O, Azərbaycanda vaxtilə geniş yayılmış traxoma xəstəliyinə qarşı mübarizədə misilsiz xidmətlər göstərmişdir. Respublikanın müxtəlif bölgələrinə səfərlər edən alim xəstəliyin profilaktikası, diaqnostikası və müalicəsi istiqamətində böyük işlər aparmış, minlərlə insanın sağlamlığına qovuşmasına yardım etmişdir.

Traxomanın aradan qaldırılması istiqamətində apardığı araşdırmalar onun elmi fəaliyyətində mühüm yer tutmuşdur. Bu sahədə əldə etdiyi nəticələr namizədlik dissertasiyasının əsasını təşkil etmiş və tibb elmi üçün böyük əhəmiyyət kəsb etmişdir.

Zərifə xanım eyni zamanda istehsalat sahələrində çalışan insanların sağlamlığının qorunmasına da xüsusi diqqət ayırırdı. Zərərli iş mühitinin görmə orqanlarına təsirini araşdıraraq, bu problemlərin qarşısının alınması üçün praktik tədbirlər həyata keçirmişdir. Onun fəaliyyəti nəticəsində bir çox insan görmə qabiliyyətini qoruyub saxlaya bilmişdir.

Oftalmologiya sahəsində qazandığı uğurlar və layiq görüldüyü mükafatlar Zərifə Əliyeva tərəfindən hər zaman Azərbaycan elminə verilən qiymət kimi qəbul olunurdu. O, peşəsini yalnız elm sahəsi kimi deyil, insanlara xidmət missiyası kimi dəyərləndirirdi.

Zərifə xanımın “Həkim insanın ən yaxın dayağı olmalıdır” məzmunlu fikirləri onun həyat amalını aydın şəkildə ifadə edir. O, həkimlik sənətində peşəkarlıqla yanaşı, insansevərliyin də vacib olduğunu daim vurğulayırdı.

Ömrünü insanların sağlamlığına həsr etmiş Zərifə Əliyeva bu gün də xalqımız tərəfindən böyük sevgi ilə yad edilir. Onun işıqlı xatirəsi minlərlə insanın qəlbində yaşayır, adı Azərbaycan tibb elminin tarixində xüsusi ehtiramla çəkilir. Zərifə xanım Əliyevanın keçdiyi şərəfli ömür yolu gələcək nəsillər üçün daim örnək olaraq qalacaqdır.

Elvin Əliyev

YAP Babək rayon təşkilatının sədr müavini