Ağcabədi rayonunda bədii qiraət müsabiqəsi keçirilib

YAP Ağcabədi rayon təşkilatı Ümummilli Lider Heydər Əliyevin anadan olmasının 103 illiyi münasibətilə Qarabağ Regional Təhsil İdarəsinin Ağcabədi rayon üzrə təhsil sektoru ilə birgə rayonun ümumtəhsil məktəblərinin şagirdləri arasında bədii qiraət müsabiqəsi keçirilib. Müsabiqədə Ağcabədi rayonunun ümumtəhsil məktəblərinin şagirdləri iştirak etmişlər.

YAP Ağcabədi rayon təşkilatının sədr müavini Nazim Bünyatov iştirakçıları salamlamış, müsabiqəni açıq elan etdikdən sonra Azərbaycan Respublikasının Dövlət Himni səsləndirilmişdir.

Ümummilli Lider Heydər Əliyevin, müstəqilliyimiz və ərazi bütövlüyümüz uğrunda canlarını fəda etmiş şəhidlərin xatirəsi 1 dəqiqəlik sükutla yad edilmişdir.

Rayon təşkilatının sədr müavini Nazim Bünyatov keçirilən bədii qiraət müsabiqəsinin Azərbaycanın müstəqilliyi və inkişafı uğrunda misilsiz xidmətləri olmuş, Ulu Öndərimiz Heydər Əliyevin əziz xatirəsinə ehtiram olaraq anadan olmasının 103-cü il dönümünə həsr edildiyini qeyd etmişdir. Nazim Bünyatov müsabiqənin şərtləri barədə məlumat vermiş, müsabiqədə I, II, III yer tutanlara Ulu Öndərə həsr edilmiş yekun tədbirdə rayon təşkilatı tərəfindən Fəxri Fərman və hədiyyələr təqdim ediləcəyini qeyd etmiş, müsabiqə iştirakçılarına uğurlar diləmişdir.

Ulu Öndər Heydər Əliyevə, Azərbaycan Respublikasının Prezidenti, ali Baş Komandan İlham Əliyevə, qəhrəman ordumuza, həmçinin vətənpərvərlik mövzusunda söylənən şeirlər münsiflər heyəti tərəfindən diqqətlə dinlənilmiş, fərdi qaydada hər bir iştirakçıya ballar verilmişdir.

Münsiflər heyətinin yekdil rəyinə görə I yerə Ağcabədi şəhər 3 nömrəli məktəb-liseyin 6-cı sinif şagirdi Əkbər Banu Səməd qızı və Ağcabədi şəhər 6 nömrəli tam orta məktəbin 8-ci sinif şagirdi Sadıqzadə Türkan Samir qızı, II yerə Mehrablı kənd 1 nömrəli tam orta məktəbin 8-ci sinif şagirdi Quliyeva Nuray Rasim qızı və Ağcabədi şəhər 1 nömrəli tam orta məktəbin 1-ci sinif şagirdi Hacıyev Fərhad Həbib oğlu, III yerə Taxtakörpü qəsəbə 1 nömrəli tam orta məktəbin 8-ci sinif şagirdi Bəhramlı Röya Elmar qızı, Ağcabədi şəhər 4 nömrəli tam orta məktəbin 8-ci sinif şagirdi Məmmədli Vahid Vüsal oğlu və Ağcabədi şəhər 9 nömrəli tam orta məktəbin 9-cu sinif şagirdi Şərifova Zeynəb Zamiq qızı layiq görülmüşdür.

Müsabiqə Yeni Azərbaycan Partiyasının Himninin səslənməsi ilə başa çatıb.