“Azərbaycan bütün münaqişələrin sülh və danışıqlar yolu ilə həllini dəstəkləyir” -DEPUTAT DANIŞDI

"Azərbaycan uzun illər müharibə şəraitində yaşamış bir ölkə kimi bu cür münaqişələrin yaratdığı ağır fəsadları çox yaxşı anlayır və müharibədən zərər çəkmiş xalqlara hansı istiqamətlərdə dəstəyin vacib olduğunu real təcrübə əsasında bilir".

Bu sözləri SİA-ya açıqlamasında Milli Məclisin iqtisadi siyasət, sənaye və sahibkarlıq komitəsinin sədr müavini Azər Badamov bildirib.
Onun sözlərinə görə, ilk növbədə humanitar məsələlərdə dəstəyin ön plana çıxarılması tam məntiqli və əsaslandırılmış yanaşmadır:

"Azərbaycan ötən illər ərzində müharibədən əziyyət çəkən Ukrayna xalqına müxtəlif istiqamətlərdə humanitar yardımlar göstərib. Bu yardımlar sırasında dağıdılmış məktəblərin bərpası, dərman və tibbi ləvazimatların göndərilməsi, kritik vaxtda təcilli yardım maşınlara yanacaq yardımın edilməsi , generator və transformatorlarla təminat kimi həyati əhəmiyyətli layihələr xüsusi yer tutur. Yəni, özü də çətinliklərdən keçmiş bir ölkə olaraq Azərbaycan kritik vəziyyətdə olan bir xalqa real və praktiki dəstək nümayiş etdirib.
Bununla yanaşı, ukraynalı uşaqların və tələbələrin reabilitasiyası məqsədilə onların mütəmadi olaraq Azərbaycana gətirilməsi, psixoloji və sosial dəstək proqramlarına cəlb olunması da diqqətəlayiqdir. Bu, təkcə maddi deyil, eyni zamanda mənəvi həmrəyliyin də göstəricisidir.
Humanitar yardım xətti ümumilikdə Azərbaycanı beynəlxalq arenada etibarlı və məsuliyyətli tərəfdaş kimi mövqeləndirir. Müharibədən zərər çəkmiş əhaliyə göstərilən dəstək Ukrayna cəmiyyətində ölkəmizə qarşı müsbət ictimai rəy formalaşdırır. Bu isə gələcək siyasi və iqtisadi əməkdaşlıq üçün mühüm sosial baza yaradır.
Bununla yanaşı, Azərbaycanın Ukrayna ilə münasibətlərində enerji təhlükəsizliyi, mina təmizlənməsi və bərpa-quruculuq sahələrini ön plana çıxarması strateji baxımdan çoxşaxəli və uzunmüddətli təsirlər vəd edir. Bu yanaşma yalnız mövcud əməkdaşlığı dərinləşdirmir, eyni zamanda gələcək tərəfdaşlığın institusional əsaslarını da möhkəmləndirir.
Enerji təhlükəsizliyi sahəsində əməkdaşlıq xüsusi əhəmiyyət kəsb edir. Azərbaycanın enerji resursları və alternativ enerji potensialı Ukraynanın enerji diversifikasiyası siyasətinə mühüm töhfə verə bilər. Bu isə daha geniş kontekstdə Avropanın enerji təhlükəsizliyində Azərbaycanın rolunu artırır və ölkəmizi regionda strateji aktor kimi möhkəmləndirir.
Mina təmizlənməsi sahəsində Azərbaycanın əldə etdiyi unikal təcrübə Ukrayna üçün xüsusilə актуaldır. İşğaldan azad edilmiş ərazilərdə həyata keçirilən genişmiqyaslı minatəmizləmə işləri ölkəmizə ciddi texniki və institusional bilik qazandırıb. Bu təcrübənin paylaşılması həm humanitar, həm də praktiki əməkdaşlığın genişlənməsinə xidmət edə bilər.
Bərpa-quruculuq istiqamətində isə Azərbaycan son illərdə böyük infrastruktur layihələrini uğurla həyata keçirib. Dağıdılmış ərazilərin qısa müddətdə yenidən qurulması sahəsində əldə olunan təcrübə Ukraynanın post-müharibə bərpasında faydalı ola bilər. Bu, eyni zamanda Azərbaycan şirkətləri üçün yeni iqtisadi imkanlar yaradır və qarşılıqlı investisiya axınını təşviq edir.
Nəticə etibarilə, bu dörd istiqamətin prioritetləşdirilməsi Azərbaycan–Ukrayna münasibətlərini daha praktik, qarşılıqlı faydaya əsaslanan və dayanıqlı müstəviyə keçirə bilər. Bu yanaşma siyasi dialoqu gücləndirməklə yanaşı, iqtisadi inteqrasiyanı da sürətləndirəcək və hər iki ölkənin regional və qlobal mövqelərini möhkəmləndirəcək.
Eyni zamanda qeyd olunmalıdır ki, Azərbaycan dövləti milli maraqlara əsaslanan müstəqil və balanslaşdırılmış xarici siyasət yürüdür. Ölkəmizin digər dövlətlərlə qurduğu ikitərəfli münasibətlər heç bir halda üçüncü tərəflərin maraqlarına qarşı yönəlmir. Bu kontekstdə, Rusiya-Ukrayna müharibəsi davam etdiyi şəraitdə Azərbaycan Ukrayna ilə hərbi əməkdaşlıq həyata keçirmir.
Azərbaycanın həm qonşu dövlətlərlə, həm də uzaq region ölkələri ilə münasibətlərdə balansı qoruması ölkəmizə eyni zamanda sülh təşəbbüslərində iştirak etmək və dialoq platforması kimi çıxış etmək imkanı yaradır. Uzun illər ərazi bütövlüyü problemi və müharibə yaşamış bir ölkə kimi Azərbaycan bütün münaqişələrin sülh və danışıqlar yolu ilə həllini dəstəkləyir".