Azərbaycan–Ukrayna münasibətlərində yeni mərhələ - ŞƏRH

Aprelin 25-də Qəbələ şəhərində baş tutan görüş Azərbaycan–Ukrayna münasibətlərinin inkişafında diqqətçəkən hadisələrdən biri kimi yadda qaldı. Dövlət başçıları İlham Əliyev və Volodimir Zelenski mətbuata birgə bəyanatlarla çıxış edərək iki ölkə arasında əməkdaşlığın perspektivlərini geniş şəkildə dəyərləndirdilər.

Prezident İlham Əliyev öz bəyanatında Azərbaycan ilə Ukrayna arasında mövcud olan dostluq və tərəfdaşlıq münasibətlərinin uzun illərə söykəndiyini vurğuladı. O qeyd etdi ki, hər iki ölkə beynəlxalq hüququn prinsiplərinə, xüsusilə dövlətlərin ərazi bütövlüyü və suverenliyinə daim hörmətlə yanaşır. Bu baxımdan Bakı və Kiyev arasında siyasi dialoq yüksək səviyyədə davam edir və qarşılıqlı dəstək münasibətlərin əsas sütunlarından biridir.

Dövlət başçısı həmçinin iqtisadi əməkdaşlığın genişləndirilməsinin vacibliyinə toxundu. Enerji, nəqliyyat və ticarət sahələrində mövcud imkanların daha da inkişaf etdirilməsi üçün konkret addımların atıldığını bildirdi. Azərbaycan tərəfi Ukrayna ilə xüsusilə enerji təhlükəsizliyi və logistika sahələrində əməkdaşlığı gücləndirməyə hazır olduğunu bir daha bəyan etdi.

Ukrayna Prezidenti Volodimir Zelenskinin Azərbaycana səfəri isə iki ölkə arasında əlaqələrin yeni mərhələyə qədəm qoyduğunu göstərir. Onun səfəri çərçivəsində keçirilən görüşlərdə siyasi dialoqla yanaşı, iqtisadi və humanitar sahələrdə əməkdaşlıq məsələləri də müzakirə olundu. Prezident Zelenski Azərbaycanın regionda artan rolunu yüksək qiymətləndirərək, tərəfdaşlığın daha da dərinləşdirilməsində maraqlı olduqlarını ifadə etdi.

Ümumilikdə, Qəbələdə keçirilən bu görüş və mətbuat üçün səsləndirilən bəyanatlar Azərbaycan–Ukrayna münasibətlərinin möhkəm təməl üzərində qurulduğunu və gələcəkdə daha da inkişaf edəcəyini göstərir. Hər iki ölkə qarşılıqlı hörmət və əməkdaşlıq prinsiplərinə əsaslanaraq regional və beynəlxalq səviyyədə birgə fəaliyyətlərini davam etdirmək niyyətindədir.

Sahib Şükürov

YAP Göyçay rayon təşkilatının sədri