“Zərifə Əliyeva irsi gələcək nəsillərin yolunu işıqlandıran bir məşəldir” - ŞƏRH

“Azərbaycan elminin və mənəviyyatının parlaq simalarından biri olan Zərifə Əliyevanın doğum günü yalnız bir şəxsiyyətin xatirə günü deyil, bütövlükdə milli dəyərlərimizin, elmə və insana xidmət ənənələrinin təntənəsidir. Onun adı Azərbaycan tibb elminin inkişafı ilə yanaşı, yüksək insanlıq keyfiyyətlərinin, nəciblik və fədakarlığın rəmzinə çevrilmişdir”.Bu sözləri SİA-ya açıqlamasında deputat Jalə Əliyeva deyib.Onun sözlərinə görə, akademik Zərifə Əliyeva öz ömrünü insan sağlamlığının keşiyində dayanmağa həsr edən nadir şəxsiyyətlərdən idi:“O, xüsusilə oftalmologiya sahəsində apardığı fundamental tədqiqatlarla yalnız ölkəmizdə deyil, beynəlxalq miqyasda da böyük nüfuz qazanmışdır. Onun elmi fəaliyyəti nəticəsində bir çox göz xəstəliklərinin diaqnostika və müalicəsində yeni yanaşmalar formalaşmış, minlərlə insanın həyatına işıq gəlmişdir. Bu mənada Zərifə Əliyevanın adı sözün həqiqi mənasında insanlara nur bəxş edən alim kimi tarixə həkk olunmuşdur.Lakin onun böyüklüyü təkcə elmi nailiyyətləri ilə ölçülmür. Zərifə Əliyeva həm də yüksək mənəvi keyfiyyətləri, sadəliyi, səmimiyyəti və insanlara sonsuz sevgisi ilə yaddaşlarda yaşayır. O, Azərbaycan qadınının ən gözəl keyfiyyətlərini özündə birləşdirən ideal bir obraz idi – həm alim, həm ana, həm də cəmiyyət üçün örnək olan ziyalı.Bu gün onun doğum gününü qeyd edərkən, biz yalnız keçmişə nəzər salmırıq – eyni zamanda bu böyük irsdən güc alaraq gələcəyə daha inamla baxırıq. Zərifə Əliyevanın həyat yolu bir məktəbdir – elmə sədaqətin, vətənə xidmətin və insanlığa məhəbbətin məktəbi. Bu məktəb bu gün də yaşayır və yeni nəsilləri formalaşdırır. Onun doğum günü hər bir azərbaycanlı üçün yalnız anım deyil, həm də qürur günüdür.Zərifə Əliyeva – adı nur, xatirəsi əbədi, irsi isə gələcək nəsillərin yolunu işıqlandıran bir məşəldir”.